ಅಮರಗೋಳ | ಗಿಜಿಗುಡುವ ಮಾರುಕಟ್ಟೆ: ಲಕ್ಷಾಂತರ ವಹಿವಾಟು

ಹುಬ್ಬಳ್ಳಿ: ಇಲ್ಲಿನ ಅಮರಗೋಳದ ಜಗಜ್ಯೋತಿ ಬಸವೇಶ್ವರ ಮಾರುಕಟ್ಟೆಯ ಸಗಟು ತರಕಾರಿ ಮಾರಾಟ ವಿಭಾಗವು ಸೋಮವಾರ ಹೊರುತುಪಡಿಸಿ ನಿತ್ಯ ನಸುಕಿನ 3 ಗಂಟೆಗೆ ತೆರೆದುಕೊಳ್ಳುತ್ತದೆ. ಅಪಾರ ಸಂಖ್ಯೆಯಲ್ಲಿ ರೈತರು ವಾಹನಗಳಲ್ಲಿ ಲೋಡುಗಟ್ಟಲೇ ಸೊಪ್ಪು, ತರಕಾರಿಯನ್ನು ಹೊತ್ತು ಇಲ್ಲಿಗೆ ಬರುತ್ತಾರೆ. 

ಮಹಾರಾಷ್ಟ್ರದ ಪುಣೆಯಿಂದ ಅಲ್ಲದೇ ಧಾರವಾಡ ಜಿಲ್ಲೆಯ ಕಲಘಟಗಿ, ಹುಬ್ಬಳ್ಳಿ, ಕುಂದಗೋಳದಿಂದ ರೈತರು ಬರುತ್ತಾರೆ. ಬೆಳಗಾವಿ, ಸವದತ್ತಿ, ಘಟಪ್ರಭ, ಗೋಕಾಕ್‌, ಬಾಗಲಕೋಟೆ, ವಿಜಯಪುರ, ಹಾವೇರಿ, ಉತ್ತರ ಕನ್ನಡ, ಕೋಲಾರ ಹೀಗೆ ರಾಜ್ಯದ ವಿವಿಧ ಜಿಲ್ಲೆಗಳಿಂದಲೂ ಕೃಷಿಕರು ಬರುತ್ತಾರೆ. ದಲ್ಲಾಳಿಗಳ ಜೊತೆ ಚೌಕಾಶಿ ನಡೆಸಿ, ನಿಗದಿತ ದರಕ್ಕೆ ಉತ್ಪನ್ನಗಳನ್ನು ಮಾರುತ್ತಾರೆ.

ಟೊಮೆಟೊ, ಹಸಿ ಮೆಣಸಿನಕಾಯಿ, ಕ್ಯಾರೇಟ್‌, ಬೀನ್ಸ್‌, ಎಲೆ ಕೋಸು, ಸೀಮೆ ಬದನೆಕಾಯಿ, ಬದನೆಕಾಯಿ, ಜವಳಿಕಾಯಿ, ಸೌತೆಕಾಯಿ, ನೀರು ಸೌತೆಕಾಯಿ, ಆಲೂಗಡ್ಡೆ, ಮೂಲಂಗಿ, ಬಗೆ ಬಗೆಯ ಸೊಪ್ಪು, ಈರುಳ್ಳಿ, ಹೀರೇಕಾಯಿ, ಡಬ್ಬಿ ಮೆಣಸಿನಕಾಯಿ, ನುಗ್ಗೆಕಾಯಿ, ಬೀಟ್ರೂಟ್, ಬೆಂಡೆಕಾಯಿ... ಹೀಗೆ ಹತ್ತಾರು ಬಗೆಯ ತರಕಾರಿಗಳ ಹರಾಜು‌‌ ಹಾಗೂ ಸಗಟು ವ್ಯಾಪಾರ ಪ್ರಕ್ರಿಯೆಯು ನಿತ್ಯ ಬೆಳಿಗ್ಗೆ 6 ರಿಂದ 10ರವರೆಗೆ ಇರುತ್ತದೆ.

ಸಗಟು, ಚಿಲ್ಲರೆ ವ್ಯಾಪಾರಿಗಳ ದಂಡು: 

ಮುಂಜಾನೆ ಆರಂಭವಾಗುವ ಇಲ್ಲಿನ ಮಾರುಕಟ್ಟೆಯಲ್ಲಿ ಸಗಟು ದರದಲ್ಲಿ ತರಕಾರಿ ಖರೀದಿಸಲು ನಗರ ಸೇರಿ ಸುತ್ತಮುತ್ತಲಿನ ಜಿಲ್ಲೆಗಳ ಸಗಟು ಹಾಗೂ ಚಿಲ್ಲರೆ ವ್ಯಾಪಾರಿಗಳು ಇಲ್ಲಿಗೆ ಲಗ್ಗೆಯಿಟ್ಟು, ಸಗಟು ದರದಲ್ಲಿ ತರಕಾರಿ ಖರೀದಿಸಿ, ಆಟೊ, ಟಂಟಂ ವಾಹ‌ನಗಳಲ್ಲಿ ತುಂಬಿಕೊಂಡು ನಗರ, ಬಡಾವಣೆ ಪ್ರದೇಶಗಳಲ್ಲಿ ಮಾರಲು ತೆರಳುತ್ತಾರೆ.

ಟೊಮೆಟೊ, ಹಸಿಮೆಣಸಿನಕಾಯಿ, ಕ್ಯಾರೆಟ್‌, ಸೌತೆಕಾಯಿ, ಬದನೆಕಾಯಿ, ಜವಳಿಕಾಯಿ ಸೇರಿ ಕೆಲ ತರಕಾರಿಗಳನ್ನು ಇಲ್ಲಿ 3 ರಿಂದ 10 ಕೆಜಿಯವರೆಗೆ ಪ್ಲಾಸ್ಟಿಕ್‌ ಡಬ್ಬಿಗಳಲ್ಲಿ ತುಂಬಿ ಸಗಟು ದರದಲ್ಲಿ ಮಾರುತ್ತಾರೆ.  ಇದು ಚಿಲ್ಲರೆ ವ್ಯಾಪಾರಿಗಳಿಗೆ ಅನುಕೂಲವಾಗುತ್ತದೆ. ಗ್ರಾಹಕರು ಕನಿಷ್ಠ 2 ಕೆಜಿ ತರಕಾರಿ ಖರೀದಿಸಬೇಕು. ಪ್ರತಿ ತರಕಾರಿಯು ಗುಣಮಟ್ಟದ ಆದಾರದ ಮೇಲೆ ಅದರ ಬೆಲೆಯನ್ನು ನಿಗದಿ ಪಡಿಸಲಾಗುತ್ತದೆ.

ನಿತ್ಯ ₹20 ಲಕ್ಷಕ್ಕೂ ಹೆಚ್ಚು ವಹಿವಾಟು:

‘ಇಲ್ಲಿನ ಎಪಿಎಂಸಿಗೆ ನಿತ್ಯ ಧಾರವಾಡ ಜಿಲ್ಲೆಯ ಕಲಘಟಗಿ, ನೂಲ್ವಿ, ಮಿಶ್ರಿಕೋಟೆ, ನವಲೂರು ಸೇರಿದಂತೆ ಸುತ್ತಮುತ್ತಲಿನ ಜಿಲ್ಲೆಗಳಿಂದ ರೈತರು ತಮ್ಮ ಕೃಷಿ ಉತ್ಪನ್ನಗಳನ್ನು ಮಾರಲು ಇಲ್ಲಿಗೆ ಬರುತ್ತಾರೆ. ರೈತರು, ದಲ್ಲಾಳಿಗಳು, ಚಿಲ್ಲರೆ ವ್ಯಾಪಾರಿಗಳು ಹಾಗೂ ಗ್ರಾಹಕರು ಸೇರಿ ನಿತ್ಯ ಬೆಳಿಗ್ಗೆ 6ರಿಂದ 10ರವರೆಗಿನ ಅವಧಿಯಲ್ಲಿ 5 ಸಾವಿರಕ್ಕೂ ಹೆಚ್ಚು ಜನರಿಂದ ತರಕಾರಿ ಮಾರುಕಟ್ಟೆ ತುಂಬಿರುತ್ತದೆ. ಈ ಸಮಯದಲ್ಲಿ ಅಂದಾಜು ₹20ಲಕ್ಷ ವಹಿವಾಟು ನಡೆಯುತ್ತದೆ. ಉತ್ತಮ ಬೆಲೆ ಬಂದರೆ, ರೈತರಿಗೆ ಹಾಗೂ ನಮಗೆ ಅನುಕೂಲವಾಗುತ್ತದೆ’ ಎನ್ನುತ್ತಾರೆ ಎಪಿಎಂಸಿಯ ತರಕಾರಿ ಸಗಟು ವ್ಯಾಪಾರಿ ಇಮ್ತಿಯಾಜ್‌ ಸವಣೂರು. 

‘ಎಪಿಎಂಸಿಯ ಮತ್ತೊಂದು ಬದಿಯಲ್ಲಿ ಒಣಮೆಣಸಿನಕಾಯಿ, ವಿವಿಧ ತಳಿಯ ಮಾವಿನ ಹಣ್ಣುಗಳ ವ್ಯಾಪಾರವೂ ನಡೆಯುತ್ತಿದೆ. ಸೀಸನ್‌ ಪ್ರಕಾರ ತರಕಾರಿ ಹಾಗೂ ಹಣ್ಣುಗಳ ವ್ಯಾಪಾರವೂ ಇಲ್ಲಿ ಜೋರಾಗಿ ನಡೆಯುತ್ತದೆ. ಇಲ್ಲಿಂದ ಬೇರೆ ಬೇರೆ ಜಿಲ್ಲೆಗಳಿಗೂ ರವಾನೆಯಾಗುತ್ತದೆ’ ಎನ್ನುತ್ತಾರೆ ಅವರು. 

ಉತ್ತಮ ಲಾಭ:  

ಕೋಲಾರದಿಂದ ನಿತ್ಯ 3–4 ಲಾರಿಗಳಲ್ಲಿ ಟೊಮೆಟೊ ಬರುತ್ತದೆ. ಇಲ್ಲಿಂದ ಸ್ಥಳೀಯ ವ್ಯಾಪಾರಿಗಳು ಬೇರೆ ಜಿಲ್ಲೆಗಳಿಗೂ ಕಳುಹಿಸುತ್ತಾರೆ. ಶನಿವಾರ ಬಕ್ರಿದ್‌ ಹಬ್ಬ ಇರುವ ಕಾರಣ ಟೊಮೆಟೊ ಸೇರಿದಂತೆ ಇತರೆ ತರಕಾರಿ ಬೆಲೆಯಲ್ಲಿ ತುಸು ಏರಿಕೆಯಾಗಿದೆ. ಶುಕ್ರವಾರದ ಸಗಟು ಮಾರುಕಟ್ಟೆಯ ಪ್ರಕಾರ 3ಕೆಜಿಯ ಟೊಮೆಟೊ ಡಬ್ಬಿಗೆ ₹60ರಿಂದ ₹80ರ ತನಕ ಮಾರಾಟವಾಗಿದೆ. ಚಿಲ್ಲರೆ ವ್ಯಾಪಾರಿಗಳು ಇನ್ನೂ ಹೆಚ್ಚಿನ ಲಾಭಕ್ಕೆ ಮಾರಾಟ ಮಾಡುತ್ತಾರೆ. ಪೂಣೆಯಿಂದ ಬರುವ ಈರುಳ್ಳಿಯು ಗಾತ್ರ ಹಾಗೂ ಗುಣಮಟ್ಟದ ಆಧಾರದ ಮೇಲೆ 10ಕೆಜಿಗೆ ₹160ರಿಂದ ₹250ರ ತನಕ ಮಾರಾಟವಾಗಿದೆ. ಸೊಪ್ಪಿನ ಬೆಲೆಯು ದುಬಾರಿಯಾಗಿದ್ದು, ಕೊತ್ತೊಂಬರಿ, ಪಾಲಕ್, ಮೆಂತೆ ಸೊಪ್ಪು ಒಂದು ಕಟ್ಟಿಗೆ ₹10ಕ್ಕೆ ಮಾರಾಟವಾಗಿವೆ. ನುಗ್ಗೆಕಾಯಿ ಕೆಜಿಗೆ ₹150ಕ್ಕೆ ಮಾರಾಟವಾಗಿದೆ. ವಾರದಿಂದ ಬೀನ್ಸ್‌ ಹಾಗೂ ಟೊಮೆಟೊ ಬೆಲೆ ಏರಿಕೆಯಾಗುತ್ತಲೇ ಇದೆ. 10ಕೆಜಿ ಬೀನ್ಸ್‌ ₹1,200ರಿಂದ ₹1,500ರ ತನಕ ಸಗಟು ದರದಲ್ಲಿ ಮಾರಾಟವಾಗುತ್ತಿದೆ. ಕೋಲಾರದ ಟೊಮೆಟೊಗೆ ಬೇಡಿಕೆಯಿದ್ದು, 24ಕೆಜಿ ಬಾಕ್ಸ್‌ ₹400ರಿಂದ ₹500 ತನಕ ಮಾರಾಟವಾಗಿದೆ. ತರಕಾರಿ ದರವು ನಿತ್ಯ ಬದಲಾವಣೆಯಾಗುತ್ತಲೇ ಇರುತ್ತದೆ. ಸ್ಥಳೀಯ ಚಿಲ್ಲರೆ ವ್ಯಾಪಾರಿಗಳು ನಮ್ಮಲ್ಲಿ ಸಗಟು ದರದಲ್ಲಿ ಖರೀದಿಸಿ, ಚಿಲ್ಲರೆಯಾಗಿ ಮಾರಾಟ ಮಾಡಿ, ಉತ್ತಮ ಲಾಭ ಪಡೆಯುತ್ತಾರೆ’ ಎನ್ನುತ್ತಾರೆ ಅವರು.