ಕನಕಗಿರಿ | 22 ಜನ ಸ್ವಯಂ ಕ್ವಾರೆಂಟೈನ್

ಕನಕಗಿರಿ: ಕೋವಿಡ್- 19 ದೃಢಪಟ್ಟ ತಾಲ್ಲೂಕಿನ ನೀರಲೂಟಿ ಗ್ರಾಮದ ಯುವಕನೊಬ್ಬನನ್ನು ಪೋಕ್ಸೊ ಅಡಿ ಬಂಧಿಸಿದ ಹಿನ್ನೆಲೆಯಲ್ಲಿ ಇಲ್ಲಿನ ಪೊಲೀಸ್ ಠಾಣೆಯ ಪಿಎಸ್ಐ ಎಸ್.ಎಚ್.ಪ್ರಶಾಂತ ಸೇರಿದಂತೆ 22 ಜನರು ಸ್ವಯಂ ಕ್ವಾರಂಟೈನ್‌ಗೆ ಒಳಗಾಗಿದ್ದಾರೆ.

ಪಿಎಸ್ಐ, ಸ್ವಚ್ಛತಾ ಕೆಲಸಗಾರ ಸೇರಿ ಒಟ್ಟು 22 ಜನ ಪೊಲೀಸರಿಗೆ ಕೊರೊನಾ ಸೋಂಕಿನ ಲಕ್ಷಣಗಳು ಇರಲಿಲ್ಲ. ಮುನ್ನೆಚ್ಚರಿಕೆ ಕ್ರಮವಾಗಿ ಮೇಲಧಿಕಾರಿಗಳ ನಿರ್ದೇಶನದ ಮೇರೆಗೆ ಇಲ್ಲಿನ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ ಭಾನುವಾರದಿಂದ ಕ್ವಾರಂಟೈನ್ ಒಳಗಾಗಿದ್ದಾರೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ಎಲ್ಲರ ಗಂಟಲು ದ್ರವ ಪರೀಕ್ಷಿಸಿದ್ದು ವರದಿ ನೆಗಟಿವ್ ಬಂದಿದೆ. ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪಟ್ಟಣ ಪಂಚಾಯಿತಿ ಸಿಬ್ಬಂದಿ ಭಾನುವಾರ ಪೊಲೀಸ್ ಠಾಣೆಯ ಕಟ್ಟಡ, ಆವರಣ, ಅಧಿಕಾರಿ ಕೊಠಡಿ ಸೇರಿ ಆವರಣದಲ್ಲಿ ಸೋಂಕು ನಿವಾರಣ ದ್ರಾವಣ ಸಿಂಪಡಿಸಿದ್ದಾರೆ.