ನರೇಂದ್ರಕುಮಾರ್ ಹತ್ಯೆ: ಅಪರಿಚಿತರ ಮೇಲೆ ಪ್ರಕರಣ ದಾಖಲು

ನವದೆಹಲಿ(ಪಿಟಿಐ): ಐಪಿಎಸ್ ಅಧಿಕಾರಿ ನರೇಂದ್ರ ಕುಮಾರ್ ಹತ್ಯೆಗೆ ಸಂಬಂಧಿಸಿದ ಪ್ರಕರಣವನ್ನು ಕೈಗೆತ್ತಿಕೊಂಡಿರುವ ಸಿಬಿಐ ಅಪರಿಚಿತ ವ್ಯಕ್ತಿಗಳ ಮೇಲೆ ಪ್ರಕರಣ ದಾಖಲಿಸಿದೆ.

ನರೇಂದ್ರ ಹತ್ಯೆ ಕುರಿತಂತೆ ತನಿಖೆ ನಡೆಸುವಂತೆ ಕೇಂದ್ರ ಸಿಬಿಐಗೆ ಆದೇಶ ನೀಡಿತ್ತು. ಮತ್ತು ನರೇಂದ್ರಕುಮಾರ್ ಪತ್ನಿ ಒತ್ತಾಯದ ಮೇರೆಗೆ ಮಧ್ಯಪ್ರದೇಶ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾಣ್ ತನಿಖೆ ನಡೆಸುವಂತೆ ಸಿಬಿಐಗೆ ಮನವಿ ಸಲ್ಲಿಸಿದ್ದರು. ಈ ಬೆಳವಣಿಗೆಯ ಹಿನ್ನೆಲೆಯಲ್ಲಿ ಸಿಬಿಐನ ವಿಶೇಷ ಅಪರಾಧ ತನಿಖೆ ವಿಭಾಗ ಅಪರಿಚಿತ ವ್ಯಕ್ತಿಗಳ ಮೇಲೆ ದೂರು ದಾಖಲಿಸಿದೆ.

ಗಣಿ ಮಾಫಿಯಾ ಮಾಲೀಕತ್ವದ ಟ್ಯ್ರಾಕ್ಟರ್ ನರೇಂದ್ರ ಕುಮಾರ್ ಮೇಲೆ ಹರಿದು ಮಾರ್ಚ್ 8 ರಂದು ಅವರು ಮೃತಪಟ್ಟಿದ್ದರು. ಪ್ರಕರಣವನ್ನು ನ್ಯಾಯಾಂಗ ತನಿಖೆಗೆ ಈ ಮೊದಲು ಒಪ್ಪಿಸಲಾಗಿತ್ತು.