ಪ್ರಗತಿ ಪಥದಲ್ಲಿ ಮಹಿಳಾ ವಿವಿ: ಶ್ಲಾಘನೆ

ವಿಜಾಪುರ: `ಇಲ್ಲಿಯ ಮಹಿಳಾ ವಿಶ್ವವಿದ್ಯಾಲಯ ಪ್ರಗತಿ ಪಥದಲ್ಲಿ ದಾಪುಗಾಲು ಹಾಕುತ್ತಿದ್ದು, ಹೆಚ್ಚಿನ ಅನುದಾನ ನೀಡಿ ವಿಶ್ವವಿದ್ಯಾಲಯ ವನ್ನು ಸಬಲೀಕರಣ ಗೊಳಿಸುವ ಪ್ರಯತ್ನಗಳೂ ನಡೆದಿವೆ~ ಎಂದು ವಿಧಾನ ಪರಿಷತ್ ಸಭಾಪತಿ ಡಿ.ಎಚ್. ಶಂಕರಮೂರ್ತಿ ಹೇಳಿದರು.

ಇಲ್ಲಿಯ ಮಹಿಳಾ ವಿಶ್ವವಿದ್ಯಾಲ ಯದ ಜ್ಞಾನಶಕ್ತಿ ಆವರಣದಲ್ಲಿ `ಕೌಶಲ್ಯ ಮಹಿಳಾ ತಂತ್ರಜ್ಞಾನ ಪಾರ್ಕ್~ನ್ನು ಮಂಗಳವಾರ ಉದ್ಘಾಟಿಸಿದ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದರು.

`ನಾನು ಉನ್ನತ ಶಿಕ್ಷಣ ಸಚಿವ ನಾಗಿದ್ದಾಗ ಈ ಮಹಿಳಾ ವಿವಿಗೆ ಭೇಟಿ ನೀಡಿದ್ದೆ. ಆಗ ಈ ಮಹಿಳಾ ವಿಶ್ವವಿದ್ಯಾಲಯ ಅನೇಕ ಸಮಸ್ಯೆ ಯಿಂದ ಬಳಲುತ್ತಿತ್ತು. ಶೈಕ್ಷಣಿಕ ಸಮಸ್ಯೆಯೂ ಇತ್ತು. ಬಾಲ್ಯಾವಸ್ಥೆ ಯಲ್ಲಿಯೇ ಅನೇಕ ಕಾಯಿಲೆಗೆ ತುತ್ತಾಗಿತ್ತು. ಈಗ ಆ ಕಾಯಿಲೆಗಳೆಲ್ಲ ವಾಸಿಯಾಗಿವೆ. ಸಮರ್ಥ ಕುಲಪತಿ ಪ್ರೊ.ಗೀತಾ ಬಾಲಿ ಅವರ ನೇತೃತ್ವದಲ್ಲಿ ವಿಶ್ವವಿದ್ಯಾಲಯ ಸಾಕಷ್ಟು ಪ್ರಗತಿಯಾಗಿದೆ~ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

`ಪ್ರಾದೇಶಿಕ ಅಸಮತೋಲನ ನಿವಾರಣೆಯ ಉದ್ದೇಶದಿಂದಲೇ ವಿಜಾಪುರದಲ್ಲಿ ಮಹಿಳಾ ವಿಶ್ವವಿದ್ಯಾಲಯ ಸ್ಥಾಪಿಸಲಾಗಿದೆ. ಇದರ ಉದ್ದೇಶ ಈಡೇರಲೇಬೇಕು. ಅದು ಈಡೇರುತ್ತದೆ ಎಂಬ ಆಶಾಭಾವ ನನ್ನದು~ ಎಂದು ವಿವಿಯ ವ್ಯಾಪ್ತಿ ವಿಸ್ತರಣೆ ಕುರಿತು ಕೇಳಿದ ಪ್ರಶ್ನೆಗೆ ಪ್ರತಿಕ್ರಿಯಿಸಿದರು.