ಗಂಗಾವತಿ: ನಡುಗಡ್ಡೆಯಲ್ಲಿ ಸಿಲುಕಿದ್ದವರ ರಕ್ಷಣೆ

ಗಂಗಾವತಿ (ಕೊಪ್ಪಳ): ಗಂಗಾವತಿ ತಾಲ್ಲೂಕಿನ ದೇವಘಾಟ್ ಸಮೀಪದ ನಡುಗಡ್ಡೆಯಲ್ಲಿ ಗುರುವಾರ ಸಿಲುಕಿದ್ದ ಇಬ್ಬರು ಕುರಿಗಾರರನ್ನು ಶುಕ್ರವಾರ ಸುರಕ್ಷಿತ ಪ್ರದೇಶಕ್ಕೆ ಕರೆದುಕೊಂಡು ಬರಲಾಗಿದೆ.

ಪೊಲೀಸರು ಹಾಗೂ ಅಗ್ನಿಶಾಮಕ ದಳದ ಸಿಬ್ಬಂದಿ ಗುರುವಾರ ಸಂಜೆಯಿಂದ ಕಾರ್ಯಾಚರಣೆ ನಡೆಸಿ ಶುಕ್ರವಾರ ಬೆಳಿಗ್ಗೆ ಅವರನ್ನು ಕರೆ ತಂದರು. ಜೊತೆಗೆ 120 ಮೇಕೆಗಳು ಎರಡು ನಾಯಿ ಮತ್ತು ಒಂದು ಹಸು ರಕ್ಷಣೆ ಮಾಡಲಾಗಿದೆ.

ದೇವಘಾಟ್‌ನಲ್ಲಿ ಕುರಿ ಮೇಯಿಸಲು ಹೋಗಿದ್ದ ಗಂಗಾವತಿ ತಾಲ್ಲೂಕಿನ ವಿರುಪಾಪುರ ಗ್ರಾಮದ ಹನುಮಂತಪ್ಪ, ಹನುಮೇಶ ನಡುಗಡ್ಡೆಯಲ್ಲಿ ಸಿಲುಕಿದ್ದರು. ನೀರು ಕಡಿಮೆಯಿದ್ದಾಗ ಹತ್ತು ದಿನಗಳ ಹಿಂದೆ ಈ ಕುರಿಗಾರರು ದೇವಘಾಟ್‌ಗೆ ಹೋಗಿದ್ದರು. ಜಿಲ್ಲಾ ಅಗ್ನಿಶಾಮಕ ದಳದ ಠಾಣಾಧಿಕಾರಿ ಜಿ. ಕೃಷ್ಣೋಜಿ ಕಾರ್ಯಾಚರಣೆ ನೇತೃತ್ವ ವಹಿಸಿದ್ದರು.