ತೆಕ್ಕಲಕೋಟೆ: ಅನಧಿಕೃತ ನೀರಾವರಿ ಯೋಜನೆ ಆರೋಪ

ತೆಕ್ಕಲಕೋಟೆ: ಇಲ್ಲಿನ ತುಂಗಭದ್ರಾ ಕೆಳಮಟ್ಟದ (ಎಲ್ಎಲ್‌ಸಿ) ಕಾಲುವೆಯ ಬಾಗೇವಾಡಿ ಉಪಕಾಲುವೆ ಪಕ್ಕದಿಂದ ಭೈರಾಪುರ ಗ್ರಾಮದ ರೈತರು ಅನಧಿಕೃತವಾಗಿ ಪೈಪ್ ಲೈನ್ ಹಾಕುತ್ತಿದ್ದಾರೆ ಎಂದು ಆರೋಪಿಸಿದ ಘಟನೆ ಮಂಗಳವಾರ ನಡೆದಿದೆ.

ಈ ಕುರಿತು ಮಾತನಾಡಿದ ನೀರಾವರಿ ಬಳಕೆದಾರರ ಸಂಘದ ಅಧ್ಯಕ್ಷ ಬಂದೇ ನವಾಜ್, ‘ಕಾಲುವೆಯ ಪಕ್ಕದಲ್ಲಿ ಪೈಪ್ ಲೈನ್ ಹಾಕುವ ಮೂಲಕ ಕಾಲುವೆಯಿಂದ ಅನಧಿಕೃತವಾಗಿ ನೀರು ಪಡೆಯುವ ದುರುದ್ದೇಶ ಇದೆ. ಇದನ್ನು ನಾವು ವಿರೋಧಿಸುತ್ತೇವೆ’ ಎಂದು ಹೇಳಿದರು.

ಬಾಗೇವಾಡಿ ಕಾಲುವೆ ಬಳಿಯಿಂದ ಗೋಸಬಾಳು ಗ್ರಾಮದವರೆಗೆ ಏತ ನೀರಾವರಿ ಯೋಜನೆ ಅಡಿಯಲ್ಲಿ ₹65 ಲಕ್ಷ ವೆಚ್ಚದ ಕಾಮಗಾರಿಗೆ ಸಣ್ಣ ನೀರಾವರಿ ಮತ್ತು ಅಂತರ್ಜಲ ಅಭಿವೃದ್ಧಿ ಇಲಾಖೆ ವತಿಯಿಂದ ಕಾಮಗಾರಿ ನಡೆಸುತ್ತಿರುವುದಾಗಿ ಭೈರಾಪುರ ಗ್ರಾಮದ ರೈತ ಬಸವನಗೌಡ ತಿಳಿಸಿದರು.

ಜೆಸಿಬಿ ಯಂತ್ರ ಹಾಗೂ ಪೈಪ್‌ಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ರೈತ ಮುಖಂಡರಾದ ನೆಣಿಕೆಪ್ಪ, ಶಾಷಾವಲಿ, ನಾಗಪ್ಪ, ಬಿ. ಚಂದ್ರ ನಾಯಕ್, ಬಿ. ಶ್ರೀನಿವಾಸ, ಎಚ್. ರಾಜ, ಜಿ. ಸಿದ್ದಯ್ಯ, ಇಸೂಬ್ ಇದ್ದರು.