ಯಾದಗಿರಿ ಸುತ್ತಮುತ್ತ ಜೋರು ಮಳೆ

ಯಾದಗಿರಿ: ನಗರದ ಸುತ್ತಮುತ್ತ ಶುಕ್ರವಾರ ರಾತ್ರಿ ಗುಡುಗು ಸಹಿತ ಜೋರು ಮಳೆಯಾಗಿದೆ. ಜಿಲ್ಲೆಯಲ್ಲಿನ ಸುರಪುರ ಹಾಗೂ ಶಹಾಪುರ ತಾಲ್ಲೂಕುಗಳಲ್ಲಿ ಸಾಧಾರಣ ಮಳೆಯಾದ ಬಗ್ಗೆ ವರದಿಯಾಗಿದೆ.

ಯಾದಗಿರಿ ಸಮೀಪದ ನಾಯ್ಕಲ್, ಹುಲ್‌ಕಲ್ (ಜೆ), ಗುರಸುಣಗಿ, ಖಾನಾಪುರ, ಹತ್ತಿಕುಣಿ, ಬಂದಳ್ಳಿ, ಮುಂಡರಗಿ, ಹೊಸಳ್ಳಿ, ವರ್ಕನಹಳ್ಳಿ ಗ್ರಾಮಗಳಲ್ಲಿ ರಾತ್ರಿ 8ಕ್ಕೆ ಆರಂಭಗೊಂಡ ಮಳೆ ಸತತ 8.30ರ ವರೆಗೆ ಸುರಿದಿದೆ.

ಯಾದಗಿರಿಯ ಬಸವೇಶ್ವರ ನಗರ, ವಿವೇಕಾನಂದ ನಗರ, ಲಕ್ಷ್ಮೀ ನಗರ, ಕೋಲಿವಾಡ, ಮೈಲಾಪುರ ಅಗಸಿ, ಮುಸ್ಲಿಂಪುರ ಬಡಾವಣೆಗಳಲ್ಲಿನ ಚರಂಡಿಗಳು ಉಕ್ಕಿ ರಸ್ತೆಗೆ ಹರಿದವು. ಇದರಿಂದ ಜನ ಸಂಚಾರಕ್ಕೆ ತೊಂದರೆ ಉಂಟಾಯಿತು. ಕಾಯಿಪಲ್ಯೆ ಮಾರುಕಟ್ಟೆ ರಸ್ತೆಗಳಲ್ಲಿ ಹತ್ತಾರು ಬೃಹತ್‌ ತಗ್ಗುಗಳು ತುಂಬಿದ್ದರಿಂದ ಜನರು ಸಂಚಾರಕ್ಕೆ ಪರದಾಡಿದರು.