2.0 ಸಿನಿಮಾ: ರಜನಿಕಾಂತ್‌ ಮಾಡುತ್ತಿರುವ ಪಾತ್ರವನ್ನು ಅಮೀರ್ ಖಾನ್ ತಿರಸ್ಕರಿಸಿದ್ದು ಯಾಕೆ?
ಮುಂಬೈ: ಬಾಲಿವುಡ್‌ ಜನಪ್ರಿಯ ನಾಯಕ ನಟ ಅಮೀರ್ ಖಾನ್ 17 ವರ್ಷಗಳಲ್ಲಿ ಸಾಲು ಸಾಲು ಹಿಟ್‌ ಸಿನಿಮಾಗಳನ್ನು ನೀಡಿರುವುದರಲ್ಲಿ ಎರಡು ಮಾತಿಲ್ಲ. ಬಂದ ಅವಕಾಶಗಳನ್ನು ಸದುಪಯೋಗಪಡಿಸಿಕೊಂಡ ಶ್ರೆಷ್ಠ ನಟ ಅವರು. ಆದರೆ ಬಾರಿ ವೆಚ್ಚದಲ್ಲಿ ನಿರ್ಮಾಣವಾಗುತ್ತಿರುವ 2.0 ಸಿನಿಮಾದ ನಾಯಕ ಪಾತ್ರವನ್ನು (ಸೂಪರ್‌ ಸ್ಟಾರ್‌ ರಜನಿಕಾಂತ್‌ ನಿರ್ವಹಿಸುತ್ತಿರುವ ಪಾತ್ರ) ಅಮೀರ್ ಖಾನ್ ತಿರಸ್ಕರಿಸಿದ್ದು ಯಾಕೆ ಎಂಬುದು ಚರ್ಚೆಗೆ ಗ್ರಾಸವಾಗಿದೆ.
ಹೌದು, 2.0 ಸಿನಿಮಾದ ನಿರ್ದೇಶಕ ಶಂಕರ್ ಮೊದಲು ಆಫರ್ ಕೊಟ್ಟಿದ್ದು ಅಮೀರ್ ಖಾನ್ ಅವರಿಗೆ! ಆದರೆ ಅಮೀರ್ ಖಾನ್ ಈ ಆಫರ್ ಅನ್ನು ನಯವಾಗಿಯೇ ತಿರಸ್ಕರಿಸಿದ್ದಾರೆ.
ಈ ಬಗ್ಗೆ ಅಮೀರ್ ಖಾನ್ ‘ಝೀ ಇಟಿಸಿ’ ಟಿ.ವಿಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ. ನಾನು ನಿರ್ದೇಶಕ ಶಂಕರ್ ಮತ್ತು ರಜನಿಕಾಂತ್‌ ಅವರ ದೊಡ್ಡ ಅಭಿಮಾನಿಯಾಗಿದ್ದೇನೆ. ಈ ಸಿನಿಮಾಗೆ ಶಂಕರ್ ಅದ್ಬುತವಾಗಿ ಚಿತ್ರಕತೆ ಬರೆದಿದ್ದಾರೆ. ‘ಈ ಪಾತ್ರವನ್ನು ನಿರ್ವಹಿಸಲು ನನ್ನಿಂದ ಸಾಧ್ಯವಿಲ್ಲ , ಅದು ರಜನಿಕಾಂತ್‌ ಅವರಿಂದ ಮಾತ್ರ ಸಾಧ್ಯ’ ಎಂದು ಶಂಕರ್‌ಗೆ ತಿಳಿಸಿದೆ ಎಂದು ಅಮೀರ್ ಖಾನ್ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
2.0 ಸಿನಿಮಾದಲ್ಲಿ ಖಳನಟನಾಗಿ ಅಕ್ಷಯ್‌ ಕುಮಾರ್ ನಟಿಸಿದ್ದಾರೆ. 2018ರ ಜನವರಿಗೆ ಈ ಸಿನಿಮಾ ಬಿಡುಗಡೆಯಾಗುವ ಸಾಧ್ಯತೆಗಳಿವೆ. ಭಾರತ ಸೇರಿದಂತೆ ದಕ್ಷಿಣಾ ಏಷ್ಯಾದಲ್ಲಿ ಈ ಸಿನಿಮಾ ಬಾರೀ ನಿರೀಕ್ಷೆ ಹುಟ್ಟುಹಾಕಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.