ಆದಿವಾಸಿ ಜನರ ಆರ್ಥಿಕತೆಗೆ ನರೇಗಾ ಪೂರಕ: ಪುಷ್ಪವತಿ

ಹುಣಸೂರು: ಗಿರಿಜನರು  ವಲಸೆ ಹೋಗದಂತೆ ತಡೆಯಲು ಹಾಗೂ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲೇ ಆರ್ಥಿಕ ಶಕ್ತಿ ಹೊಂದಿ ಬದುಕು ಕಟ್ಟಿಕೊಳ್ಳಲು ಮಹಾತ್ಮಗಾಂಧಿ ನರೇಗಾ ಯೋಜನೆ ಕಾಮಗಾರಿ ಸಹಕಾರಿ ಆಗಿದೆ ಎಂದು ತಾಲ್ಲೂಕು ಐ.ಇ.ಸಿ. ಸಂಯೋಜನಾಧಿಕಾರಿ ಪುಷ್ಪವತಿ ಹೇಳಿದರು.

 ಕಡೇಮನುಗನಹಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹೆಬ್ಬಳ್ಳ ಹಾಡಿಯಲ್ಲಿ ಆಯೋಜಿಸಿದ್ದ ದುಡಿಯೋಣ ಬಾ, ಸ್ತ್ರೀ ಚೇತನ ಅಭಿಯಾನ ಹಾಗೂ ರೋಜ್‌ಗಾರ್ ದಿವಸ್ ಆಚರಣೆಯಲ್ಲಿ ಹಾಡಿಯವರಿಗೆ ಸರ್ಕಾರಿ ಯೋಜನೆ ಕುರಿತು ಅವರು ಜಾಗೃತಿ ಮೂಡಿಸಿದರು. ಹಾಡಿಯಯವರು ಕೊಡಗಿನ ಕಾಫಿ ತೋಟಗಳಲ್ಲಿ ಕೂಲಿ ಕಾರ್ಮಿಕರಾಗಿ ದುಡಿಯುವ ಬದಲಿಗೆ ನಿಮ್ಮ ಪಂಚಾಯಿತಿ ವ್ಯಾಪ್ತಿಯಲ್ಲಿ   ಉದ್ಯೋಗ ಖಾತರಿ ಯೋಜನೆಯಲ್ಲಿ ಅಭಿವೃದ್ಧಿ ಕಾಮಗಾರಿಗೆ ಕೈ ಜೋಡಿಸಿದರೆ ನಿಮಗೆ ಆರ್ಥಿಕ ಶಕ್ತಿ ಸಿಗಲಿದೆ ಎಂದರು.

 ನರೇಗಾ ಯೋಜನೆಯಲ್ಲಿ ವೈಯಕ್ತಿಕ ಯೋಜನೆಗಳಿದ್ದು  ಹಾಡಿಯ ನಾಗರಿಕರು ಸಮರ್ಪಕವಾಗಿ ಬಳಸಿದರೆ ಸರ್ಕಾರ ನಿಮಗೆ ಹಣ ನೀಡಲಿದೆ ಎಂದರು.

ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ಷಡಕ್ಷರಿ ಮಾತನಾಡಿ, ಹಾಡಿಯ 145 ಕುಟುಂಬಗಳಿಗೆ ಮನೆ ಮಂಜೂರಾಗಿದ್ದು,  ನರೇಗಾ ಯೋಜನೆ ಅಡಿಯಲ್ಲಿ ನಿರ್ಮಿಸಿಕೊಳ್ಳುವ ಅವಕಾಶವಿದೆ. ಗಿರಿಜನರು ಈವರೆಗೂ ಮನೆ ನಿರ್ಮಿಸಿಲ್ಲ. ಈಗಲಾದರೂ ಮನೆ ನಿರ್ಮಿಸಿ ಎಂದು ಮನವಿ ಮಾಡಿದರು.

ಹೆಬ್ಬಳ್ಳ ಗ್ರಾಮ ಪಂಚಾಯಿತಿ ಸದಸ್ಯೆ ಗೌರಮ್ಮ ಟಿ, ರಾಧಾ. ಹಾಡಿ ಅಧ್ಯಕ್ಷ ಚಂದ್ರು, ಮುಖಂಡ ನಾಗೇಶ್, ಅಯ್ಯನಕೆರೆ ಹಾಡಿ ಶಿವಣ್ಣ, ಕಾಂತರಾಜು , ಹಾಡಿಯ ನಿವಾಸಿಗರು ಇದ್ದರು.