ನಾಗಾಲ್ಯಾಂಡ್‌: ಅಮೂಲ್ಯ ಖನಿಜಗಳ ಬಗ್ಗೆ ತನಿಖೆ ನಡೆಸಲು ಸೂಚನೆ

ಕೊಹಿಮಾ: ನಾಗಾಲ್ಯಾಂಡ್‌ನ ಮೊನ್‌ ಜಿಲ್ಲೆಯಲ್ಲಿ ವಿವಿಧ ರೀತಿಯ ಅಮೂಲ್ಯ ಖನಿಜಗಳು ದೊರಕಿವೆ ಎಂಬ ಸಾಮಾಜಿಕ ಜಾಲತಾಣದ ಪೋಸ್ಟ್‌ಗಳ ಆಧಾರದ ಮೇರೆಗೆ ಈ ಬಗ್ಗೆ ತನಿಖೆ ನಡೆಸುವಂತೆ ಭೂವಿಜ್ಞಾನಿಗಳಿಗೆ ಅಲ್ಲಿನ ಸರ್ಕಾರ ಸೂಚಿಸಿದೆ.

ಈ ಬಗ್ಗೆ ನಾಗಾಲ್ಯಾಂಡ್‌ನ ಭೂವಿಜ್ಞಾನ ಮತ್ತು ಗಣಿಗಾರಿಕೆಯ ನಿರ್ದೇಶಕ ಎಸ್.ಮಾನೆನ್ ಅವರು ಗುರುವಾರ ಆದೇಶ ಹೊರಡಿಸಿದ್ದಾರೆ.

ಭೂವಿಜ್ಞಾನಿಗಳಾದ ಅಬೆಂಥುಂಗ್ ಲೋಥಾ, ಲಾಂಗ್ರಿಕಾಬಾ, ಕೆನ್ಯೆಲೊ ರೆಂಗ್ಮಾ ಮತ್ತು ಡೇವಿಡ್ ಲುಪೆನಿ ಅವರಿಗೆ ಅಮೂಲ್ಯ ಖನಿಜಗಳ ಬಗ್ಗೆ ತನಿಖೆ ನಡೆಸಿ, ಆದಷ್ಟು ಬೇಗ ವರದಿ ಸಲ್ಲಿಸುವಂತೆ ಆದೇಶದಲ್ಲಿ ಹೇಳಲಾಗಿದೆ.

ವಾಚಿಂಗ್ ಪ್ರದೇಶದಲ್ಲಿ ವಜ್ರಗಳ ಸಿಕ್ಕಿವೆ ಎಂಬ ಸುದ್ದಿ ಭಾರೀ ಸದ್ದು ಮಾಡಿತ್ತು. ಇದರ ಫೋಟೊಗಳು ಮತ್ತು ಗ್ರಾಮಸ್ಥರು ವಜ್ರಗಳಿಗಾಗಿ ಭೂಮಿ ಅಗೆಯುತ್ತಿರುವ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿವೆ.