ತ್ರಿ‍ಪುರಾ: ಗೋಮತಿ ನದಿ ಹೂಳೆತ್ತಲು ₹ 24 ಕೋಟಿ ಮಂಜೂರು

ಅಗರ್ತಲಾ: ಭಾರತ ಹಾಗೂ ಬಾಂಗ್ಲಾದೇಶ ನಡುವೆ ಹರಿಯುವ ಗೋಮತಿ ನದಿಯಲ್ಲಿ ಹೂಳೆತ್ತುವ ಕಾಮಗಾರಿಗಾಗಿ ಕೇಂದ್ರ ಸರ್ಕಾರ ₹ 24 ಕೋಟಿ ಮಂಜೂರು ಮಾಡಿದೆ ಎಂದು ಅಧಿಕಾರಿಗಳು ಭಾನುವಾರ ಹೇಳಿದ್ದಾರೆ.

ಭಾರತ–ಬಾಂಗ್ಲಾದೇಶ ನಡುವಿನ ಉದ್ದೇಶಿತ ಜಲಮಾರ್ಗ ಯೋಜನೆಗೆ ಇದರಿಂದ ಮತ್ತಷ್ಟು ಉತ್ತೇಜನ ಸಿಗಲಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ತ್ರಿಪುರಾದ ಸೆಪಾಹಿಜಾಲಾ ಜಿಲ್ಲೆಯ ಸೋನಾಮುರದಿಂದ ನೆರೆಯ ಬಾಂಗ್ಲಾದೇಶದ ದೌಡ್‌ಕಂಡಿ ವರೆಗಿನ 93 ಕಿ.ಮೀ. ಉದ್ದದ ಉದ್ದೇಶಿತ ಜಲಮಾರ್ಗವನ್ನು ಈ ಯೋಜನೆ ಒಳಗೊಂಡಿದೆ. ಈ ಪೈಕಿ 15.5 ಕಿ.ಮೀ. ಉದ್ದದ ಮಾರ್ಗದಲ್ಲಿನ ಹೂಳನ್ನು ಎತ್ತಿದರೆ, ಜಲಮಾರ್ಗ ಬಳಕೆಗೆ ಮುಕ್ತವಾಗಲಿದೆ ಎಂದು ತ್ರಿಪುರಾದ ಸಾರಿಗೆ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಎಲ್‌.ಡರ್ಲೋಂಗ್ ತಿಳಿಸಿದ್ದಾರೆ.