ಕೋಳಿಹಾಳ ಗ್ರಾಮದಲ್ಲಿ ಮತ್ತೆ ಸ್ಫೋಟಕ ಸದ್ದು: ಗ್ರಾಮಸ್ಥರಲ್ಲಿ ಆತಂಕ

ಹುಣಸಗಿ: ತಾಲ್ಲೂಕಿನ ಕೋಳಿಹಾಳ ಗ್ರಾಮಗಳಲ್ಲಿ ಮಂಗಳವಾರ ಶಬ್ದ ಹಾಗೂ ಕಂಪಿಸಿದ ಅನುಭವ ಉಂಟಾಗಿದೆ. ಇದರಿಂದ ಗ್ರಾಮಸ್ಥರು ಭಯಗೊಳ್ಳುವಂತಾಗಿದೆ.

ಮಂಗಳವಾರ ಸಂಜೆ 5ನೇ ಸಲ ದೊಡ್ಡ ಪ್ರಮಾಣದಲ್ಲಿ ಸ್ಫೋಟಕದಂತೆ ಸದ್ದು ಬಂದಿದ್ದು, ಗ್ರಾಮಸ್ಥರೆಲ್ಲರೂ ಮನೆಯಿಂದ ಹೊರಬಂದಿದ್ದೇವೆ ಎಂದು ಗ್ರಾಮದ ಗುರಣ್ಣ ಸಾಹುಕಾರ ಇಬ್ರಾಹಿಂಪುರ, ಬಸವರಾಜ ಬೆಳ್ಳಿ ತಿಳಿಸಿದರು.

ಅಕ್ಟೋಬರ್ 7 ರಂದು ಕೂಡಾ ಇದೇ ರೀತಿ ಭೂಮಿಯಿಂದ ಶಬ್ದ ಬಂದಿತ್ತು ಎಂದು ಅಣ್ಣಪ್ಪಗೌಡ ಹಾಗೂ ಮೈಬೂಬ ನಬೂಜಿ ಹೇಳಿದರು.

ವಿಷಯ ತಿಳಿದು ಗ್ರಾಮಕ್ಕೆ ಗ್ರಾಮ ಲೆಕ್ಕಾಧಿಕಾರಿ ಅಮರೇಶ ಮಾಲಗತ್ತಿ ಭೇಟಿ ನೀಡಿ ಮಾಹಿತಿ ಪಡೆದಿದ್ದು, ಹಿರಿಯ ಅಧಿಕಾರಿಗಳಿಗೆ ವರದಿ ನೀಡುವುದಾಗಿ ಹೇಳಿದರು.

ಕೋಳಿಹಾಳ ಗ್ರಾಮ ಸೇರಿದಂತೆ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಯಾವುದೇ ಕಾರ್ಖಾನೆಗಳು ಇಲ್ಲ. ಸ್ಪೋಟಕಗಳು ಬಳಸುವದಿಲ್ಲ. ಆದರೆ, ಭೂಮಿಯಿಂದ ಏಕೆ ಈ ರೀತಿ ಸದ್ದು ಮತ್ತು ಕಂಪನ ಉಂಟಾಗುತ್ತದೆ ಎನ್ನುವುದು ಯಕ್ಷ ಪ್ರಶ್ನೆಯಾಗಿದ್ದು, ಭೂ ವಿಜ್ಞಾನಿಗಳು ಭೇಟಿ ನೀಡಿ ಸಮಸ್ಯೆ ಪರಿಹರಿಸಲಿ ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.