ಮಹಾರಾಷ್ಟ್ರ: ಕಚೇರಿ ನಾಮಫಲಕದಲ್ಲಿ ತಾಯಿ ಹೆಸರು ಸೇರಿಸಿದ ಶಿಂದೆ

ಮುಂಬೈ: ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ ಶಿಂದೆ ಅವರು ರಾಜ್ಯ ಸಚಿವಾಲಯದಲ್ಲಿರುವ ಕಚೇರಿ ಹೊರಗಿನ ನಾಮಫಲಕದಲ್ಲಿ ತಮ್ಮ ಹೆಸರಿನ ಜೊತೆಗೆ ತಾಯಿಯ ಹೆಸರನ್ನೂ ಸೇರಿಸಿದ್ದಾರೆ.

ಈ ಹಿಂದೆ ಅವರು ನಾಮಫಲಕದಲ್ಲಿ ತಮ್ಮ ಹೆಸರಿನ ಜೊತೆಗೆ ತಂದೆಯ ಹೆಸರನ್ನು ಸೇರಿಸಿದ್ದರು.

‘ಏಕನಾಥ ಗಂಗೂಬಾಯಿ ಸಂಬಾಜಿ ಶಿಂದೆ’ ಎಂದು ಹೊಸ ನಾಮಫಲಕ ಹಾಕಲಾಗಿದೆ.

2024ರ ಮೇ 1ರ ನಂತರ ಹುಟ್ಟುವ ಮಕ್ಕಳ ಆಧಾರ್‌, ಪ್ಯಾನ್‌ನಂತಹ ಸರ್ಕಾರಿ ದಾಖಲೆಗಳಲ್ಲಿ ಕಡ್ಡಾಯವಾಗಿ ತಾಯಿಯ ಹೆಸರನ್ನು ನಮೂದಿಸಬೇಕು ಎಂದು ಈಚೆಗೆ ಸಚಿವ ಸಂಪುಟ ಸಭೆ ನಿರ್ಧಾರ ಕೈಗೊಂಡಿತ್ತು. ಈ ಕಾರಣಕ್ಕೆ ಶಿಂದೆ ಅವರು ತಮ್ಮ ಹೆಸರಿನ ಜೊತೆಗೆ ತಾಯಿಯ ಹೆಸರನ್ನು ಸೇರಿಸಿಕೊಂಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.