‘ಕೌಶಲ ಅಭಿವೃದ್ಧಿಗೆ ಜಿಟಿಟಿಸಿ ಸಹಕಾರಿ’

ಕಡೇಚೂರು(ಸೈದಾಪುರ): ‘ಶಿಕ್ಷಣದ ಜತೆಗೆ ಕೌಶಲ ಅಭಿವೃದ್ಧಿಗೆ ಕೈಗಾರಿಕಾ ಉಪಕರಣಗಾರ ಮತ್ತು ತರಬೇತಿ ಕೇಂದ್ರ ಅತ್ಯಂತ ಉತ್ತಮವಾಗಿದೆ’ ಎಂದು ಪ್ರಾಂಶುಪಾಲ ರವಿಚಂದ್ರ ಹೇಳಿದರು.

ಸಮೀಪದ ಕಡೇಚೂರು ಕೈಗಾರಿಕಾ ಪ್ರದೇಶದ ಸರ್ಕಾರಿ ಉಪಕರಣಗಾರ ಮತ್ತು ತರಬೇತಿ ಕೇಂದ್ರದಲ್ಲಿ ಹಮ್ಮಿಕೊಂಡಿದ್ದ ಪಾಲಕರ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

‘ರಾಜ್ಯದ 33 ಸ್ಥಳಗಳಲ್ಲಿ ಜಿಟಿಟಿಸಿ ಕೇಂದ್ರಗಳಿವೆ. ಈ ಕೈಗಾರಿಕಾ ಮತ್ತು ತರಬೇತಿ ಕೇಂದ್ರಗಳಲ್ಲಿ ಸರಿಯಾಗಿ ಅಧ್ಯಯನ ಮಾಡಿದ ಪ್ರತಿಯೊಬ್ಬರಿಗೂ ಉದ್ಯೋಗ ಸಿಗುವ ಭರವಸೆಯಿದೆ. ವಿದ್ಯಾರ್ಥಿಗಳು ವಾಸ್ತವವನ್ನು ಅರಿತು ತರಬೇತಿ ಪಡೆದುಕೊಳ್ಳಬೇಕು. ಬುದ್ಧಿವಂತಿಕೆ ಹಾಗೂ ಕೌಶಲ ಹೆಚ್ಚಿಸಿಕೊಂಡು ಜೀವನದಲ್ಲಿ ಯಶಸ್ಸು ಸಾಧಿಸುವ ಹಾದಿಯಲ್ಲಿ ಸಾಗಬೇಕು. ತರಬೇತಿ ಎನ್ನುವುದು ಒಮ್ಮೆ ಕಲಿತರೆ, ಅದು ನಮ್ಮ ಜೀವನವಿಡಿ ಮರೆಯಲು ಸಾಧ್ಯವಿಲ್ಲ. ಅದು ಸಂಕಷ್ಟದ ಸಮಯದಲ್ಲಿ ನಮ್ಮ ಬದಕು ಸಾಗಿಸುವ ಅಸ್ತ್ರವಾಗುತ್ತದೆ. ಈಗಿನ ಕಾಲದಲ್ಲಿ ತಂತ್ರಜ್ಞಾನಕ್ಕೆ ಹೆಚ್ಚಿನ ಬೇಡಿಕೆಯಿದೆ. ಸ್ಪರ್ಧಾತ್ಮಕ ಯುಗದಲ್ಲಿ ನಮ್ಮದೆ ಆದ ಜ್ಞಾನ ಮತ್ತು ಕೌಶಲದೊಂದಿಗೆ ಉತ್ತಮ ಗುರಿಯತ್ತ ಸಾಗಬೇಕು. ವಿದ್ಯಾರ್ಥಿಗಳು ತರಬೇತಿಯನ್ನು ಸದುಪಯೋಗ ಪಡಿಸಿಕೊಳ್ಳಬೇಕು’ ಎಂದು ಹೇಳಿದರು.

ಗ್ರಾ.ಪಂ ಅಧ್ಯಕ್ಷೆ ಕಮಲಮ್ಮ, ನಿವೃತ್ತ ಶಿಕ್ಷಕ ಸಿದ್ದಪ್ಪ ಆವಂಟಿ, ಬಳಿಚಕ್ರ ಸರ್ಕಾರಿ ಪ್ರೌಢಶಾಲೆ ಮುಖ್ಯಶಿಕ್ಷಕಿ ಅನ್ನಪೂರ್ಣ, ಧರ್ಮರಾಜ, ವಿಜಯಕುಮಾರ, ಪ್ರಿಯಾಂಕಾ ದಿವಟಗಿ, ಪ್ರದೀಪ್ ದದ್ದಲ್, ಹನುಮಂತ, ಅಕ್ಷಯ, ಸುಮಾ, ಶಿವಲಿಂಗಯ್ಯ, ಸುಖಮನಿ, ಹುಸೇನ್, ಅಂಕುಶ, ಮಂಜುನಾಥ, ಬಾಲಾಜಿ, ವಿದ್ಯಾರ್ಥಿಗಳು, ಪೋಷಕರು ಸೇರಿದಂತೆ ಇತರರಿದ್ದರು. ಹಿರಿಯ ಉಪನ್ಯಾಸಕ ವೆಂಕಟರಾವ ನಿರೂಪಿಸಿದರು.