ಸೇಡಂ | ಭಾರತೀಯ ಸಂಸ್ಕೃತಿ ಉತ್ಸವ: ಹಿಂಗಾರು ಬಿತ್ತನೆ ತ್ಯಾಗ ಮಾಡಿದ ರೈತರು

ಸೇಡಂ: ತಾಲ್ಲೂಕಿನ ನೀಲಹಳ್ಳಿ-ಕೊಂಕನಳ್ಳಿ ಮತ್ತು ಬೀರನಳ್ಳಿ ಗ್ರಾಮಗಳ ಮಧ್ಯೆ 2025ರ ಜನವರಿ 29 ರಿಂದ ಫೆ.6ರವರೆಗೆ ನಡೆಯಲಿರುವ ಭಾರತೀಯ ಸಂಸ್ಕೃತಿ ಉತ್ಸವ-7 ಮತ್ತು ಕೊತ್ತಲ ಬಸವೇಶ್ವರ ಭಾರತೀಯ ಶಿಕ್ಷಣ ಸಮಿತಿಯ ಸ್ವರ್ಣ ಜಯಂತಿ ಕಾರ್ಯಕ್ರಮಕ್ಕೆ ರೈತರು ಐತಿಹಾಸಿಕ ಸಹಕಾರ ನೀಡುತ್ತಿದ್ದಾರೆ.

ನೀಲಹಳ್ಳಿ, ಕೊಂಕನಳ್ಳಿ ಮತ್ತು ಬೀರನಳ್ಳಿ ಗ್ರಾಮದ ಮಧ್ಯೆ ಬಸವರಾಜ ಪಾಟೀಲ ಸೇಡಂ ಅವರ ನೇತೃತ್ವದಲ್ಲಿ ನಡೆಯುತ್ತಿರುವ ರಾಷ್ಟ್ರಮಟ್ಟದ ಕಾರ್ಯಕ್ರಮಕ್ಕೆ ಸುಮಾರು 40ಕ್ಕೂ ಅಧಿಕ ರೈತರು ಹಿಂಗಾರು ಬಿತ್ತನೆ ಮಾಡದಿರಲು ನಿರ್ಧರಿಸಿದ್ದಾರೆ. ಮೂರೂ ಊರಿನ ರೈತರು 240 ಎಕರೆ ಪ್ರದೇಶದಲ್ಲಿ ಸ್ವಯಂ ಪ್ರೇರಿತವಾಗಿ ಬಿತ್ತನೆ ತ್ಯಾಗ ಮಾಡಿದ್ದಾರೆ.

‘ಸ್ವರ್ಣ ಜಯಂತಿ ಕಾರ್ಯಕ್ರಮದ ಯಶಸ್ಸಿಗೆ ತಮ್ಮ ಹೊಲಗಳನ್ನು ಬಳಸಿಕೊಳ್ಳುವಂತೆ ಒಕ್ಕೋರಲಿನ ಸಹಕಾರ ನೀಡಿದ್ದು, ಸೇಡಂ ಇತಿಹಾಸದಲ್ಲಿ ಐತಿಹಾಸಿಕವಾಗಿ ದಾಖಲೆಯಾಗುತ್ತಿದೆ ಎನ್ನುತ್ತಾರೆ’ ಸ್ವರ್ಣ ಜಯಂತಿ ಕಾರ್ಯಸ್ಥಳದ ಪ್ರಮುಖರಾದ ಭಗಂತರಾವ ಪಾಟೀಲ ಕೊಂಕನಳ್ಳಿ.

‘ಒಂದು ಎಕರೆಯಿಂದ ಮೊದಲ್ಗೊಂಡು, 5 ಎಕರೆ, 10 ಎಕರೆ, 20 ಎಕರೆ ಜಮೀನು ಹೊಂದಿರುವ ರೈತರು ಇದರಲ್ಲಿ ಪಾಲುದಾರರಾಗುತ್ತಿರುವುದು ಶ್ರೇಷ್ಠತನಕ್ಕೆ ಸಾಕ್ಷಿಯಾಗುತ್ತಿದೆ. ಕಾರ್ಯಕ್ರಮದ ಪ್ರಮುಖರು ಇದಕ್ಕೆ ಗೌರವಧನ ನೀಡುತ್ತಿದ್ದರೂ ಕೆಲ ರೈತರು ನಿರಾಕರಿಸಿ, ಕಾರ್ಯಕ್ರಮದ ಯಶಸ್ಸಿಗೆ ಸಂಪೂರ್ಣ ಸಹಕಾರ ನೀಡಿದ್ದಾರೆ.

‘ಬಸವರಾಜ ಪಾಟೀಲ ಸೇಡಂ ಕಲ್ಯಾಣ ಕರ್ನಾಟಕ ಭಾಗದ ಶ್ರೇಷ್ಠ ಚಿಂತಕ. ಅವರ ನೇತೃತ್ವದಲ್ಲಿ ಐತಿಹಾಸಿಕ ಕಾರ್ಯಕ್ರಮ ನಡೆಯುತ್ತಿದೆ ಎನ್ನುವುದೇ ನಮಗೆ ಅದೃಷ್ಟ. ಅದು ನಮ್ಮೂರಿನ ಗ್ರಾಮದ ಸೀಮೆಯನ್ನು ಆಯ್ಕೆ ಮಾಡಿಕೊಂಡಿರುವುದು ಬಹುದೊಡ್ಡ ಸೌಭಾಗ್ಯ. ಇಂತಹ ಶ್ರೇಷ್ಠತೆಯಲ್ಲಿ ನಮ್ಮದೊಂದು ಪಾಲಿನ ಸಹಕಾರವಿರುತ್ತದೆ ಎನ್ನುವ ಅಭಿಮತ ಮೂರೂ ಊರಿನ ಗ್ರಾಮದ ರೈತರು ಒಕ್ಕೋರಲಿನ ನಿರ್ಧಾರಕ್ಕೆ ಬಂದಿದ್ದಾರೆ.