ಗಣಿ ಅಸ್ತ್ರ ಬಿಟ್ಟ ಪರಿಕ್ಕರ್

ಪಣಜಿ (ಪಿಟಿಐ): ಬಾಂಬೆ ಐಐಟಿ ಪದವೀಧರರಾದ 56 ವರ್ಷದ ಮನೋಹರ್ ಪರಿಕ್ಕರ್ ಮೂರನೇ ಬಾರಿಗೆ ರಾಜ್ಯದ ಮುಖ್ಯಮಂತ್ರಿಯಾಗಲು ಅಣಿಯಾಗುತ್ತಿದ್ದಾರೆ. ಶುದ್ಧ ವರ್ಚಸ್ಸು ಮತ್ತು ಅಭಿವೃದ್ಧಿಪರ ರಾಜಕಾರಣಕ್ಕೆ ಹೆಸರಾದವರು.
 
ತಮ್ಮ ಒರಟು ಮಾತಿನಿಂದಾಗಿ ಹಲವೊಮ್ಮೆ ವಿನಾಕಾರಣ ಸುದ್ದಿಯಾದದ್ದೂ ಉಂಟು. ಅಕ್ರಮ ಗಣಿಗಾರಿಕೆ ವಿಷಯವನ್ನು ಕೈಗೆತ್ತಿಕೊಂಡು ಕಾಂಗ್ರೆಸ್ ನೇತೃತ್ವದ ಸರ್ಕಾರದ ವಿರುದ್ಧ ಅವರು ಮೊಳಗಿಸಿದ ಕಹಳೆ, ಬಿಜೆಪಿಗೆ ಜಯ ತಂದು ಕೊಡುವಲ್ಲಿ ಯಶಸ್ವಿಯಾಗಿದೆ.

ಜನರೊಡನೆ ಸುಲಭವಾಗಿ ಬೆರೆಯಬಲ್ಲ ಗುಣದಿಂದಾಗಿ ಜನರ ನಾಡಿ ಮಿಡಿತ ಬಲ್ಲ ವ್ಯಕ್ತಿ ಎಂದೂ ಗುರುತಿಸಿಕೊಂಡಿದ್ದಾರೆ.

2000ನೇ ಇಸವಿಯಲ್ಲಿ ಮುಖ್ಯಮಂತ್ರಿಯಾಗಿ ಆಯ್ಕೆಯಾದಾಗ, ರಾಜ್ಯವೊಂದರ ಮುಖ್ಯಸ್ಥರಾದ ಮೊತ್ತಮೊದಲ ಐಐಟಿ ಪದವೀಧರ ಎಂಬ ಹೆಮ್ಮೆಗೂ ಪಾತ್ರರಾಗಿದ್ದರು.