ದೂದ್‍ಸಾಗರ: ರೈಲು ಹಳಿ ಮೇಲೆ ಭೂಕುಸಿತ

ಕಾರವಾರ: ಪಶ್ಚಿಮ ಘಟ್ಟ ಭಾಗದ ಅಲ್ಲಲ್ಲಿ ವ್ಯಾಪಕವಾಗಿ ಮಳೆಯಾಗುತ್ತಿದ್ದು, ಕರ್ನಾಟಕ-ಗೋವಾ ಗಡಿಭಾಗದಲ್ಲಿರುವ ದೂದ್‍ಸಾಗರ ಜಲಪಾತದ ಸಮೀಪ ರೈಲ್ವೆ ಸುರಂಗ ಮಾರ್ಗದ ಎದುರು ಹಳಿಗಳ ಮೇಲೆ ಸೋಮವಾರ ನಸುಕಿನ ಜಾವ ಭೂಕುಸಿತ ಸಂಭವಿಸಿದೆ.

ಬೃಹತ್ ಗಾತ್ರದ ಕಲ್ಲುಗಳು, ಮಣ್ಣಿನ ರಾಶಿ ಬಿದ್ದು ಹಳಿಗಳನ್ನು ಮುಚ್ಚಿ ಹಾಕಿತ್ತು. ನೈರುತ್ಯ ರೈಲ್ವೆ ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿ ತೆರವು ಕಾರ್ಯ ನಡೆಸಿದರು.

‘ರೈಲು ಸಂಚಾರಕ್ಕೆ ಶೀಘ್ರ ಅನುವು ಮಾಡಿಕೊಟ್ಟಿರುವುದರಿಂದ ಸಂಚಾರ ವ್ಯತ್ಯಯ ಆಗಿಲ್ಲ’ ಎಂದು ರೈಲ್ವೆ ಪೊಲೀಸ್ ಸಿಬ್ಬಂದಿಯೊಬ್ಬರು ತಿಳಿಸಿದ್ದಾರೆ‌.‌