ತುಮಕೂರು | ತರಕಾರಿ ಬೆಲೆಯಲ್ಲಿ ಏರಿಳಿತ: ಸೊಪ್ಪು, ಮೀನು ಗಗನಮುಖಿ

ತುಮಕೂರು: ಸೊಪ್ಪಿನ ಬೆಲೆ ಒಮ್ಮೆಲೆ ದುಪ್ಪಟ್ಟಾಗಿದ್ದು, ಮೀನು ಗಗನಮುಖಿಯಾಗಿದೆ. ತರಕಾರಿ ದರದಲ್ಲಿ ಏರಿಳಿತ ಕಂಡು ಬಂದಿದ್ದು, ಗಸಗಸೆ, ಏಲಕ್ಕಿ ದುಬಾರಿಯಾಗಿದೆ.

ಸಾಕಷ್ಟು ದುಬಾರಿಯಾಗಿದ್ದ ಬೀನ್ ಬೆಲೆ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಿದ್ದು, ಕ್ಯಾರೇಟ್, ಬೀಟ್ರೂಟ್, ಕ್ಯಾಪ್ಸಿಕಂ ಸಹ ಇಳಿಕೆಯಾಗಿದೆ. ಆದರೆ ಆಲೂಗಡ್ಡೆ, ಮೂಲಂಗಿ, ಬೆಂಡೆಕಾಯಿ, ಎಲೆಕೋಸು ಏರಿಕೆಯಾಗಿದೆ. ಶುಂಠಿ ಏರಿಕೆಯತ್ತ ಸಾಗಿದ್ದರೆ, ಉಳಿದ ತರಕಾರಿಗಳು ಯಥಾಸ್ಥಿತಿ ಕಾಯ್ದುಕೊಂಡಿವೆ.

ಸೊಪ್ಪು ಬಲು ದುಬಾರಿ: ಕಳೆದ ಎರಡು ವಾರಗಳ ಅಂತರದಲ್ಲಿ ಸೊಪ್ಪುಗಳ ಬೆಲೆ ದುಪ್ಪಟ್ಟಾಗಿದೆ. ಹಿಂದಿನ ವಾರಕ್ಕೆ ಹೋಲಿಸಿದರೆ ಮೆಂತ್ಯ ಸೊಪ್ಪು ಎರಡು ಪಟ್ಟು ಹೆಚ್ಚಳವಾಗಿದೆ. ಬೇಸಿಗೆ ಸಮಯದಲ್ಲಿ ಬೆಳೆ ಹಾಳಾಗಿದ್ದು, ಇತ್ತೀಚೆಗೆ ಬಿದ್ದ ಮಳೆಗೂ ಬೆಳೆ ಹಾಳಾಗಿರುವುದು ಬೆಲೆ ಹೆಚ್ಚಳಕ್ಕೆ ಕಾರಣವಾಗಿದೆ.

ಕೊತ್ತಂಬರಿ ಸೊಪ್ಪು ಕೆ.ಜಿ ₹50–60, ಸಬ್ಬಕ್ಕಿ ಸೊಪ್ಪು ಕೆ.ಜಿ ₹70–80, ಮೆಂತ್ಯ ಸೊಪ್ಪು ಕೆ.ಜಿ ₹70–80, ಪಾಲಕ್ ಸೊಪ್ಪು (ಕಟ್ಟು) ₹60ಕ್ಕೆ ಏರಿಕೆಯಾಗಿದೆ.

ಹಣ್ಣು ಯಥಾಸ್ಥಿತಿ: ಹಣ್ಣುಗಳ ಧಾರಣೆ ಯಥಾಸ್ಥಿತಿಯಲ್ಲಿ ಮುಂದುವರಿದಿದೆ. ಮೂಸಂಬಿ, ಕಲ್ಲಂಗಡಿ ಹಣ್ಣು ಅಲ್ಪ ತಗ್ಗಿದ್ದರೆ, ಮಾವಿನ ಹಣ್ಣು ಇಳಿಕೆಯತ್ತ ಮುಖಮಾಡಿದೆ. ರಫ್ತು ಪ್ರಮಾಣ ಇದೇ ರೀತಿ ಮುಂದುವರಿದರೆ ಮಾವಿನ ಹಣ್ಣಿನ ಬೆಲೆ ಮತ್ತಷ್ಟು ಕಡಿಮೆಯಾಗಬಹುದು ಎಂದು ಹೇಳಲಾಗುತ್ತಿದೆ.

ಅಡುಗೆ ಎಣ್ಣೆ: ಅಡುಗೆ ಎಣ್ಣೆಯ ದರದಲ್ಲಿ ಕೊಂಚ ಇಳಿಕೆಯಾಗಿದೆ. ಗೋಲ್ಡ್‌ವಿನ್ನರ್ ಕೆ.ಜಿ ₹148–150, ಪಾಮಾಯಿಲ್ ಕೆ.ಜಿ ₹118–119, ಕಡಲೆಕಾಯಿ ಎಣ್ಣೆ ಕೆ.ಜಿ ₹158–160ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಸಿಗುತ್ತಿದೆ.

ಬೇಳೆ– ಧಾನ್ಯ: ಬೇಳೆ ಕಾಳುಗಳು, ಧಾನ್ಯಗಳ ಧಾರಣೆಯಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಉದ್ದಿನಬೇಳೆ, ಕಡಲೆಬೇಳೆ, ಹುರಿಗಡಲೆ, ಗೋಧಿ ತುಸು ಏರಿಕೆಯಾಗಿದೆ. ಉಳಿದಂತೆ ಯಥಾಸ್ಥಿತಿ ಮುಂದುವರಿದಿದೆ.

ಗಸಗಸೆ ದುಬಾರಿ: ಮಸಾಲೆ ಪದಾರ್ಥಗಳಲ್ಲಿ ಗಸಗಸೆ ಧಾರಣೆ ಮತ್ತಷ್ಟು ಏರಿಕೆಯಾಗಿದ್ದು, ಒಮ್ಮೆಲೆ ಕೆ.ಜಿಗೆ ₹200 ಜಿಗಿತ ಕಂಡಿದೆ. ಏಲಕ್ಕಿ ಸಹ ಇದೇ ದಾರಿಯಲ್ಲಿ ಸಾಗಿದೆ. ಮೆಣಸಿನಕಾಯಿ ದರ ತುಸು ಹೆಚ್ಚಳವಾಗಿದೆ.

ಧನ್ಯ ಕೆ.ಜಿ ₹110–120, ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿ ₹220–230, ಗೌರಿಬಿದನೂರು ಖಾರದ ಮೆಣಸಿನಕಾಯಿ ಕೆ.ಜಿ ₹160–170, ಹುಣಸೆಹಣ್ಣು ₹160–180, ಬೆಲ್ಲ ಕೆ.ಜಿ ₹55–60, ಕಾಳುಮೆಣಸು ಕೆ.ಜಿ ₹750–780, ಜೀರಿಗೆ ಕೆ.ಜಿ ₹280–290, ಚಕ್ಕೆ ಕೆ.ಜಿ ₹260–270, ಲವಂಗ ಕೆ.ಜಿ ₹820–860, ಗುಣಮಟ್ಟದ ಗಸಗಸೆ ಕೆ.ಜಿ ₹1,750–1,800, ಏಲಕ್ಕಿ ಕೆ.ಜಿ ₹3,000–3,200, ಬಾದಾಮಿ ಕೆ.ಜಿ ₹820–840, ಗೋಡಂಬಿ ಕೆ.ಜಿ ₹800–850, ಒಣ ದ್ರಾಕ್ಷಿ ಕೆ.ಜಿ ₹340–350ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

ಕೋಳಿ ಹೆಚ್ಚಳ: ಕೋಳಿ ಮಾಂಸದ ಬೆಲೆಯೂ ಏರಿಕೆಯಾಗಿದ್ದು, ಬ್ರಾಯ್ಲರ್ ಕೋಳಿ ಕೆ.ಜಿ ₹130, ರೆಡಿ ಚಿಕನ್ ಕೆ.ಜಿ ₹220, ಸ್ಕಿನ್‌ಲೆಸ್ ಕೆ.ಜಿ ₹240, ಮೊಟ್ಟೆಕೋಳಿ (ಫಾರಂ) ಕೆ.ಜಿ ₹135ಕ್ಕೆ ಸಿಗುತ್ತಿದೆ.

ಮೀನು ಗಗನಮುಖಿ: ಮೀನಿನ ಧಾರಣೆ ಗಗನಮುಖಿಯಾಗಿದ್ದು, ಸಿಗಡಿ, ಏಡಿಯೂ ಅಷ್ಟೇ ದುಬಾರಿಯಾಗಿದೆ. ವಿವಿಧ ತಳಿಯ ಮೀನು ಮಾರುಕಟ್ಟೆಗೆ ಬರುವುದು ಕಡಿಮೆಯಾಗಿದೆ. ಬಂಗುಡೆ ಮೀನು ಎರಡು ವಾರದಲ್ಲಿ ಕೆ.ಜಿಗೆ 200, ಬೂತಾಯಿ ದುಪ್ಪಟ್ಟು ಹೆಚ್ಚಳವಾಗಿದೆ. ಬಂಗುಡೆ ಕೆ.ಜಿ ₹540, ಬೂತಾಯಿ ಕೆ.ಜಿ ₹430, ಕಪ್ಪುಮಾಂಜಿ ಕೆ.ಜಿ ₹1,000, ಸೀಗಡಿ ಕೆ.ಜಿ ₹510–810, ಏಡಿ ಕೆ.ಜಿ ₹610ಕ್ಕೆ ನಗರದ ಮತ್ಸ್ಯದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.