ಬಿಜೆಪಿಗೆ ₹785 ಕೋಟಿ ದೇಣಿಗೆ

ನವದೆಹಲಿ: ಕಾಂಗ್ರೆಸ್‌, ಟಿಎಂಸಿ ಮತ್ತು ಎನ್‌ಸಿಪಿ ಸೇರಿ ಐದು ಪ್ರಮುಖ ಪಕ್ಷಗಳಿಗೆ ಸಂದಾಯವಾಗಿರುವ ದೇಣಿಗೆಗಿಂತ ಮೂರು ಪಟ್ಟು ಹೆಚ್ಚು ದೇಣಿಗೆ ಬಿಜೆಪಿಗೆ ಸಿಕ್ಕಿದೆ. ಬಿಜೆಪಿಗೆ ಒಟ್ಟು ₹785.77 ಕೋಟಿ ಸಂದಾಯವಾಗಿದೆ ಎಂದು ಸರ್ಕಾರೇತರ ಸಂಸ್ಥೆ ಅಸೋಸಿಯೇಷನ್‌ ಫಾರ್‌ ಡೆಮಾಕ್ರಟಿಕ್‌ ರಿಫಾರ್ಮ್ಸ್ (ಎಡಿಆರ್‌) ವರದಿಯು ಹೇಳಿದೆ.

ಚುನಾವಣಾ ಆಯೋಗಕ್ಕೆರಾಷ್ಟ್ರೀಯ ಪಕ್ಷಗಳು ಸಲ್ಲಿಸಿರುವ 2019–21ರ ಸಾಲಿನ ದೇಣಿಗೆ ವರದಿಯನ್ನು ಆಧರಿಸಿ, ₹20,000 ಮೇಲ್ಪಟ್ಟು ಸಲ್ಲಿಕೆಯಾಗಿರುವ ದೇಣಿಗೆಗಳನ್ನು ಗಮನದಲ್ಲಿರಿಸಿಕೊಂಡು ಈ ವರದಿಯನ್ನು ಎಡಿಆರ್‌ ತಯಾರಿಸಿದೆ. ಬಿಜೆಪಿಗೆ ₹ 785.77 ಕೋಟಿ ದೇಣಿಗೆ ಸಿಕ್ಕಿದ್ದರೆ, ಕಾಂಗ್ರೆಸ್‌, ಎನ್‌ಸಿಪಿ, ಸಿಪಿಐ, ಸಿಪಿಎಂ ಮತ್ತು ಟಿಎಂಸಿಗೆ ಒಟ್ಟಾಗಿ ₹228 ಕೋಟಿ ಸಲ್ಲಿಕೆ ಆಗಿದೆ.

ಬಿಜೆಪಿಯು 570 ದಾನಿಗಳು ನೀಡಿರುವ ಒಟ್ಟು ₹149.8 ಕೋಟಿ ಮೊತ್ತದ ದೇಣಿಗೆಯನ್ನು ಘೋಷಿಸಿದೆ. ತೃಣಮೂಲ ಕಾಂಗ್ರೆಸ್‌ 52 ದಾನಿಗಳಿಂದ ₹7.1 ಕೋಟಿ, ಕಾಂಗ್ರೆಸ್‌ 25 ದಾನಿಗಳಿಂದ ₹2.6 ಕೋಟಿ ಮತ್ತು ಎನ್‌ಸಿಪಿ ಇಬ್ಬರು ದಾನಿಗಳಿಂದ ₹3 ಕೋಟಿ ದೇಣಿಗೆ ಪಡೆದಿರುವುದಾಗಿ ಘೋಷಿಸಿವೆ. ₹20 ಸಾವಿರಕ್ಕಿಂತ ಕಡಿಮೆ ದೇಣಿಗೆಯ ವಿವರಗಳನ್ನು ಬಹಿರಂಗಪಡಿಸಬೇಕಿಲ್ಲ.

ಮೇಯರ್‌ ಮತ್ತು ಉಪ ಮೇಯರ್‌ ಇಬ್ಬರೂ ಬಿಜೆಪಿಯವರೇ ಆಗಿರುವ ಮಹಾರಾಷ್ಟ್ರದ ಅಮರಾವತಿ ಮಹಾನಗರ ಪಾಲಿಕೆಯಿಂದಲೂ ₹4.80 ಲಕ್ಷ ದೇಣಿಗೆಯನ್ನುಬಿಜೆಪಿ ಪಡೆದಿದೆ. ಈ ದೇಣಿಗೆಗೆ ಸಂಬಂಧಪಟ್ಟಂತೆ ವಿಳಾಸ, ಬ್ಯಾಂಕ್‌ ಹೆಸರು, ಪ್ಯಾನ್‌ ಮಾಹಿತಿ ಸೇರಿ ಇತರ ಮಾಹಿತಿಗಳನ್ನು ಪಕ್ಷ ಒದಗಿಸಿಲ್ಲ. ಇಂಟರ್‌ನೆಟ್‌ನಲ್ಲಿ ಹುಡುಕಿದಾಗ ಈ ದೇಣಿಗೆಯು ಅಮರಾವತಿ ನಗರಪಾಲಿಕೆಯಿಂದ ಬಂದಿದೆ ಎಂದು ತಿಳಿದುಬಂದಿತು. ಒಂದು ರಾಜಕೀಯ ಪಕ್ಷ ಆಡಳಿತ ನಡೆಸುತ್ತಿರುವ ಸ್ಥಳೀಯ ಸಂಸ್ಥೆಯೊಂದು ಪಕ್ಷಕ್ಕೆ ದೇಣಿಗೆ ನೀಡಿರುವುದು ಕಾನೂನು ಪ್ರಕಾರವಾಗಿ ಎಷ್ಟು ಸರಿ ಎಂಬ ಪ್ರಶ್ನೆ ಎದ್ದಿವೆ ಎಂದು ಎಡಿಆರ್‌ ಹೇಳಿದೆ.