‘ಮೋದಿ ಉತ್ತರಾಧಿಕಾರಿ ಯಾರು’ ಚರ್ಚೆಗೆ ಚಾಲನೆ

ಅಹಮದಾಬಾದ್‌ (ಪಿಟಿಐ): ವಿವಿಧ ಸುದ್ದಿವಾಹಿನಿಗಳು ನಡೆಸಿದ ಮತಗಟ್ಟೆ ಸಮೀಕ್ಷೆಗಳಲ್ಲಿ ಎನ್‌ಡಿಎ ದೇಶದ  ಚುಕ್ಕಾಣಿ ಹಿಡಿಯುವುದಾಗಿ ಪ್ರಕಟಗೊಂಡ ಬೆನ್ನಲ್ಲೇ ಗುಜರಾತ್‌ ಮುಖ್ಯಮಂತ್ರಿ ನರೇಂದ್ರ ಮೋದಿ ಅವರ ಉತ್ತರಾಧಿಕಾರಿ ಯಾರಾಗಲಿದ್ದಾರೆ ಎಂಬ ಬಗ್ಗೆ ಚರ್ಚೆ ಆರಂಭವಾಗಿದೆ.

ಆದರೆ ಈ ವಿಷಯವನ್ನು ಅಲ್ಲಗಳೆದಿ ರುವ  ರಾಜ್ಯ ಬಿಜೆಪಿ, ಪಕ್ಷ ಮಾಮೂಲಿ ಸಭೆಗಳನ್ನು ಮಾತ್ರ ನಡೆಸಿದೆ ಎಂದು ತಿಳಿಸಿದೆ.
ಗುಜರಾತ್‌ ಬಿಜೆಪಿ ಘಟಕದ ಪ್ರಮುಖರ ಸಭೆ ಮಂಗಳವಾರ ನಡೆದಿದೆ. ಒಂಬ­ತ್ತನೇ ಹಂತದ ಚುನಾವಣೆ ಅಂತ್ಯಗೊಂಡ ನಂತರ ಮುಂದಿನ ಬೆಳವಣಿಗೆಗಳ ಬಗ್ಗೆ ಸಮಾಲೋಚನೆ ನಡೆಸಿದೆ ಎಂದು ಪಕ್ಷದ ಮೂಲಗಳು ತಿಳಿಸಿವೆ.

ಮುಖ್ಯಮಂತ್ರಿ ಹುದ್ದೆಗೆ ಹಲವು ಹೆಸರು: ಗುಜರಾತ್‌ನ ಮುಂದಿನ ಮುಖ್ಯಮಂತ್ರಿ ಸ್ಥಾನಕ್ಕೆ ಆಕಾಂಕ್ಷಿಗಳ ಹಲವು ಹೆಸರುಗಳು ಚಾಲ್ತಿಗೆ ಬಂದಿವೆ. ಅವರಲ್ಲಿ  ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಅಮಿತ್‌ ಷಾ, ಮತ್ತು ಮೋದಿ ಅವರ ಆಪ್ತರಾದ ಆನಂದಿ ಪಟೇಲ್‌, ನಿತಿನ್‌ ಪಟೇಲ್‌, ಸೌರಭ್‌ ಪಟೇಲ್ ಹಾಗೂ ಭಿಕು ದಾಲ್ಸಾನಿಯ ಪ್ರಮುಖರಾಗಿದ್ದಾರೆ.