ಕಿಂಗ್ ಫಿಷರ್‌ನ 40 ಬ್ಯಾಂಕ್ ಖಾತೆ ಸ್ಥಗಿತ

ಮುಂಬೈ (ಪಿಟಿಐ): ನಿಗದಿತ ಗಡುವಿನೊಳಗೆ ಸುಮಾರು 40 ಕೋಟಿ ರೂಪಾಯಿಗಳ ತೆರಿಗೆ ಬಾಕಿ ಪಾವತಿಸದ ಕಾರಣಕ್ಕಾಗಿ ಈಗಾಗಲೇ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿರುವ ಕಿಂಗ್‌ಫಿಷರ್ ಏರ್‌ಲೈನ್ಸ್‌ನ 40ರಷ್ಟು ಬ್ಯಾಂಕ್ ಖಾತೆಗಳನ್ನು ಸೇವಾ ತೆರಿಗೆ ಇಲಾಖೆ ಮುಟ್ಟುಗೋಲು ಹಾಕಿಕೊಂಡಿದ್ದು, ಇದರಿಂದ ಸಂಸ್ಥೆ ಇನ್ನಷ್ಟು ಸಂಕಷ್ಟಕ್ಕೆ ಸಿಲುಕಿದೆ.

`ಕಿಂಗ್‌ಫಿಷರ್ ಏರ್‌ಲೈನ್ಸ್‌ನ ಸುಮಾರು 40 ಬ್ಯಾಂಕ್ ಖಾತೆಗಳನ್ನು ನಾವು ಗುರುವಾರ ಮತ್ತು ಶುಕ್ರವಾರ ಸ್ಥಗಿತಗೊಳಿಸಿದ್ದೇವೆ. ಸಂಸ್ಥೆಯು ನಮ್ಮ ಇಲಾಖೆಗೆ ರೂ 40 ಕೋಟಿಗಳ ಬಾಕಿ ಪಾವತಿಗೆ ವಿಧಿಸಲಾಗಿದ್ದ ಫೆಬ್ರುವರಿ 29ರ ಗಡುವಿಗೆ ಸ್ಪಂದಿಸಲು ವಿಫಲವಾಗಿರುವುದರಿಂದ ಈ ಕ್ರಮ ಕೈಗೊಂಡಿದ್ದೇವೆ~ ಎಂದು ಸೇವಾ ತೆರಿಗೆ ಆಯುಕ್ತ ಎಸ್.ಕೆ. ಸೋಲಂಕಿ ಶನಿವಾರ ತಿಳಿಸಿದರು.

ಕಳೆದ ನಾಲ್ಕು ತಿಂಗಳ ಅವಧಿಯಲ್ಲಿ ಇದು ಸತತ ನಾಲ್ಕನೇ ಬಾರಿಗೆ ಕಿಂಗ್‌ಫಿಷರ್ ಏರ್‌ಲೈನ್ಸ್ ಬ್ಯಾಂಕ್ ಖಾತೆಗಳನ್ನು ಸೇವಾ ತೆರಿಗೆ ಇಲಾಖೆ ಮುಟ್ಟುಗೋಲು ಹಾಕಿದೆ.