ಹಿನ್ನೀರ ದ್ವೀಪ

ಕೇರಳದ ಒಂದು ಸುಂದರ ದ್ವೀಪ, ಹೆಸರು ಕುಮಾರಕೊಮ್. ವೆಂಬನಾಡ ಸರೋವರದ ನಡುವೆ ಇರುವ ಈ ದ್ವೀಪ ಗ್ರಾಮ ಕುಟ್ಟನಾಡ ಪ್ರದೇಶದ ಭಾಗವಾಗಿದೆ.ಕೊಟ್ಟಾಯಂ ಪಟ್ಟಣದಿಂದ 16 ಕಿ.ಮೀ. ಅಂತರದಲ್ಲಿ ಇರುವ ಈ ದ್ವೀಪ ಅಪರೂಪದ ಅನುಭವಗಳನ್ನು ನೀಡುತ್ತದೆ.ತೆವಳಿದಂತೆ ಹರಿಯುವ ಹಿನ್ನೀರು, ಪಕ್ಷಿಗಳ ಇನಿದನಿ, ಸಾಲು ತೆಂಗಿನ ಮರಗಳು ಈ ದ್ವೀಪಕ್ಕೆ ಅದ್ಭುತ ಸೌಂದರ್ಯ ನೀಡಿವೆ.

ಇಲ್ಲಿನ 14 ಎಕರೆ ಪ್ರದೇಶದಲ್ಲಿ ಹರಡಿದೆ ಒಂದು ಸುಂದರ ಪಕ್ಷಿಧಾಮ. ಇಲ್ಲಿ ಭಾರತೀಯ ಹಕ್ಕಿಗಳಲ್ಲದೇ ವಲಸೆ ಬರುವ ಹಕ್ಕಿಗಳೂ ಇವೆ. ಅವುಗಳಲ್ಲಿ ಸೈಬೀರಿಯನ್ ಸ್ಟೊರ್ಕ್ ಬಹಳ ಸಂಖ್ಯೆಯಲ್ಲಿ ಕಂಡುಬರುತ್ತವೆ. ನೀರು ಆವರಿಸಿದ ಈ ಹಸಿರು ಊರು ತನ್ನ ಸ್ವಚ್ಛ ಪರಿಸರದಿಂದ ಮನಸೆಳೆಯುತ್ತದೆ.

ಈ ಊರಿನ ಹಳೇ ಬಂಗಲೆಗಳನ್ನು ರೆಸಾರ್ಟ್‌ಗಳಾಗಿ ಪರಿವರ್ತಿಸಿ ಪ್ರವಾಸಿಗರಿಗೆ ನೀಡಲಾಗುತ್ತಿದೆ. ಅಲ್ಲದೇ ನೀರಿನ ಮೇಲೆ ತೇಲುವ ದೋಣಿಮನೆಗಳು ಕೂಡ ಲಭ್ಯ. ಸರೋವರದಲ್ಲಿ ದೋಣಿವಿಹಾರಕ್ಕೂ ಅವಕಾಶ ಇದೆ. ಜೊತೆಗೆ ಬಲೆ ಬೀಸಿ ಮೀನುಗಳನ್ನು ಕೂಡ ಹಿಡಿಯಬಹದು.

ಕೇರಳ ಸರ್ಕಾರ ಈ ಗ್ರಾಮವನ್ನು ಪ್ರವಾಸಿಗರ ದೃಷ್ಟಿಯಿಂದ ಸಾಕಷ್ಟು ಅಭಿವೃದ್ಧಿಪಡಿಸಿದೆ. ಸರ್ಕಾರಿ ವಸತಿಗೃಹಗಳೂ ಇಲ್ಲಿವೆ. ಇಲ್ಲಿಗೆ ಕೊಟ್ಟಾಯಂ ಹತ್ತಿರದ ರೈಲುನಿಲ್ದಾಣ. ಕೊಚಿನ್ ಹತ್ತಿರದ ವಿಮಾನ ನಿಲ್ದಾಣ.