ಗೋಕರ್ಣ | ಅಪಘಾತ: ಮಹಿಳೆ ಸಾವು

ಗೋಕರ್ಣ: ಸಮೀಪದ ಹನೇಹಳ್ಳಿ ಘಟಗಿಯ ಹತ್ತಿರ ಭಾನುವಾರ ಬೈಕ್ ಅಪಘಾತವಾಗಿ, ಬೈಕ್‌ನ ಹಿಂಬದಿಯಲ್ಲಿ ಕುಳಿತ ಮಹಿಳೆ ಸ್ಥಳದಲ್ಲಿಯೇ ಮೃತಪಟ್ಟಿದ್ದಾರೆ.

ಮೃತಪಟ್ಟ ಮಹಿಳೆಯನ್ನು ತಾರಮಕ್ಕಿಯ ಲಲಿತಾ ಹುಲಿಯಪ್ಪ ಗೌಡ (33) ಎಂದು ಗುರುತಿಸಲಾಗಿದೆ.  ಬೈಕ್‌ ಸವಾರ ನಾಗಪ್ಪ ಸುಕ್ರುಗೌಡ ಗಂಗಾವಳಿ ಕ್ರಾಸ್‌ನಿಂದ ಗೋಕರ್ಣದ ಕಡೆ ಅತಿ ವೇಗ ಹಾಗೂ ಅಜಾಗರೂಕತೆಯಿಂದ ಚಲಾಯಿಸಿಕೊಂಡು ಬಂದು, ನಿಯಂತ್ರಣ ತಪ್ಪಿ ರಸ್ತೆಯ ಮೇಲೆ ಬಿದ್ದಿದ್ದಾರೆ. ಬೈಕಿನಲ್ಲಿ ಹಿಂಬದಿಗೆ ಕುಳಿತ ಲಲಿತಾ ಅವರೂ ಅಪಘಾತದ ರಭಸಕ್ಕೆ ರಸ್ತೆಯ ಮೇಲೆ ಬಿದ್ದು ಗಂಭೀರ ಗಾಯದಿಂದ ಸ್ಥಳದಲ್ಲಿಯೇ ಮೃತಪಟ್ಟಿದ್ದಾರೆ.

ಈ ಬಗ್ಗೆ ಗಣಪತಿ ಶಿವು ಗೌಡ ಎನ್ನುವವರು ಗೋಕರ್ಣ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕೈಗೊಂಡಿದ್ದಾರೆ.