ಆಂಧ್ರ ವಿಧಾನಸಭೆ: ಪ್ರತಿಧ್ವನಿಸಿದ ತೆಲಂಗಾಣ ಬೇಡಿಕೆ

ಹೈದರಾಬಾದ್ (ಐಎಎನ್ಎಸ್): ಸೋಮವಾರ ಇಲ್ಲಿ ಆರಂಭವಾದ ಆಂಧ್ರ ಪ್ರದೇಶದ ಪ್ರಸಕ್ತ ಸಾಲಿನ ಬಜೆಟ್ ಅಧಿವೇಶನದ ವಿಧಾನಸಭೆಯ ಜಂಟಿ ಸಮಾವೇಶದಲ್ಲಿ ಪ್ರತ್ಯೇಕ ತೆಲಂಗಾಣ ಬೇಡಿಕೆಯ ~ಜೈ ತೆಲಂಗಾಣ ಘೋಷಣೆ~ಯು ಮತ್ತೆ ಪ್ರತಿಧ್ವನಿಸಿತು.

ರಾಜ್ಯಪಾಲ ಇ.ಎಸ್.ಎಲ್ ನರಸಿಂಹನ್ ಅವರು,  ಜಂಟಿ ಸಮಾವೇಶವನ್ನು ಉದ್ದೇಶಿಸಿದ ತಮ್ಮ ಭಾಷಣ ಆರಂಭಿಸುತ್ತಿದ್ದಂತೆ  ಪ್ರಮುಖ ವಿರೋಧ ಪಕ್ಷ ಟಿಆರ್ ಎಸ್ ನ ಸದಸ್ಯರು ಗದ್ದಲವೆಬ್ಬಿಸಿ ರಾಜ್ಯಪಾಲರ ಭಾಷಣಕ್ಕೆ ಅಡ್ಡಿ ಮಾಡಿದ ಪ್ರಸಂಗ ನಡೆಯಿತು.

ರಾಜ್ಯಪಾಲರು ತಮ್ಮ ಭಾಷಣ ಆರಂಭಿಸುತ್ತಿದ್ದಂತೆ ಟಿಆರ್ ಎಸ್ ( ತೆಲಂಗಾಣ ರಾಷ್ಟ್ರ ಸಮಿತಿ) ಸದಸ್ಯರು ತಮ್ಮಲ್ಲಿದ್ದ ಅವರ ಭಾಷಣದ ಪ್ರತಿಗಳನ್ನು ಹರಿದು, ಅದರ ತುಂಡುಗಳನ್ನು ಸದನದನದಲ್ಲಿ ಎಸೆದು, ಪ್ರತಿಭಟನೆ ನಡೆಸಿದರು.

ಗದ್ದಲದ ನಡುವೆಯೇ ರಾಜ್ಯಪಾಲರು ಭಾಷಣ ಮಾಡಬೇಕಾಯಿತು. ಈ ಸಂದರ್ಭದಲ್ಲಿ ಸದನದ ಭದ್ರತಾ ಸಿಬ್ಬಂದಿಗಳು ರಾಜ್ಯಪಾಲರ ಸುತ್ತಲು ನಿಂತು ಕೊಂಡು ಅವರಿಗೆ ರಕ್ಷಣೆ ನೀಡಿದ ಪ್ರಸಂಗ ನಡೆಯಿತು.

ಇದೇ ಸಂದರ್ಭದಲ್ಲಿ ಪ್ರಮುಖ ವಿರೋಧ ಪಕ್ಷವಾದ ತೆಲುಗು ದೇಶಂ ಪಕ್ಷ (ಟಿಡಿಪಿ)ದ ಶಾಸಕರು, ~ಸರ್ಕಾರವು ರೈತರ ಹಾಗೂ  ಜನರ ಸಮಸ್ಯೆಗಳನ್ನು ಬಗೆಹರಿಸುವಲ್ಲಿ ವಿಫಲವಾಗಿದೆ ಎನ್ನುತ್ತಾ ರಾಜ್ಯಪಾಲರು ಭಾಷಣಕ್ಕೆ ಅಡ್ಡಿಯನ್ನು ಉಂಟು ಮಾಡಿ ಪ್ರತಿಭಟಿಸಿದರು.

ಪ್ರತಿಪಕ್ಷಗಳು ಪ್ರತಿಭಟನೆ ನಡೆಸಿ ಸದನವನ್ನು ಬಹಿಷ್ಕರಿಸಿ ಹೊರಗೆ ತೆರಳಿದ ನಂತರ ಸದನದಲ್ಲಿ ಶಾಂತಿ ನೆಲೆಸಿತು. ಆಗ ರಾಜ್ಯಪಾಲರು ನಿರಾಳವಾಗಿ ಭಾಷಣ ಮಾಡಿದರು.