ಕಾವಡ್ ಯಾತ್ರಾರ್ಥಿಗಳು ಹಾಲನ್ನು ರಸ್ತೆ ಮೇಲೆ ಚೆಲ್ಲಿದ್ದರು ಎಂಬುವುದು ಸುಳ್ಳು

ಜನರ ಗುಂಪೊಂದು ವ್ಯಾನ್‌ನಲ್ಲಿರುವ ಕ್ಯಾನ್‌ಗಳಿಂದ ಹಾಲನ್ನು ರಸ್ತೆಯ ಮೇಲೆ ಚೆಲ್ಲುತ್ತಿರುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಹಾಲಿನ ವ್ಯಾಪಾರಿಯೊಂದಿಗೆ ಜಗಳವಾಗಿದ್ದರಿಂದ ರೊಚ್ಚಿಗೆದ್ದ ಕಾವಡ್ ಯಾತ್ರಾರ್ಥಿಗಳು ಹಾಲನ್ನು ರಸ್ತೆ ಮೇಲೆ ಚೆಲ್ಲಿದರು ಎಂದು ಪೋಸ್ಟ್ ಅನ್ನು ಹಂಚಿಕೊಳ್ಳುತ್ತಿರುವವರು ಪ್ರತಿಪಾದಿಸುತ್ತಿದ್ದಾರೆ. ಆದರೆ, ಇದು ಸುಳ್ಳು ಸುದ್ದಿ.

ವಿಡಿಯೊದ ಕೀಫ್ರೇಮ್‌ಗಳನ್ನು ಇನ್‌ವಿಡ್ ಟೂಲ್ ಮೂಲಕ ಪ್ರತ್ಯೇಕಿಸಿ, ಅವನ್ನು ಗೂಗಲ್ ಲೆನ್ಸ್ ಮೂಲಕ ಪರಿಶೀಲನೆ ಮಾಡಿದಾಗ, ಈ ವಿಡಿಯೊ ಅನ್ನು ಹಲವರು ಇದೇ ಪ್ರತಿಪಾದನೆಯೊಂದಿಗೆ ಹಂಚಿಕೊಂಡಿರುವುದು ಕಂಡಿತು. ಚಿತ್ರವನ್ನು ರಿವರ್ಸ್ ಇಮೇಜ್‌ ಸರ್ಚ್‌ಗೆ ಒಳಪಡಿಸಿದಾಗ, ಫೇಸ್‌ಬುಕ್‌ನ ‘ಪಂಜಾಬ್ ಕೇಸರಿ ಹರಿಯಾಣ’ ಎನ್ನುವ ಖಾತೆಯಲ್ಲಿ ಇದೇ ವಿಡಿಯೊ ಅಪ್‌ಲೋಡ್ ಮಾಡಿರುವುದು ಕಂಡಿತು. ಗುಜರಾತ್‌ನ ಸಬರಕಂಠ ಜಿಲ್ಲೆಯಲ್ಲಿ ಇದೇ ಜುಲೈ 20ರಂದು ಹೈನುಗಾರರು ಹಾಲಿನ ದರ ಹೆಚ್ಚಳಕ್ಕೆ ಒತ್ತಾಯಿಸಿದರು; ಈ ವೇಳೆ ಅವರು ಹಾಲನ್ನು ರಸ್ತೆ ಮೇಲೆ ಚೆಲ್ಲಿ ಆಕ್ರೋಶ ವ್ಯಕ್ತಪಡಿಸಿದರು ಎಂದು ಪೋಸ್ಟ್‌ನಲ್ಲಿ ಉಲ್ಲೇಖಿಸಲಾಗಿತ್ತು. ಗುಜರಾತ್‌ನ ಹೈನುಗಾರರ ವಿಡಿಯೊ ಅನ್ನು ಯಾತ್ರಾರ್ಥಿಗಳ ವಿಡಿಯೊ ಎಂದು ಸುಳ್ಳು ಪ್ರತಿ‍ಪಾದನೆಗಳೊಂದಿಗೆ ಹಂಚಿಕೊಳ್ಳಲಾಗುತ್ತಿದೆ ಎಂದು ಪಿಟಿಐ ಫ್ಯಾಕ್ಟ್ ಚೆಕ್ ವರದಿ ತಿಳಿಸಿದೆ.