BSNL: ಪ್ರಧಾನಿ ಕಚೇರಿಗೆ ದೂರು ನೀಡಿದ 33 ಗಂಟೆಯಲ್ಲಿ ದೂರವಾಣಿ ದುರಸ್ತಿ

ಶಿರಸಿ: ಸ್ಥಿರ ದೂರವಾಣಿ ದುರಸ್ತಿಗೆ ಸಂಬಂಧಿಸಿದಂತೆ ಆಯುರ್ವೇದ ವೈದ್ಯ ಡಾ.ರವಿಕಿರಣ ಪಟವರ್ಧನ ಅವರು ಪ್ರಧಾನಿ ಕಚೇರಿಗೆ ದೂರು ನೀಡಿದ 33 ಗಂಟೆಯೊಳಗೆ ದುರಸ್ತಿ ಕಾರ್ಯ ನೆರವೇರಿದೆ. ಈ ಮೊದಲು, ದುರಸ್ತಿಗೆ ಬಿಎಸ್‌ಎನ್‌ಎಲ್‌ ನಿರಾಕರಿಸಿತ್ತು.

‘ನನ್ನ ಆಸ್ಪತ್ರೆಯ ಸ್ಥಿರ ದೂರವಾಣಿ ದುರಸ್ತಿಗೆ ಕೋರಿ ಬಿಎಸ್‌ಎನ್‌ಎಲ್ ಕಚೇರಿಗೆ ದೂರು ಸಲ್ಲಿಸಿದ್ದೆ. ಆದರೆ, ಅಲ್ಲಿನ ಸಿಬ್ಬಂದಿ ಬೇರೆ ಬೇರೆ ಕಾರಣಗಳನ್ನು ಹೇಳಿ, ದುರಸ್ತಿಗೆ ನಿರಾಕರಿಸಿದ್ದರು. ಈ ಎಲ್ಲಾ ಮಾಹಿತಿಯನ್ನು ಕ್ರೋಢೀಕರಿಸಿ ಪ್ರಧಾನಿ ಕಚೇರಿಗೆ ಇ–ಮೇಲ್ ಮಾಡಿದ್ದೆ. ದುರಸ್ತಿಗೆ ಕೋರಿದ್ದೆ. 33 ಗಂಟೆಯೊಳಗೆ ಸ್ಥಿರ ದೂರವಾಣಿ ದುರಸ್ತಿಗೊಂಡು, ಕಾರ್ಯಾರಂಭ ಮಾಡಿದೆ’ ಎಂದು ಡಾ. ರವಿಕಿರಣ ‘ಪ್ರಜಾವಾಣಿ’ಗೆ ತಿಳಿಸಿದರು.