ಮೊಳಕಾಲ್ಮುರು: ಐತಿಹಾಸಿಕ ಸ್ಮಾರಕಕ್ಕೆ ದಾರಿ ಯಾವುದಯ್ಯಾ?

ಮೊಳಕಾಲ್ಮುರು: ಹಲವು ಐತಿಹಾಸಿಕ ಸ್ಥಳಗಳನ್ನು ಹೊಂದಿರುವ ಮೊಳಕಾಲ್ಮುರು ತಾಲ್ಲೂಕು ರಾಷ್ಟ್ರಮಟ್ಟದಲ್ಲಿ ಪ್ರಖ್ಯಾತವಾಗಿದೆ. ಇಂತಹ ಸ್ಮಾರಕಗಳ ಕುರಿತು ಸೂಕ್ತ ಪ್ರಚಾರ ಹಾಗೂ ಸ್ಥಳದ ಮಾಹಿತಿ ನೀಡುವ ಫಲಕಗಳನ್ನು ಅಳವಡಿಸದ ಕಾರಣ, ಆ ತಾಣಗಳು ಇದ್ದೂ ಇಲ್ಲದಂತಾಗಿವೆ ಎಂಬ ಆರೋಪಗಳು ಕೇಳಿಬಂದಿದೆ.

ಕ್ರಿಸ್ತ ಪೂರ್ವದಿಂದಲೂ ತಾಲ್ಲೂಕು ಹಲವು ಐತಿಹಾಸಿಕ ಘಟನೆಗಳ ಜೊತೆ ಮುಖಾಮುಖಿಯಾಗಿದೆ. ಜಿಲ್ಲೆಯಲ್ಲಿ ಅತೀ ಹೆಚ್ಚು ಐತಿಹಾಸಿಕ ಸ್ಥಳಗಳನ್ನು ಹೊಂದಿರುವ ಶ್ರೇಯವೂ ಇಲ್ಲಿನದ್ದು. ವಿವಿಧ ರಾಜ್ಯ ಹಾಗೂ ವಿದೇಶಿ ಪ್ರವಾಸಿಗರೂ ಇಲ್ಲಿಗೆ ಭೇಟಿ ನೀಡುತ್ತಾರೆ. ಪ್ರಚಾರದ ಕೊರತೆಯಿಂದ ಈ ಸ್ಥಳಗಳ ಮಾಹಿತಿ ತಾಲ್ಲೂಕಿನ ಜನರಿಗೇ ಗೊತ್ತಿಲ್ಲದಂತಾಗಿದೆ. ಈ ಕುರಿತು ವಿದ್ಯಾರ್ಥಿಗಳಲ್ಲಿ ಅರಿವು ಮೂಡಿಸುವ ಕೆಲಸವಾಗಿಲ್ಲ ಎಂಬ ಮಾತೂ ಕೇಳಿಬರುತ್ತಿವೆ. 

ತಾಲ್ಲೂಕಿನ ಹಾನಗಲ್ ಬೆಟ್ಟಗಳಲ್ಲಿ ಕ್ರಿ.ಪೂ, 3ನೇ ಶತಮಾನದಲ್ಲಿ ಜನವಸತಿ ಇದ್ದಿದ್ದಕ್ಕೆ ಕುರುಹು ಕಂಡುಬಂದಿದೆ. ಗುಹೆಗಳ ಕಲ್ಲಿನ ಮೇಲೆ ಚಿತ್ರಿಸಲಾಗಿರುವ ವರ್ಣಚಿತ್ರಗಳು, ಆಗಿನ ಕಾಲದ ಜನರ ಜೀವನಶೈಲಿಯನ್ನು ತಿಳಿಸುತ್ತವೆ. ಗುಂಡ್ಲೂರು ಸಮೀಪದ ಗುಡ್ಡದ ಗುಹೆಗಳಲ್ಲಿಯೂ ಶಿಲಾಯುಗ ಕಾಲದ ವರ್ಣಚಿತ್ರಗಳಿವೆ ಎಂದು ಸಾಹಿತಿ ಮರಿಕುಂಟೆ ತಿಪ್ಪೇಸ್ವಾಮಿ ಅವರು ‘ಮೊಳಕಾಲ್ಮುರು ದರ್ಶನ’ ಪುಸ್ತಕದಲ್ಲಿ ದಾಖಲಿಸಿದ್ದಾರೆ.

ತಾಲ್ಲೂಕಿನ ಮೂಲಕ ಹಾದುಹೋಗಿದ್ದ ರಾಜ್ಯ ಹೆದ್ದಾರಿ 65ನ್ನು ನಾಲ್ಕು ವರ್ಷಗಳ ಹಿಂದೆ ರಾಷ್ಟ್ರೀಯ ಹೆದ್ದಾರಿ 150 ‘ಎ’ ಆಗಿ ಮೇಲ್ದರ್ಜೆಗೇರಿಸಲಾಯಿತು. ನಿರ್ಮಾಣದ ಸಮಯದಲ್ಲಿ ದಾರಿ ಬದಿಯಲ್ಲಿದ್ದ ಐತಿಹಾಸಿಕ ಸ್ಥಳಗಳ ಮಾಹಿತಿ ಫಲಕಗಳನ್ನು ತೆರವು ಮಾಡಲಾಗಿತ್ತು. ಹೆದ್ದಾರಿ ಪ್ರಾಧಿಕಾರದವರು ಇದುವರೆಗೂ ಇವುಗಳನ್ನು ಮರು ಸ್ಥಾಪಿಸಿಲ್ಲ. ಪ್ರವಾಸೋದ್ಯಮ ಇಲಾಖೆ, ಜಿಲ್ಲಾಡಳಿತ ಸಹ ಈ ಬಗ್ಗೆ ಗಮನಹರಿಸಿಲ್ಲ. ಹೀಗಾಗಿ, ಸ್ಥಳ ವೀಕ್ಷಣೆಗೆ ಬರುವ ಪ್ರವಾಸಿಗರು ತೊಂದರೆ ಎದುರಿಸುತ್ತಿದ್ದಾರೆ ಎಂದು ಹಂಪಿ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ವಿರೂಪಾಕ್ಷಿ ಪೂಜಾರಹಳ್ಳಿ ದೂರಿದ್ದಾರೆ.