ಜನಸಂಖ್ಯೆ ಕುರಿತ ಭಾಗವತ್‌ ಹೇಳಿಕೆ: ವಿರೋಧ– ಸ್ವಾಗತ

ನವದೆಹಲಿ: ಜನಸಂಖ್ಯೆ ಕುರಿತಂತೆ ಆರ್‌ಎಸ್‌ಎಸ್‌ ಮುಖ್ಯಸ್ಥ ಮೋಹನ್‌ ಭಾಗವತ್‌ ನೀಡಿರುವ ಹೇಳಿಕೆಗೆ ವಿರೋಧ ಪಕ್ಷಗಳು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದರೆ, ಬಿಜೆಪಿಯ ಹಲವು ನಾಯಕರು ಸಹಮತ
ವ್ಯಕ್ತಪಡಿಸಿದ್ದಾರೆ.

‘ಭಾರತದಲ್ಲಿ ಫಲವತ್ತತೆ ದರವು ಕುಸಿಯತೊಡಗಿದೆ. ಇದು ಹೀಗೇ ಮುಂದುವರಿದರೆ ನಮ್ಮ ಸಮಾಜವು ನಶಿಸಿಹೋಗುತ್ತದೆ. ಆದ್ದರಿಂದ ಪ್ರತಿಯೊಂದು ದಂಪತಿಗೆ ಕನಿಷ್ಠ ಮೂವರು ಮಕ್ಕಳು ಇರಬೇಕು’ ಎಂದು ಭಾಗವತ್‌ ಭಾನುವಾರ ಹೇಳಿದ್ದರು.

‘ಈಗ ಇರುವವರಿಗೇ ಉದ್ಯೋಗ ದೊರೆಯುತ್ತಿಲ್ಲ, ಆಹಾರ ಪದಾರ್ಥಗಳ ಬೆಲೆ ಗಗನಕ್ಕೇರಿದೆ. ಮೂವರು ಮಕ್ಕಳನ್ನು ಹೆತ್ತರೆ ದೇಶದ ಜನಸಂಖ್ಯೆಯು ಏರಿಕೆಯಾಗಲಿದೆ. ಮುಂದೆ ಜನಿಸುವ ಮಕ್ಕಳಿಗೆ ಎಲ್ಲಿಂದ ಮೂಲಸೌಕರ್ಯಗಳನ್ನು ಒದಗಿಸುತ್ತೀರಿ’ ಎಂದು ವಿರೋಧ ಪಕ್ಷಗಳ ನಾಯಕರು ಸೋಮವಾರ ಪ್ರಶ್ನಿಸಿದ್ದಾರೆ.

‘ರಾಜಕೀಯ ಕಾರ್ಯಸೂಚಿಗಾಗಿ ಇಂಥ ಹೇಳಿಕೆ ನೀಡಲಾಗುತ್ತದೆ. ಇದಕ್ಕೆಲ್ಲ ಸಾಮಾನ್ಯ ಜನರು ಬೆಲೆ ತೆರಬೇಕಾಗು ತ್ತದೆ. ಸೂಕ್ತ ರೀತಿಯಲ್ಲಿ ಜನಸಂಖ್ಯೆಯನ್ನು ನಿರ್ವಹಿಸಿದರೆ, ದೇಶಕ್ಕೆ ಆಸ್ತಿಯಾಗಲಿದೆ. ಆದರೆ, ಹಾಗೆ ಮಾಡಲಾಗುತ್ತಿಲ್ಲ. ದೇಶದಲ್ಲಿ ಉತ್ಪಾದನೆಯನ್ನು ಆರಂಭಿಸಬೇಕು, ಆಗ ಜನರಿಗೆ ಉದ್ಯೋಗ ದೊರೆಯುತ್ತದೆ. ಆದರೆ, ಕೇಂದ್ರ ಸರ್ಕಾರ ಇದನ್ನು ಮಾಡುತ್ತಿಲ್ಲ’ ಎಂದು ಆಜಾದ್‌ ಸಮಾಜ್‌ ಪಕ್ಷದ (ಕಾನ್ಶಿರಾಮ್‌) ಸಂಸದ ಚಂದ್ರಶೇಖರ್‌ ಅಭಿಪ್ರಾಯಪಟ್ಟಿದ್ದಾರೆ. 

‘ಜನಸಂಖ್ಯೆ ವಿಚಾರದಲ್ಲಿ ಭಾಗವತ್‌ ಅವರ ಹೇಳಿಕೆಗೆ ವ್ಯತಿರಿಕ್ತವಾದ ಹೇಳಿಕೆಗಳನ್ನು ಬಿಜೆಪಿ ನಾಯಕರು ಈ ಹಿಂದೆ ನೀಡಿದ್ದಾರೆ. ದೇಶದ ಜನಸಂಖ್ಯೆ ಯನ್ನು ನಿಯಂತ್ರಿಸಬೇಕು ಎಂದು ಹಲವರು ಹೇಳಿದ್ದರು. ಈ ವಿರೋಧಾಭಾಸಗಳನ್ನು ಸರಿಪಡಿಸಿಕೊಂಡು ಕೇಂದ್ರ ಸರ್ಕಾರವು ನೀತಿ ರೂಪಿಸಬೇಕು’ ಎಂದು ಕಾಂಗ್ರೆಸ್‌ ಸಂಸದ ತಾರಿಕ್ ಅನ್ವರ್‌ ಹೇಳಿದ್ದಾರೆ.

ಭಾಗವತ್ ಮಾತು ರಾಷ್ಟ್ರೀಯ ನೀತಿಗೆ ವಿರುದ್ಧ (ಬೆಂಗಳೂರು ವರದಿ): ‘ಮೋಹನ್ ಭಾಗವತ್ ಅವರ ಹೇಳಿಕೆ ರಾಷ್ಟ್ರೀಯ ನೀತಿಗೆ ವಿರುದ್ಧವಾದುದು’ ಎಂದು ಸಮಾಜ ಕಲ್ಯಾಣ ಸಚಿವ ಡಾ. ಎಚ್‌.ಸಿ. ಮಹದೇವಪ್ಪ ಅಭಿಪ್ರಾಯಪಟ್ಟಿದ್ದಾರೆ.

‘ದೇಶದ ಜನರು ಸಮಾನವಾದ ಘನತೆಯ ಬದುಕು ನಡೆಸಲು ಜನಸಂಖ್ಯಾ ಸ್ಫೋಟವೇ ಅಡ್ಡಿ. ಹೀಗಿರುವಾಗ, ಮೋಹನ್ ಭಾಗವತ್ ಅವರು ಜವಾಬ್ದಾರಿ ಅರಿತು ಮಾತನಾಡಬೇಕು’ ಎಂದಿದ್ದಾರೆ.