ಸಿನಿಮಾ ಪ್ರಚಾರಕ್ಕೆ ಹೊಸ ತಂತ್ರ

ವೇದಿಕೆ, ಗಿಜಿಗುಡುವ ಜನರ ಮುಂದೆ, ಟಿ.ವಿ.ಗಳಲ್ಲಿ, ದೊಡ್ಡದೊಡ್ಡ ಕಾರ್ಯಕ್ರಮ ಆಯೋಜಿಸಿ ಸಿನಿಮಾ ಪ್ರಚಾರ ಮಾಡುವುದು ಮಾಮೂಲಿ. ಆದರೆ ಸದ್ಯದಲ್ಲಿಯೇ ತೆರೆ ಕಾಣಲು ತಯಾರಾಗಿರುವ ‘ಹಂಬಲ್‌ ಪೊಲಿಟಿಷಿಯನ್‌ ನಾಗರಾಜ್‌’ ಮನೆಮನೆಗೆ ತೆರಳಿ ಸಿನಿಮಾ ನೋಡುವಂತೆ ರಾಜಕಾರಣಿಯ ರೀತಿಯಲ್ಲಿಯೇ ಜನರನ್ನು ಕೇಳಿಕೊಳ್ಳುತ್ತಿದ್ದಾರೆ.

ಸಾಮಾಜಿಕ ಜಾಲತಾಣಗಳು ಸಿನಿಮಾ ಮತ್ತು ರಾಜಕೀಯ ಪಕ್ಷಗಳ ಪ್ರಚಾರದ ಪ್ರಬಲ ಅಸ್ತ್ರವಾಗಿದೆ. ಇದನ್ನು ಇನ್ನಷ್ಟು ವಿಭಿನ್ನವಾಗಿ ಬಳಸಿಕೊಂಡಿದ್ದಾರೆ ಸಿನಿಮಾದ ನಾಯಕ ದಾನೀಶ್‌ ಸೇಠ್‌. ಬೀದಿಗಳಲ್ಲಿ ಮಾಡುತ್ತಿರುವ ಪ್ರಚಾರದ ವಿಡಿಯೊವನ್ನು ಸಾಮಾಜಿಕ ಜಾಲತಾಣಗಳಲ್ಲಿಯೂ ಹರಿಬಿಟ್ಟಿದ್ದಾರೆ. ‘ನಿಮ್ಮ ಏರಿಯಾಗೂ ಬರಬೇಕೆಂದರೆ ಕಾಮೆಂಟ್‌ ಮಾಡಿ’ ಎಂಬ ಅವಕಾಶವನ್ನೂ ವೀಕ್ಷಕರಿಗೆ ನೀಡಿದ್ದಾರೆ.

‘ಅನುಭವಗಳ ಮೂಲಕ ಕ್ರಿಯಾತ್ಮಕ ಯೋಚನೆ ಹೊಳೆಯುತ್ತವೆ. ಇದು ಕೂಡ ಅದರ ಒಂದು ಭಾಗ. ನಾವು ಸಿನಿಮಾ ಥೀಮ್‌ ಬಿಟ್ಟು ಪ್ರಚಾರ ಮಾಡುತ್ತಿಲ್ಲ. ಸಿನಿಮಾದ ಕಥೆಯಲ್ಲಿ ಇರುವ ಅಂಶಗಳನ್ನು ಪ್ರಚಾರಕ್ಕೆ ಬಳಸಿದ್ದೇವೆ. ಈ ವಿಡಿಯೊ ವೈರಲ್‌ ಆಗುತ್ತದೆ ಎಂಬುದು ಗೊತ್ತಿತ್ತು. ಆದರೆ ಇಷ್ಟು ಜನಪ್ರಿಯವಾಗುತ್ತದೆ ಎಂಬ ಆಲೋಚನೆ ಇರಲಿಲ್ಲ’ ಎನ್ನುತ್ತಾರೆ ದಾನೀಶ್‌ ಸೇಠ್‌.

ನಗರದ ವಿವಿಧೆಡೆ ಇರುವ 38 ಕಾಲೇಜುಗಳು, ಹಲಸೂರು ಮತ್ತು ನಗರದ ಹೊರವಲಯಗಳಲ್ಲಿ ಪ್ರಚಾರ ಮಾಡಿದ್ದಾರೆ. ಈ ವಿಡಿಯೊವನ್ನು 15 ಲಕ್ಷ ಮಂದಿ ವೀಕ್ಷಿಸಿದ್ದಾರೆ. ಅಂದಹಾಗೆ ಈ ಸಿನಿಮಾ ಇದೇ ಶುಕ್ರವಾರ ತೆರೆಗೆ ಬರಲಿದೆ.