ರಾಯಚೂರು | ಶಿಕ್ಷಕರ ಉದ್ಯೋಗ ಮೇಳ ಮೇ17ಕ್ಕೆ

ರಾಯಚೂರು: ‘ರುಪ್ಸಾ ಕರ್ನಾಟಕ ವತಿಯಿಂದ ಮೇ 17 ರಂದು ಬೆಳಿಗ್ಗೆ 10 ಗಂಟೆಗೆ ನಗರದ ಸ್ಟೇಷನ್ ರಸ್ತೆಯ ಸನ್ ರೈಸ್ ಪದವಿ ಮಹಾವಿದ್ಯಾಲಯದಲ್ಲಿ ಶಿಕ್ಷಕರಿಗಾಗಿ ಉದ್ಯೋಗ ಮೇಳ ಆಯೋಜಿಸಲಾಗಿದೆ’ ಎಂದು ರುಪ್ಸ್ ರಾಜ್ಯ ಘಟಕದ ಸಂಚಾಲಕ ಸಂಗಮೇಶ ಮಂಗಾನವರ ತಿಳಿಸಿದರು.

‘ಎನ್‌ಟಿಸಿ, ಡಿಇಡಿ, ಬಿಇಡಿ, ಬಿಎಸ್‌ಸಿ ಹಾಗೂ ಬಿಇಡಿ ವಿದ್ಯಾರ್ಹತೆ ಹೊಂದಿದ ಅಭ್ಯರ್ಥಿಗಳು ಉದ್ಯೋಗ ಮೇಳದಲ್ಲಿ ಭಾಗವಹಿಸಬಹುದು’ ಎಂದು ಮಂಗಳವಾರ ಮಾಧ್ಯಮಗೋಷ್ಠಿಯಲ್ಲಿ ಹೇಳಿದರು.

‘ಮೇಳದಲ್ಲಿ 30 ಶಾಲಾ ಆಡಳಿತ ಮಂಡಳಿಗಳು ಪಾಲ್ಗೊಳ್ಳಲಿವೆ. ಅಭ್ಯರ್ಥಿಗಳಿಗೆ ಉಚಿತ ಪ್ರವೇಶವಿದೆ. ಜಿಲ್ಲೆಯ ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು, ಇದರ ಸದುಪಯೋಗ ಪಡೆದುಕೊಳ್ಳಬೇಕು’ ಎಂದರು.

‘ರಾಜ್ಯದಲ್ಲಿ ಅನುದಾನರಹಿತ ಖಾಸಗಿ ಶಾಲೆಗಳಿಂದ ಗುಣಮಟ್ಟದ ಶಿಕ್ಷಣ ದೊರೆಯುತ್ತಿದೆ. ಖಾಸಗಿ ಶಿಕ್ಷಕರು ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ಉದ್ಯೋಗ ಮೇಳ ಏರ್ಪಡಿಸಲಾಗಿದೆ’ ಎಂದು ತಿಳಿಸಿದರು.

ಮಂಜುಳಾ, ಜಂಗ್ಲಪ್ಪ ಗೌಡ,  ನರಸಿಂಗ್ ಸಾಗರ, ಪ್ರಶಾಂತ, ಸತ್ಯನಾರಾಯಣ, ಸೈಯದ್ ಮುಸ್ತಫಾ ಉಪಸ್ಥಿತರಿದ್ದರು.