ಮಲೇಬೆನ್ನೂರು: ಸಿಡಿಲು ಬಡಿದು 4 ಹಸು ಸಾವು

ಮಲೇಬೆನ್ನೂರು: ಸಮೀಪದ ಕೊಮಾರನಹಳ್ಳಿ ಗ್ರಾಮದ ನಾಗರಾಜಯ್ಯ ಅವರ ಕೊಟ್ಟಿಗೆಯಲ್ಲಿದ್ದ 4 ಹಸುಗಳು ಮಂಗಳವಾರ ರಾತ್ರಿ ಸಿಡಿಲು ಬಡಿದು ಸಾವಿಗೀಡಾಗಿವೆ.

‘ಕೊಟ್ಟಿಗೆಯಲ್ಲಿ ಕಟ್ಟಿ ಹಾಕಿದ್ದ ಹಸುಗಳು ಸಿಡಿಲ ಹೊಡೆತಕ್ಕೆ ಸಿಲುಕಿ ಕೂಗಿಕೊಂಡವು. ಘಟನೆ ನಡೆಯುತ್ತಿದ್ದಂತೆ ವಿದ್ಯುತ್‌  ಸಂಪರ್ಕ ಕಡಿತವಾಯಿತು. ಬೆಂಕಿ ಕಾಣಿಸಿಕೊಂಡಿತು. ಮಳೆಯ ನಡುವೆಯೇ ಕೊಟ್ಟಿಗೆಯೊಳಗೆ ನೋಡಿದಾಗ 4 ಹಸುಗಳು ಸತ್ತು ಬಿದ್ದಿದ್ದವು’ ಎಂದು ಮಾಲೀಕ ನಾಗರಾಜಯ್ಯ ಅಲವತ್ತುಕೊಂಡರು.

ಜನರ ಸಹಕಾರದಿಂದ ಬೆಂಕಿ ನಂದಿಸಲಾಯಿತು ಎಂದು ಮಾಹಿತಿ ನೀಡಿದರು. 4 ಹಸುಗಳ ಮೌಲ್ಯ ₹ 3 ಲಕ್ಷ ಎಂದು ಅಂದಾಜು ಮಾಡಲಾಗಿದೆ.

ಘಟನಾ ಸ್ಥಳಕ್ಕೆ ಉಪತಹಶೀಲ್ದಾರ್‌ ಆರ್.‌ ರವಿ, ಕಂದಾಯ ನಿರೀಕ್ಷಕ ಆನಂದ್‌, ಗ್ರಾಮ ಆಡಳಿತಾಧಿಕಾರಿ ಅಣ್ಣಪ್ಪ, ಪಶು ವೈದ್ಯಾಧಿಕಾರಿ ಬಾಲಚಂದ್ರ ತೇಲಗಾರ್‌, ಪೊಲೀಸರು ಭೇಟಿ ನೀಡಿದ್ದರು.

ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.