ಅನುದಾನ ಅನ್ಯ ಬಳಕೆಗೆ ಮೀಸಲಿಟ್ಟರೆ ಹೋರಾಟ: ರೂಪಾಲಿ ನಾಯ್ಕ

ಕಾರವಾರ: ‘ಮಾಲಾದೇವಿ ಕ್ರೀಡಾಂಗಣದ ಅಭಿವೃದ್ಧಿಗೆ ಮೀಸಲಿರಿಸಿದ ಹಣ ಕ್ರೀಡಾಂಗಣಕ್ಕೆ ಬಳಕೆಯಾಗಬೇಕು. ಹಣವನ್ನು ಬೇರೆಡೆ ವರ್ಗಾವಣೆ ಮಾಡಿರುವುದು ಸರಿಯಲ್ಲ’ ಎಂದು ಬಿಜೆಪಿ ರಾಜ್ಯ ಘಟಕದ ಉಪಾಧ್ಯಕ್ಷೆ ರೂಪಾಲಿ ನಾಯ್ಕ ಹೇಳಿದರು.

ಇಲ್ಲಿನ ಮಾಲಾದೇವಿ ಮೈದಾನದಲ್ಲಿ, ಮಾಲಾದೇವಿ ಸ್ಪೋರ್ಟ್ಸ್‌ ಕ್ಲಬ್‌ ವತಿಯಿಂದ ಸಂಘಟಿಸಿದ್ದ ಕಾರವಾರ ನಗರ ವಾರ್ಡ್‌ ಮತ್ತು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ತಂಡಗಳ ನಡುವಿನ 8 ದಿನಗಳ ಕ್ರಿಕೆಟ್ ಪಂದ್ಯಾವಳಿ ಉದ್ಘಾಟಿಸಿ ಅವರು ಮಾತನಾಡಿದರು.

‘ಮೈದಾನದ ಅಭಿವೃದ್ಧಿಗೆ ಶಾಸಕಿಯಾಗಿದ್ದ ಅವಧಿಯಲ್ಲಿ ₹8 ಕೋಟಿ ಮಂಜೂರು ಮಾಡಿಸಿದ್ದೆ. ಕಾಮಗಾರಿ ಆರಂಭವಾಗಿದ್ದು, ಈಗ ನಿಧಾನಗತಿಯಲ್ಲಿ ಸಾಗುತ್ತಿದೆ. ಇಲ್ಲಿನ ಅಭಿವೃದ್ಧಿ ಕಾಮಗಾರಿಗಳಿಗೆ ಹಣ ಇಲ್ಲ ಎಂದು ಸುಳ್ಳು ಮಾತುಗಳನ್ನು ಹೇಳುತ್ತಿದ್ದಾರೆ. ಅನುದಾನವನ್ನು ಬೇರೆ ಉದ್ದೇಶಕ್ಕೆ ವರ್ಗಾವಣೆ ಮಾಡಲಾಗಿದೆ ಎಂಬ ಮಾಹಿತಿ ಇದೆ. ಅದು ನಿಜವೇ ಆದರೆ ಹೋರಾಟ ನಡೆಸಲಿದ್ದೇನೆ’ ಎಂದರು.

ನಗರಸಭೆ ಅಧ್ಯಕ್ಷ ರವಿರಾಜ್‌ ಅಂಕೋಲೆಕರ್‌, ಸದಸ್ಯ ಪ್ರೇಮಾನಂದ ಗುನಗಾ, ಪರ್ಬತ್‌ ನಾಯ್ಕ, ಅಮಿತ್‌ ಕಾಮತ್‌, ರತ್ನಾಕರ್ ನಾಯ್ಕ, ಗಿರೀಶ್‌ ನಾಯ್ಕ, ಅರುಣ ಗುನಗಿ, ಮುರಳೀಧರ ನಾಯ್ಕ, ಡೊಮಿನಿಕ್‌ ಡಯಾಸ್‌, ಪ್ರಸನ್ನ ಕಾಮತ್‌ ಇದ್ದರು.