ಬೈಕ್‌ಗಳ ಡಿಕ್ಕಿ: ಸವಾರ ಸಾವು

ಕಲಬುರ್ಗಿ: ಇಲ್ಲಿನ ಅಫಜಲಪುರ ರಸ್ತೆಯಲ್ಲಿರುವ ಕಡಣಿ ಕ್ರಾಸ್ ಹತ್ತಿರ ಶುಕ್ರವಾರ ಬೈಕ್‌ಗಳ ಮಧ್ಯೆ ಡಿಕ್ಕಿ ಸಂಭವಿಸಿ ಒಬ್ಬ ಸವಾರ ಮೃತಪಟ್ಟಿದ್ದು, ನಾಲ್ವರಿಗೆ ಗಾಯಗಳಾಗಿವೆ.

ಜೇವರ್ಗಿ ಕಾಲೊನಿಯ ನಿವಾಸಿ ಧರೆಪ್ಪ (23) ಮೃತಪಟ್ಟವರು. ಗಾಯಗೊಂಡಿರುವ ಶ್ರೀನಿವಾಸ, ಆದಿತ್ಯ, ಸ್ವರೂಪ್, ಬಾಬಾಸಾಬ್ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಆರು ಜನ ಸ್ನೇಹಿತರು ಸೇರಿಕೊಂಡು ಗುರುವಾರ ಸಂಜೆ ಎರಡು ಬೈಕ್‌ಗಳ ಮೇಲೆ ನಗರದ ಹೊರವಲಯದ ದಾಬಾದಲ್ಲಿ ಊಟ ಮುಗಿಸಿ, ಮರಳಿ ಬರುತ್ತಿದ್ದರು. ತ್ರಿಬಲ್‌ ರೈಡ್‌ನಲ್ಲಿ ವೇಗವಾಗಿ ಬರುತ್ತಿದ್ದಾಗ ಅಪಘಾತ ಸಂಭವಿಸಿದೆ ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಸಂಚಾರ ಪೋಲಿಸ್ ಠಾಣೆ -1ರಲ್ಲಿ ಪ್ರಕರಣ ದಾಖಲಾಗಿದೆ.