ಸೇಡಂ ಪುರಸಭೆ: ₹37 ಲಕ್ಷ ತೆರಿಗೆ ಸಂಗ್ರಹಿಸಿದ ಮಹಿಳೆಯರು

ಸೇಡಂ: ಪುರಸಭೆಗೆ ಬರಬೇಕಾದ ತೆರಿಗೆಯನ್ನು ಮಹಿಳಾ ಸ್ವ-ಸಹಾಯ ಸಂಘದ ಪದಾಧಿಕಾರಿಗಳು ಮನೆಗಳಿಗೆ ಭೇಟಿ ನೀಡಿ, ₹37 ಲಕ್ಷ ತೆರಿಗೆಯನ್ನು ಜನರಿಂದ ತೆರಿಗೆಯನ್ನು ಪುರಸಭೆಗೆ ಪಾವತಿಸುವಂತೆ ಮಾಡಿ ಗಮನ ಸೆಳೆದಿದ್ದಾರೆ.

ಸೇಡಂ ಪುರಸಭೆ ನೋಂದಾಯಿತ ಚಾಮುಂಡಿ ಸ್ವ-ಸಹಾಯ ಸಂಘದ ಪದಾಧಿಕಾರಿಗಳು ಕಳೆದ ನಾಲ್ಕು ತಿಂಗಳಲ್ಲಿ ಪುರಸಭೆಗೆ ಬರಬೇಕಾದ ಆಸ್ತಿ ಮತ್ತು ನೀರಿನ ತೆರಿಗೆಯನ್ನು ಸಂಗ್ರಹಿಸಿದ್ದಾರೆ. ಮಾರ್ಚ್-ಜೂನ್ ವರೆಗೆ ಜನರ ಮನವೊಲಿಸಿ ಸುಮಾರು ₹37 ಲಕ್ಷ ತೆರಿಗೆಯನ್ನು ಪಾವತಿಸುವಂತೆ ಮಾಡಿದ್ದಾರೆ.

‘ಪುರಸಭೆ ವ್ಯಾಪ್ತಿಯಡಿ ಸುಮಾರು 17ಸಾವಿರಕ್ಕೂ ಅಧಿಕ ಮನೆಗಳಿದ್ದು, ಕರವಸೂಲಿಗೆ ಎರಡು ಹುದ್ದೆಗಳ ಮಂಜೂರಾತಿಯಿದೆ. ಅದರಲ್ಲಿ ಒಂದು ಭರ್ತಿಯಿದ್ದು, ಇನ್ನೊಂದು ಖಾಲಿಯಿದೆ. ಕಚೇರಿ ಕೆಲಸದ ಒತ್ತಡದಲ್ಲಿ ತೆರಿಗೆ ಸಂಗ್ರಹ ಸಾಧ್ಯವಾಗದ ಕಾರಣ ಮಹಿಳಾ ಸಂಘದವರಿಗೆ ನೀಡುವ ವಿನೂತನ ನಿರ್ಧಾರವನ್ನು ಪುರಸಭೆ ಮುಖ್ಯಾಧಿಕಾರಿ ಶರಣಯ್ಯಸ್ವಾಮಿ ಅವರ ಮಾರ್ಗದರ್ಶನದ ಮೇರೆಗೆ ಮಾಡಲಾಗಿದೆ. ಅಂದಾಜು ₹2 ಕೋಟಿಗೂ ಅಧಿಕ ತೆರಿಗೆ ಹಣ ಬರಬೇಕಾಗಿದ್ದು, ಅದರಲ್ಲಿ ₹37 ಲಕ್ಷ ಸಂಗ್ರಹಿಸಿದ್ದಾರೆ’ ಎಂದು ಕಂದಾಯ ಅಧಿಕಾರಿ ಶಂಭುಲಿಂಗ ಕಣ್ಣಿ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ತೆರಿಗೆ ಸಂಗ್ರಹಕ್ಕೆ ಮಹಿಳಾ ಸಂಘದವರಿಗೆ ಸಭೆ ಕರೆದಾಗ ಸುಮಾರು 40ಕ್ಕೂ ಅಧಿಕ ಸಂಘದವರು ಪಾಲ್ಗೊಂಡಿದ್ದರು. ಕರವಸೂಲಿಯ ಕುರಿತು ಮಾಹಿತಿ ನೀಡಿದಾಗ ಎರಡು ಸಂಘದ ಪದಾಧಿಕಾರಿಗಳು ಆಸಕ್ತಿ ತೋರಿಸಿದ್ದು, ಚಾಮುಂಡಿ ಮಹಿಳಾ ಸ್ವ-ಸಹಾಯ ಸಂಘದ ವ್ಯವಹಾರ ಪರಿಶೀಲಿಸಿ, ಅವರು ನಮ್ಮ ನಿಯಮಗಳಿಗೆ ಒಪ್ಪಿದ್ದರಿಂದ ಅವರಿಗೆ ಸಂಗ್ರಹಿಸುವ ಜವಾಬ್ದಾರಿ ನೀಡಲಾಯಿತು. ವಿವಿಧ ಬಡಾವಣೆಗಳಿಂದ ಬರಬೇಕಾದ ಬಾಕಿ ತೆರಿಗೆ ಮಾಹಿತಿಯನ್ನು ಅವರಿಗೆ ನೀಡಲಾಗಿದೆ’ ಎಂದು ತಿಳಿಸಿದರು.

ಸಮುದಾಯ ಸಂಘಟನಾಧಿಕಾರಿ ಗ್ವಾಲೇಶ ಹೊನ್ನಳ್ಳಿ, ‘ಸಂಘದ ಮಹಿಳಾ ಪದಾಧಿಕಾರಿಗಳ ಕೆಲಸಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ಸಂಗ್ರಹಿಸಿದ ಮೊತ್ತ ₹37ಲಕ್ಷದಲ್ಲಿ ಶೇ 5ರಷ್ಟು ವಿವಿಧ ಉಪಕರ ಕಡಿತಗೊಳಿಸಿ ₹1.45 ಲಕ್ಷ ಪ್ರೋತ್ಸಾಹಧನವನ್ನು ಚಾಮುಂಡಿ ಸಂಘದ ಖಾತೆಗೆ ಜಮಾ ಮಾಡಲಾಗಿದೆ’ ಎಂದು ಮಾಹಿತಿ ನೀಡಿದರು.