ನಸುಕಿನಲ್ಲಿಯೇ ಕಚೇರಿಗೆ ಹಾಜರಾದ ಚಾಂಡಿ

ತಿರುವನಂತಪುರ (ಪಿಟಿಐ): ಪ್ರತಿಭಟನೆಯ ಹಿನ್ನೆಲೆಯಲ್ಲಿ ಸಿಪಿಐ (ಎಂ) ಕಾರ್ಯಕರ್ತರು ಸಚಿವಾಲಯಕ್ಕೆ  ಮುತ್ತಿಗೆ ಹಾಕುವುದನ್ನು ತಿಳಿದ ಕೇರಳ ಮುಖ್ಯಮಂತ್ರಿ ಉಮ್ಮನ್ ಚಾಂಡಿ ಬೆಳಿಗ್ಗೆ 5 ಗಂಟೆಗೇ ಕಚೇರಿಗೆ ಹಾಜರಾದ ಘಟನೆ ನಡೆದಿದೆ.

ಬೆಲೆ ಏರಿಕೆಯನ್ನು ತಡೆಯುವಲ್ಲಿ ಕೇಂದ್ರ ಸರ್ಕಾರ ವಿಫಲವಾಗಿದೆ ಎಂದು ಆರೋಪಿಸಿದ ಸಿಪಿಐ (ಎಂ) ಬೆಳಿಗ್ಗೆ 6 ಗಂಟೆಯಿಂದಲೇ ಪ್ರತಿಭಟನೆಗೆ ಮುಂದಾಗಿದ್ದರು. ಇದನ್ನು ತಿಳಿದ ಮುಖ್ಯಮಂತ್ರಿ ಹಾಗೂ ಇತರ ನಾಲ್ವರು ಸಚಿವರು ಎಂಟು ಗಂಟೆಗೆ ನಿಗದಿಪಡಿಸಿದ್ದ ಸಚಿವ ಸಂಪುಟ ಸಭೆಗೆ ಬೆಳಿಗ್ಗೆ 5ಕ್ಕೇ ಹಾಜರಾದರು.
 
ಉಳಿದ ಸಚಿವರು ಬಳಿಕ ಕಾರ್ಯಾಲಯಕ್ಕೆ ಆಗಮಿಸಿದರು ಎಂದು ಮುಖ್ಯಮಂತ್ರಿ ಕಚೇರಿ ಮೂಲಗಳು ತಿಳಿಸಿವೆ.