ಕಸಬಾ ಮರಸುವಿನಲ್ಲಿ ಜಾತ್ರೆ ಸಂಭ್ರಮ

ಆಲೂರು: ಎರಡು ವರ್ಷಗಳಿಂದ ಸ್ಥಗಿತಗೊಂಡಿದ್ದ ಕಸಬಾ ಮರಸು ಗ್ರಾಮದ ತಿರುಮಲ ರಂಗನಾಥಸ್ವಾಮಿ ಮತ್ತು ಗ್ರಾಮ ದೇವತೆ ಉಡಿಸಲಮ್ಮ ದೇವಿಯ ಜಾತ್ರೆ ಆರಂಭಗೊಂಡಿತು.

ದೇವಸ್ಥಾನದಲ್ಲಿ ವಿವಿಧ ಪೂಜೆ, ಹೋಮ ಹವನಗಳು ಜರುಗಿದವು. ಭಾನುವಾರ ಸಂಜೆ ಗ್ರಾಮದ ದೊಡ್ಡಕೆರೆ ಗಂಗಾಸ್ಥಾನದಲ್ಲಿ ರಂಗನಾಥಸ್ವಾಮಿ ಮತ್ತು ಉಡುಸಲಮ್ಮ ಅಡ್ಡೆ ದೇವರ ಸಮ್ಮುಖದಲ್ಲಿ ಗಂಗಾಪೂಜೆ, ಮಹಾಗಣಪತಿ ಪೂಜೆಯೊಂದಿಗೆ ವಾಸುದೇವ ಪುಣ್ಯಾಹ ರಕ್ಷಾಬಂಧನ, ವಾಸ್ತುಶಾಂತಿ, ವಿಶ್ವಕ್ಷೇವ ಹೋಮ, ಇಂದ್ರಾದಿ ದಿಕ್ಷಾಪಕ ಹೋಮ, ಸಪರಿವಾರಹೋಮ, ಲಘು ಪೂರ್ಣಾಹುತಿ ನಂತರ ಮಹಾ ಮಂಗಳಾರತಿ ನೆರವೇರಿತು.

ಸೋಮವಾರ ಬೆಳಿಗ್ಗೆ ಪ್ರಾಯಶ್ಚಿತ ಹೋಮದ ಅಂಗವಾಗಿ ಪುಣ್ಯಾಹ ಕಲಸಾರಾಧನೆ, ಕುಂಭ, ಉಪಯಿಂಭ ಮಹಾಕುಂಭಾರಾದನೆ, ಯಾಗಶಾನೆಲೆ ಪ್ರವೇಶ, ನವಗ್ರಹ ಹೋಮ, ಮೃತ್ಯುಂಜಯ ಕ್ಷೇತ್ರಪಾಲಕ, ಬ್ರಹ, ವಿಷ್ಣು, ಮಹೇಶ್ವರ ಸಪರಿವಾರ ಹೋಮ, ಮೂಲಮೂರ್ತಿ ಹೋಮ, ಮಹಾ ಪೂರ್ಣಾಹುತಿ ಕುಭೋದ್ವಾಸನ ಪಂಚಾಮೃತ ಅಭಿಷೇಕ, ಅಲಂಕಾರ ನೈವೇದ್ಯ, ಅಷ್ಠಾವದಾನಸೇವೆ, ಅಷ್ಠೋತ್ತರ ಮಹಾಮಂಗಳಾರತಿ ನಡೆಯಿತು.

ಗ್ರಾಮಸ್ಥರ ಮನವಿ ಮೇರೆಗೆ ಸರ್ಕಾರದ ನಿರ್ದೇಶನದಂತೆ ಮಜರಾಯಿ, ಧಾರ್ಮಿಕ ದತ್ತಿ ಇಲಾಖೆ ಆಗಮ ಪಂಡಿತರಾದ ಜಿ.ಎ. ವಿಜಯಕುಮಾರ್ ಅವರು ದೇವಸ್ಥಾನಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದರು. ಅವರ ಮಾರ್ಗದರ್ಶನದಲ್ಲಿ ಪ್ರಧಾನ ಅರ್ಚಕರಾದ ಎಂ.ಎಸ್. ಹರಿಪ್ರಸಾದ್ ಮತ್ತು ತಂಡದವರು ಭಾನುವಾರ ಸಂಜೆಯಿಂದ ರಂಗನಾಥಸ್ವಾಮಿ ದೇವಾಲಯದಲ್ಲಿ ವಿವಿಧ ಪೂಜೆ ಹೋಮ ನೆರವೇರಿಸಿದರು.

108 ಕಳಸಗಳಿಗೆ ದೇವತೆಗಳನ್ನು ಆಹ್ವಾನ ಮಾಡಿ, ಶಾಂತಿ ಹೋಮ, ಕಲಾವೃದ್ಧಿ ಹೋಮ, ವಿಶೇಷವಾಗಿ ರಂಗನಾಥಸ್ವಾಮಿ ದೇವರ ತೇಜಬಲೋವೃದ್ಧಿಗಾಗಿ ಪ್ರಾಯಶ್ಚಿತ್ತ ಹೋಮ ನಡೆಯಿತು. ಗ್ರಾಮಸ್ಥರು ಪೂಜೆಯಲ್ಲಿ ಭಾಗಿಯಾಗಿ ಪೂರ್ಣಹುತಿ ಪೂಜೆ ನೆರವೇರಿಸಿದರು. ಕಳಸಗಳನ್ನು ಹೊತ್ತ ಮಹಿಳೆಯರು ದೇವಸ್ಥಾನದ ಸುತ್ತ ಪ್ರದಕ್ಷಿಣೆ ಮಾಡಿ ಕಳಸ ವಿಸರ್ಜಿಸಿದರು.

ತಹಶೀಲ್ದಾರ್ ಮಲ್ಲಿಕಾರ್ಜುನ್, ಪೊಲೀಸ್ ಇನ್‌ಸ್ಪೆಕ್ಟರ್ ಮೋಹನರೆಡ್ಡಿ, ಕಸಬಾ ರಾಜಸ್ವನಿರೀಕ್ಷಕ ಜ್ಞಾನೇಂದ್ರ, ಗ್ರಾಮ ಆಡಳಿತಾಧಿಕಾರಿ ರವಿನಾಯಕ್, ಬಿಜೆಪಿ ಜಿಲ್ಲಾ ಘಟಕದ ಅಧ್ಯಕ್ಷ ಸಿದ್ದೇಶ್ ನಾಗೇಂದ್ರ, ಪಟ್ಟಣ ಪಂಚಾಯಿತಿ ಸದಸ್ಯರಾದ ಧರ್ಮ, ನಿಂಗರಾಜು(ಅಪ್ಪು), ಧರ್ಮದರ್ಶಿ ಎಂ.ಪಿ.ಕುಮಾರ್, ವಿನಯಪ್ರಸಾದ್, ರಾಜಶೇಖರ್, ದೇವಾಲಯದ ಪ್ರಧಾನ ಅರ್ಚಕರಾದ ರವಿಕುಮಾರ್, ಉಡುಸಲಮ್ಮ ದೇವಿ ಅರ್ಚಕರಾದ ವೀರೇಶ್ ಸೇರಿದಂತೆ ನೂರಾರು ಗ್ರಾಮಸ್ಥರು ಪೂಜೆಯಲ್ಲಿ ಭಾಗವಹಿಸಿದ್ದರು.