ದೆಹಲಿ ಮೆಟ್ರೊದಲ್ಲಿ 4 ಸಾವಿರ ಕಳ್ಳತನ ಪ್ರಕರಣ ವರದಿ: ಪೊಲೀಸ್ ಇಲಾಖೆ

ನವದೆಹಲಿ: 2024 ಜನವರಿಯಿಂದ ಇಲ್ಲಿಯವರೆಗೆ ದೆಹಲಿ ಮೆಟ್ರೊದಲ್ಲಿ ಸುಮಾರು 3,952 ಕಳ್ಳತನ ಪ್ರಕರಣಗಳು ವರದಿಯಾಗಿವೆ ಎಂದು ಪೊಲೀಸ್ ಇಲಾಖೆಯ ದತ್ತಾಂಶಗಳು ತಿಳಿಸಿವೆ.

ಕಳೆದ ವರ್ಷ ಸೆಪ್ಟೆಂಬರ್ 8ರವರೆಗೆ ಸುಮಾರು 3,709 ಕಳ್ಳತನ ಪ್ರಕರಣಗಳು ವರದಿಯಾಗಿದ್ದವು. ಇದಕ್ಕೆ ಹೋಲಿಸಿದರೆ ಈ ವರ್ಷ ಕಳ್ಳತನ ಪ್ರಕರಣಗಳ ಸಂಖ್ಯೆಯಲ್ಲಿ ಹೆಚ್ಚಳವಾಗಿದೆ.

ವರದಿಯಾದ ಪ್ರಕರಣಗಳಲ್ಲಿ ಕಿಸೆಕಳ್ಳತನ, ಮೊಬೈಲ್‌ ಮತ್ತು ಬೆಲೆಬಾಳುವ ವಸ್ತಗಳ ಕಳ್ಳತನ ಪ್ರಕರಣಗಳು ಸೇರಿವೆ ಎಂದು ತಿಳಿಸಿವೆ.

ಸುದ್ದಿಸಂಸ್ಥೆ ಪಿಟಿಐಗೆ ದೊರೆತ ಮಾಹಿತಿ ಪ್ರಕಾರ, ಒಟ್ಟು 3,952 ಪ್ರಕರಣಗಳಲ್ಲಿ ಕನಿಷ್ಠ 3,898 ಕಳ್ಳತನ ಪ್ರಕರಣಗಳು ಇ-ಎಫ್‌ಐಆರ್‌ಗಳ ಮೂಲಕ ದಾಖಲಾಗಿವೆ. ಅವುಗಳಲ್ಲಿ 548 ಪ್ರಕರಣಗಳನ್ನು ಈ ವರ್ಷ ಸೆಪ್ಟೆಂಬರ್ 8ರ ಒಳಗೆ ಪರಿಹರಿಸಲಾಗಿದೆ.

ಈ ವರ್ಷ ಸೆಪ್ಟೆಂಬರ್ 8 ರವರೆಗೆ ಕನಿಷ್ಠ 81 ಮೋಟಾರು ವಾಹನ ಕಳ್ಳತನ ಪ್ರಕರಣಗಳು, ಐದು ದರೋಡೆ ಪ್ರಕರಣಗಳು ದಾಖಲಾಗಿವೆ. ಕಳೆದ ವರ್ಷ 72 ಮೋಟಾರು ವಾಹನ ಕಳ್ಳತನ ಪ್ರಕರಣಗಳು, 1 ದರೋಡೆ ಪ್ರಕರಣ ವರದಿಯಾಗಿತ್ತು.