ಚೀನಾ ಸೇರಿದಂತೆ ಎರಡೂ ಕಡೆಯ ಯುದ್ಧ ಎದುರಿಸುವ ಸಾಮರ್ಥ್ಯ ವಾಯುಪಡೆಗಿದೆ: ಬಿ.ಎಸ್. ಧನೋವಾ

ನವದೆಹಲಿ: ‘ಚೀನಾ ಸೇರಿದಂತೆ ಎರಡೂ ಕಡೆಯ ಯುದ್ಧವನ್ನು ಎದುರಿಸುವ ಸಾಮರ್ಥ್ಯ ಭಾರತೀಯ ವಾಯುಸೇನೆಗಿದೆ’ ಎಂದು ವಾಯುಪಡೆ ಮುಖ್ಯಸ್ಥ ಬಿ.ಎಸ್. ಧನೋವಾ ಹೇಳಿದ್ದಾರೆ.

ವಾಯುಪಡೆ ದಿನಾಚರಣೆಯ ಮುನ್ನಾದಿನವಾದ ಗುರುವಾರ ನವದೆಹಲಿಯಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಯಾವುದೇ ರೀತಿಯ ಯುದ್ಧಕ್ಕೆ ವಾಯುಸೇನೆ ಸಿದ್ಧವಿದೆ. ಗಡಿಯಲ್ಲಿ ಶತ್ರುಗಳನ್ನು ಗುರುತಿಸುವ ಹಾಗೂ ಅವರನ್ನು ನಿರ್ನಾಮ ಮಾಡುವ ಶಕ್ತಿ ವಾಯುಪಡೆಗಿದೆ’ ಎಂದು ಪಾಕಿಸ್ತಾನಕ್ಕೆ ಪರೋಕ್ಷವಾಗಿ ತಿರುಗೇಟು ನೀಡಿದ್ದಾರೆ.

‘ಭಾರತದೊಂದಿಗೆ ಚೀನಾ ಯುದ್ಧಕ್ಕೆ ಮುಂದಾದರೆ ಪಾಕಿಸ್ತಾನ ತನ್ನ ಬಹು ವರ್ಷಗಳ ಮಿತ್ರ ರಾಷ್ಟ್ರವಾದ ಚೀನಾ ಬೆಂಬಲಕ್ಕೆ ನಿಲ್ಲಬಹುದು. ಆಗ ಭಾರತವು ಏಕಕಾಲಕ್ಕೆ ಎರಡು ರಾಷ್ಟ್ರಗಳನ್ನು ಎದುರಿಸಬೇಕಾಗುತ್ತದೆ’ ಎಂದು ಭಾರತೀಯ ಸೇನೆಯ ಮುಖ್ಯಸ್ಥ ಜನರಲ್‌ ಬಿಪಿನ್‌ ರಾವತ್‌ ಕಳೆದ ತಿಂಗಳು ಎಚ್ಚರಿಕೆ ನೀಡಿದ್ದರು.