ಬದುಕು ನೀಡಿದ ಸಮಗ್ರ ಕೃಷಿ ಪದ್ಧತಿ

ಶಕ್ತಿನಗರ: ಡಿ.ಯದ್ಲಾಪುರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗಂಜಳ್ಳಿ ಗ್ರಾಮದ ರೈತ ಮಾರ್ತೇಂಡಪ್ಪ ಅವರು, ಕೃಷಿ ಜತೆಗೆ ಮೀನುಗಾರಿಕೆ ಮಾಡುವ ಮೂಲಕ ಸಮಗ್ರ ಕೃಷಿ ಮಾಡುತ್ತಾ ಇತರ ರೈತರಿಗೆ ಮಾದರಿಯಾಗಿದ್ದಾರೆ.

ಅವರಿಗೆ ಒಟ್ಟು 33 ಎಕರೆ ಜಮೀನಿದ್ದು, ಅದರಲ್ಲಿ 5 ಎಕರೆಯಲ್ಲಿ ಹತ್ತಿ, 15 ಎಕರೆಯಲ್ಲಿ ಭತ್ತ, 6 ಎಕರೆಯಲ್ಲಿ ಮೋಸಂಬಿ, 2 ಎಕರೆಯಲ್ಲಿ ತೊಗರಿ, 1 ಎಕರೆಯಲ್ಲಿ ಮೆಣಸಿನಕಾಯಿ, 3 ಎಕರೆಯಲ್ಲಿ ಮಾವು ಬೆಳೆಯಲಾಗಿದೆ.
ಅವರು ಬೆಳೆಗಳಿಗೆ ನೀರುಣಿಸಲು ತೋಟಗಾರಿಕೆ ಇಲಾಖೆಯಿಂದ 150 ಮತ್ತು 200 ಫೀಟ್ ತೆಗೆಸಿದ್ದ 1 ಎಕರೆಯ ಬೃಹತ್‌ ಕೃಷಿ ಹೊಂಡದಲ್ಲೇ ಉಪ ಕಸುಬಾಗಿ ಮೀನಿನ ಕೃಷಿ ಮಾಡುತ್ತಿದ್ದಾರೆ.

₹ 1 ಲಕ್ಷ ವೆಚ್ಚದಲ್ಲಿ ಎರಡು ಬೋರವೆಲ್ ಹಾಕಿಸಿಕೊಂಡಿದ್ದಾರೆ. ಆ ಬೋರವೆಲ್‌ಗಳ ನೀರನ್ನು ಕೃಷಿ ಹೊಂಡಕ್ಕೆ ತುಂಬಿಸಿಕೊಳ್ಳುತ್ತಿದ್ದರು. ಇದೇ ಹೊಂಡದ ನೀರನ್ನು ಎಲ್ಲಾ ಬೆಳೆಗಳಿಗೂ ಪೂರೈಸುತ್ತಿದ್ದಾರೆ. ₹ 8 ಲಕ್ಷ ಖರ್ಚು ಆಗುತ್ತಿದ್ದು ಅದರಲ್ಲಿ ₹ 5 ಲಕ್ಷಕ್ಕೂ ಅಧಿಕ ಆದಾಯ ಸಿಗುತ್ತದೆ ಎನ್ನುತ್ತಾರೆ ರೈತ ಮಾರ್ತೇಂಡಪ್ಪ.

ಕೃಷಿ ಇಲಾಖೆಯಿಂದ ಕೊಯ್ಲು ಕಟಾವು ಮಾಡುವ ಯಂತ್ರ , ಸಿಂಪಿಕಲರ್, ತಡಪಾಲ್‌ಗಳನ್ನು ಪಡೆದುಕೊಂಡಿದ್ದಾರೆ. ಲಾಕ್‌ಡೌನ್‌ ಸಮಯದಲ್ಲಿ ಕೂಲಿಕಾರರು ಸಿಗದೆ ಪರಿಣಾಮ, ಸಂಕಷ್ಟಕ್ಕೀಡಾಗಿತ್ತು. ಮನೆಯಲ್ಲಿ 25 ಜನ ಜೀವನ ನಡೆಸುವುದು ಕಷ್ಟಕರವಾಗಿತ್ತು. ಬದುಕಿಗೆ ಕೈ ಹಿಡಿದಿದ್ದು ಸಮಗ್ರ ಕೃಷಿ. ಇದರಲ್ಲಿ ಎಲ್ಲರ ಜೀವನ ನಡೆಯುತ್ತಿದೆ ಎಂದು ಹೇಳಿದರು.

ಸಿಂಡಿಕೇಟ್ ಬ್ಯಾಂಕ್‌ನಲ್ಲಿ ₹ 27 ಲಕ್ಷ ಸಾಲ ಮಾಡಿ ಸಮಗ್ರ ಕೃಷಿ ಮಾಡಲಾಗಿದೆ. ಕೃಷಿ ಜತೆಗೆ ಮೀನು ಸಾಕಣಿಕೆ ಮಾಡುತ್ತಿರುವ ರೈತರಿಗೆ
ಅಗತ್ಯ ಮಾರ್ಗದರ್ಶನ ಮತ್ತು ಪ್ರೋತ್ಸಾಹ ನೀಡಲು ಸಂಬಂಧಪಟ್ಟ ಅಧಿಕಾರಿಗಳು ಗಮನಹರಿಸಬೇಕಿದೆ ಎಂದು ಗಂಜಳ್ಳಿ ರೈತ ಸುರೇಶ ಹೇಳಿದರು.