ಮಂಗಳೂರು: ಮಳೆಗಾಲದಲ್ಲಿ ‘ತೇಲುವ ಮನೆಗಳು’

ಮಂಗಳೂರು: ಅರ್ಧಗಂಟೆ ಮಳೆ ಬಂದರೆ ಇಲ್ಲಿ ನೀರು ಮನೆ ಅಂಗಳವನ್ನು ಆವರಿಸುತ್ತದೆ. ಮನೆಗಳು ತೇಲುತ್ತಿರುವಂತೆ ಭಾಸವಾಗುತ್ತವೆ. ಚರಂಡಿ ಸೇರುವ ಕೊಳಚೆ ನೀರು ಉಕ್ಕಿ ಮಳೆ ನೀರಿನೊಂದಿಗೆ ಸೇರಿ, ಇಡೀ ಪರಿಸರ ದುರ್ನಾತವಾಗುತ್ತದೆ!

ಇದು ನಗರದ ದೇರೆಬೈಲ್ ಪೂರ್ವ ವಾರ್ಡ್‌ ವ್ಯಾಪ್ತಿಯಲ್ಲಿರುವ ಹಂಚಿನಮನೆ ನಾಗಬನದ ಸುತ್ತಮುತ್ತಲಿನ ನಿವಾಸಿಗಳ ಗೋಳು.

ಇಲ್ಲಿನ ಮುಖ್ಯ ಚರಂಡಿಯು ಕೆಲವು ಕಡೆಗಳಲ್ಲಿ ಕಿರಿದಾಗಿದೆ. 20 ಅಡಿ ಅಗಲ ಇರುವ ಚರಂಡಿ ಕೆಲವು ಕಡೆಗಳಲ್ಲಿ ಐದು ಅಡಿಯಷ್ಟು ಕಿರಿದಾಗಿದೆ. ಮಳೆಗಾಲದಲ್ಲಿ ಚರಂಡಿ ಸೇರುವ ನೀರು, ಹಿಮ್ಮುಖ ಒತ್ತಡದಿಂದ ರಸ್ತೆ, ಮನೆಗಳಿಗೆ ನುಗ್ಗುತ್ತದೆ ಎನ್ನುತ್ತಾರೆ ಸ್ಥಳೀಯರು. ‘ಮಹಾನಗರ ಪಾಲಿಕೆ ಅಧಿಕಾರಿಗಳು ಸ್ಥಳಕ್ಕೆ ಬಂದು ನಮ್ಮ ಮನೆ ಎದುರು ಚರಂಡಿಗೆ ನಿರ್ಮಿಸಿರುವ ಕಲ್ವರ್ಟ್ ಅನ್ನು ತೆಗೆದು ಅಗಲಗೊಳಿಸುವುದಾಗಿ ಹೇಳಿದ್ದರು, ಅವರಾಗಿಯೇ ಬಂದಿದ್ದು, ನಾವೇನು ಬೇಡಿಕೆ ಸಲ್ಲಿಸಿದ್ದಲ್ಲ. ಆದರೆ, ಕೆಲಸ ಮಾತ್ರ ಆಗಿಲ್ಲ. ಉಳ್ಳವರ ಮನೆ ಎದುರು ರಸ್ತೆ ಅಗಲವಾಗಿ, ಚರಂಡಿ ಕಿರಿದಾಗುತ್ತದೆ. ನಿರಂತರವಾಗಿ ಮಳೆ ಸುರಿದರೆ ಮನೆ ಸುತ್ತ ಸರೋವರ ನಿರ್ಮಾಣವಾಗುತ್ತದೆ’ ಎಂದು ಬೇಸರಿಸಿದರು ಪುನ್ಕೆದಡಿ ಸಮೀಪದ ನಿವಾಸಿ ಮೀನಾಕ್ಷಿ.

‘ಮಳೆಗಾಲದಲ್ಲಿ ಪ್ರವಾಹದ ಸಮಸ್ಯೆ ಬೇಸಿಗೆಯಲ್ಲಿ ಇನ್ನೊಂದು ಸಮಸ್ಯೆ. ರಸ್ತೆ ಮಧ್ಯೆ ಇರುವ ಮ್ಯಾನ್‌ಹೋಲ್‌ನಿಂದ ಕೊಳಚೆ ನೀರು ಉಕ್ಕುತ್ತದೆ. ಅಸಹ್ಯ ವಾಸನೆ ಇಡೀ ಪರಿಸರವನ್ನು ಆವರಿಸುತ್ತದೆ. ವಾಸನೆ ತಡೆಯಲಾಗದೆ ಸ್ವಂತ ಖರ್ಚಿನಲ್ಲಿ ಕೊಳಚೆಯನ್ನು ತೆಗೆಸಿದೆವು. ಸಂಜೆ ಆಗುತ್ತಿದ್ದಂತೆ ವಿಪರೀತ ಸೊಳ್ಳೆಕಾಟ’ ಎಂದು ಹಂಚಿನಮನೆ ನಾಗಬನ ಸಮೀಪದ ನಿವಾಸಿಯೊಬ್ಬರು ಹೇಳಿದರು.

‘ಹಲವರು ಮನೆಯ ಹೊಲಸು ನೀರನ್ನು ತೋಡಿಗೆ ಬಿಡುತ್ತಾರೆ, ಮುಟ್ಟಿನ ಬಟ್ಟೆ, ಮಕ್ಕಳ ಡೈಪರ್ ಅನ್ನು ಕಮೋಡ್‌ನಲ್ಲಿ ಹಾಕುತ್ತಾರೆ. ಇಂತಹ ಘನವಸ್ತುಗಳು ಸೇರಿ ಚರಂಡಿ ಬ್ಲಾಕ್ ಆಗುತ್ತದೆ. ಮನೆಯ ಹೊಲಸು ನೀರನ್ನು ತೋಡಿಗೆ ಬಿಡುವುದನ್ನು ತಡೆಗಟ್ಟಬೇಕು. ಸಾರ್ವಜನಿಕರೂ ಈ ಬಗ್ಗೆ ಅರಿವು ಹೊಂದಬೇಕು’ ಎಂಬುದು ಸ್ಥಳೀಯರಾದ ಗೋಪಾಲ್ ಅವರ ಅಭಿಪ್ರಾಯ.

‘ಇಲ್ಲಿ ಮನೆ ಕಟ್ಟಿ 20 ವರ್ಷಗಳಾದವು. ಮೊದಲು ನೆರೆಯ ಸಮಸ್ಯೆ ಇರಲಿಲ್ಲ. ಇತ್ತೀಚಿನ ವರ್ಷಗಳಲ್ಲಿ ಮಳೆಗಾಲ ಬಂತೆಂದರೆ ಭಯ ಹುಟ್ಟುತ್ತದೆ. ಅರ್ಧಗಂಟೆ ಮಳೆ ಬಂದರೆ ಮನೆಯಂಗಳಕ್ಕೆ ನೀರು ಬರುತ್ತದೆ. ಮಳೆ ಇನ್ನೂ ಜೋರಾದರೆ, ಅಂಗಳ ದಾಟಿ ಜಗುಲಿಗೆ ನೀರು ಏರುತ್ತದೆ. ಮಾಜಿ ಸಚಿವ, ರಿಯಲ್ ಎಸ್ಟೇಟ್ ಉದ್ಯಮಿಯೊಬ್ಬರ ಹೆಸರು ಹೇಳಿಕೊಂಡು ವ್ಯಕ್ತಿಯೊಬ್ಬರು, ತೋಡಿಗೆ ಅರ್ಧ ಅಡಿ ಪೈಪ್ ಹಾಕಿ, ಮಣ್ಣು ಮುಚ್ಚಿದ್ದಾರೆ. ಇದರಿಂದ ಮಳೆ ನೀರು ಸರಾಗವಾಗಿ ಹರಿಯುವುದಿಲ್ಲ’ ಎಂದು ಮಾಲೆಮಾರ್ ರಾಕ್‌ ಪ್ಯಾಲೇಸ್ ಸಮೀಪದ ಮಹಿಳೆಯೊಬ್ಬರು ಅಲವತ್ತುಕೊಂಡರು.