ಮತ್ತೊಂದು ರಿಮೇಕ್ ಚಿತ್ರದಲ್ಲಿ ಶಾಹಿದ್
ತೆಲುಗಿನ ಹಿಟ್ ಸಿನಿಮಾ ‘ಅರ್ಜುನ್‌ ರೆಡ್ಡಿ’ ರಿಮೇಕ್ ‘ಕಬೀರ್ ಸಿಂಗ್‌’ನಲ್ಲಿ ನಟಿಸಿ ಸೈ ಎನಿಸಿಕೊಂಡಿರುವ ಶಾಹಿದ್ ಕಪೂರ್‌ ಮತ್ತೊಂದು ರಿಮೇಕ್ ಚಿತ್ರಕ್ಕೆ ಸಹಿ ಹಾಕಿದ್ದಾರೆ.
ತೆಲುಗಿನ ‘ಜೆರ್ಸಿ’ ಸಿನಿಮಾ ಬಾಲಿವುಡ್‌ನಲ್ಲಿ ರಿಮೇಕ್ ಆಗಲಿದೆ ಎಂಬ ಸುದ್ದಿ ಇತ್ತೀಚೆಗೆ ಓಡಾಡುತ್ತಿತ್ತು. ಆದರೆ ಈ ಚಿತ್ರದಲ್ಲಿ ಯಾರು ನಟಿಸಲಿದ್ದಾರೆ ಎಂಬ ಕುತೂಹಲಕ್ಕೆ ಈಗಷ್ಟೇ ತೆರೆ ಬಿದ್ದಿದೆ. ‘ಕಬೀರ್ ಸಿಂಗ್‌’ ಮೂಲಕ ಬಾಲಿವುಡ್‌ನಲ್ಲಿ ಮರುಜೀವ ಪಡೆದುಕೊಂಡಿರುವ ಶಾಹಿದ್ ಮೇಲೆ ಅಭಿಮಾನಿಗಳಿಗೆ ಈಗ ಹೆಚ್ಚಿನ ನಿರೀಕ್ಷೆ ಇದೆ. ಈ ಕಾರಣದಿಂದ ಮೂರು ತಿಂಗಳು ಬಿಡುವು ಪಡೆದುಕೊಂಡು ಅವರು ಸ್ಕ್ರಿಪ್ಟ್‌ ಒಪ್ಪಿದ್ದಾರೆ ಎಂದು ಮೂಲಗಳು ಹೇಳಿವೆ.
‘ಜೆರ್ಸಿ’ಯಲ್ಲಿ ನಾನಿ ಅಭಿನಯಿಸಿದ್ದರು. ಹಿಂದಿ ಸಿನಿಮಾವನ್ನೂ ಗೌತಮ್ ಅವರೇ ನಿರ್ದೇಶಿಸಲಿದ್ದಾರೆ.
‘ಹಿಂದಿ ಪ್ರೇಕ್ಷಕರಿಗಾಗಿ ನಾನು ಸಿನಿಮಾ ಮಾಡಲಿದ್ದೇನೆ. ನನ್ನ ಪ್ರಕಾರ, ಈ ಪಾತ್ರಕ್ಕೆ ಶಾಹಿದ್ ಅವರಿಗಿಂತ ಉತ್ತಮ ನಟ ಸಿಗಲಾರ. ಅವರು ತೆರೆ ಮೇಲೆ ಮ್ಯಾಜಿಕ್ ಮಾಡಲಿದ್ದಾರೆ’ ಎಂದು ಗೌತಮ್ ಹೇಳಿದ್ದಾರೆ.
ಹಿಂದಿ ರಿಮೇಕ್ ಚಿತ್ರವನ್ನು ಅಲ್ಲು ಅರವಿಂದ್‌, ಅಮನ್‌ ಗಿಲ್‌, ದಿಲ್ ರಾಜು ಅವರು ನಿರ್ಮಾಣ ಮಾಡಲಿದ್ದಾರೆ. 2020ರ ಆಗಸ್ಟ್ ತಿಂಗಳಿನಲ್ಲಿ ಈ ಸಿನಿಮಾ ತೆರೆಕಾಣಲಿದೆ ಎಂದು ಸಿನಿ ತಂಡ ಹೇಳಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.