ರಾಜಸ್ಥಾನ: 25 ಪುರುಷರಿಗೆ ‘ಮದುವೆಯ ಬಲೆ’ ಬೀಸಿದ್ದ 23ರ ಚೆಲುವೆಯ ಸೆರೆ

ಜೈಪುರ: ಮದುವೆಯಾಗುವ ಆಸೆ ತೋರಿಸಿ 25ಕ್ಕೂ ಅಧಿಕ ಜನರಿಂದ ನಗದು ಹಾಗೂ ಬೆಲೆಬಾಳುವ ವಸ್ತುಗಳನ್ನು ದೋಚಿ, ಪರಾರಿಯಾಗಿದ್ದ ಯುವತಿ ಪೊಲೀಸರಿಗೆ ಸಿಕ್ಕಿಬಿದ್ದಿದ್ದಾಳೆ.

ಭೋಪಾಲ್ ಮೂಲದ ಅನುರಾಧ(23) ಎಂಬುವವರು ಆರೋಪಿಯಾಗಿದ್ದು, ಸವಾಯಿ ಮಾಧೋಪುರ್ ಪೊಲೀಸರು ಮೇ.18ರಂದು ಬಂಧಿಸಿದ್ದಾರೆ.

ಆರೋಪಿಯು ನಕಲಿ ಮದುವೆ ಮಾಡಿಕೊಂಡ ನಂತರ ನಗದು, ಬೆಲೆಬಾಳುವ ವಸ್ತುಗಳು ಹಾಗೂ ಮೊಬೈಲ್ ಪೋನ್‌ ಜೊತೆಗೆ ಪರಾರಿಯಾಗಿರುವ ಕುರಿತು ಹಲವು ಪ್ರಕರಣಗಳು ದಾಖಲಾಗಿದ್ದವು ಎಂದು ಪೊಲೀಸರು ತಿಳಿಸಿದರು.

ವಿಷ್ಣು ಗುಪ್ತಾ ಎಂಬುವವರು ದಾಖಲಿಸಿದ್ದ ಎಫ್‌ಐಆರ್‌ ಆಧಾರದ ಮೇಲೆ ಪ್ರಕರಣವನ್ನು ಕೈಗೆತ್ತಿಕೊಳ್ಳಲಾಗಿತ್ತು, ವಿವಿಧ ರಾಜ್ಯಗಳಲ್ಲಿ ಇದೇ ರೀತಿಯ ಹಲವು ಘಟನೆಗಳಲ್ಲಿ ಈ ಯುವತಿಯು ಭಾಗಿಯಾಗಿರುವುದು ಪತ್ತೆಯಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದರು.

ಭೋಪಾಲ್‌ನಲ್ಲಿ ನಕಲಿ ಮದುವೆ ಮಾಡಿಸುವ ಜಾಲವೊಂದು ಬೆಳಕಿಗೆ ಬಂದಿದ್ದು, ಅದರ ಕುರಿತು ಹೆಚ್ಚಿನ ತನಿಖೆ ಮಾಡಲಾಗುತ್ತಿದೆ ಎಂದರು.