ADVERTISEMENT

ಕೇರಳ ಚಿತ್ರೋತ್ಸವದಲ್ಲಿ ‘ಮೂಕನಾಯಕ’

​ಪ್ರಜಾವಾಣಿ ವಾರ್ತೆ
Published 17 ಮೇ 2018, 19:30 IST
Last Updated 17 ಮೇ 2018, 19:30 IST
ಕೇರಳ ಚಿತ್ರೋತ್ಸವದಲ್ಲಿ ‘ಮೂಕನಾಯಕ’
ಕೇರಳ ಚಿತ್ರೋತ್ಸವದಲ್ಲಿ ‘ಮೂಕನಾಯಕ’   

ಕೇರಳ ಚಲನಚಿತ್ರ ಅಕಾಡೆಮಿ ಪ್ರತಿವರ್ಷ ಆಯೋಜಿಸುವ ರಾಷ್ಟ್ರೀಯ ಚಲನಚಿತ್ರೋತ್ಸವಕ್ಕೆ ಬರಗೂರು ರಾಮಚಂದ್ರಪ್ಪ ಅವರು ನಿರ್ದೇಶಿಸಿರುವ ‘ಮೂಕ ನಾಯಕ’ ಚಿತ್ರ ಆಯ್ಕೆಯಾಗಿದೆ. ಜೂನ್‌ 8ರಿಂದ 11ರವರೆಗೆ ಈ ಚಿತ್ರೋತ್ಸವ ನಡೆಯಲಿದೆ.

ಮೂಕನಾಗಿರುವ ಚಿತ್ರಕಲಾವಿದನೊಬ್ಬನ ಅಭಿವ್ಯಕ್ತಿಯ ಕಥನವನ್ನು ಈ ಚಿತ್ರವು ಹೊಂದಿದೆ. ಮಾತು ಬಾರದ ಕಲಾವಿದ ತನ್ನ ಸುತ್ತಲಿನ ಪರಿಸರದ ಪ್ರಕ್ರಿಯೆಗಳಿಗೆ ಕುಂಚದ ಮೂಲಕವೇ ಪ್ರತಿಸ್ಪಂದನ ನೀಡುತ್ತಿರುತ್ತಾನೆ. ಹಾಗೆಯೆ ಪ್ರತಿರೋಧಕ್ಕೂ ಅವನಿಗೆ ಕುಂಚವೇ ಆಯುಧ. ಇಂಥದ್ದೊಂದು ಅಪರೂಪದ ವಸ್ತುವನ್ನಿಟ್ಟುಕೊಂಡು ಕಥೆ ಚಿತ್ರಕಥೆ ಹೆಣೆದು ನಿರ್ದೇಶಿಸಿದ್ದಾರೆ ಬರಗೂರು.

ಸೂರ್ಯ ಎಂಬ ಗ್ರಾಮೀಣ ಪ್ರದೇಶದ ಕಲಾವಿದ ಮತ್ತು ಆತನ ಅಕ್ಕ ಕಾವೇರಿಯ ಸುತ್ತಲೇ ಇಡೀ ಚಿತ್ರದ ಕಥೆ ಹೆಣೆಯಲ್ಪಟ್ಟಿದೆ. ಕುಮಾರ್ ಗೋವಿಂದ ಮತ್ತು ರೇಖಾ ಈ ಚಿತ್ರದ ಮುಖ್ಯಪಾತ್ರಗಳಲ್ಲಿ ನಟಿಸಿದ್ದಾರೆ. ಶೀತಲ್‌, ಸುಂದರರಾಜು, ವೆಂಕಟರಾಜು, ಯತಿರಾಜು, ಭೋಗಾ ನರಸಿಂಹ ಮುಂತಾದವರು ತಾರಾಗಣದಲ್ಲಿದ್ದಾರೆ.

ADVERTISEMENT

ಸುರೇಶ್ ಅರಸು ಸಂಕಲನ, ನಾಗರಾಜ ಆದವಾನಿ ಛಾಯಾಗ್ರಹಣ, ಶಮಿತಾ ಮಲ್ನಾಡ್‌ ಸಂಗೀತ ನಿರ್ದೇಶನ ಈ ಚಿತ್ರಕ್ಕಿದೆ.

‘ಮೂಕ ನಾಯಕ’ ಚಿತ್ರವನ್ನು ಜುಲೈ ಅಥವಾ ಆಗಸ್ಟ್‌ ತಿಂಗಳಲ್ಲಿ ಬಿಡುಗಡೆ ಮಾಡಲು ತಂಡ ಯೋಜಿಸಿಕೊಂಡಿದೆ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.