ಪಾಕ್‌ ಜೈಲಲ್ಲಿದ್ದ ಭಾರತೀಯನ ಬಿಡುಗಡೆ ಶೀಘ್ರ

ಜೈಪುರ (ಪಿಟಿಐ): 36 ವರ್ಷಗಳಿಂದ ಪಾಕಿಸ್ತಾನದ ಜೈಲಿನಲ್ಲಿದ್ದ ಭಾರತ ಮೂಲದ ಗಜಾನಂದ ಎಂಬುವರಿಗೆ ಕೊನೆಗೂ ಬಿಡುಗಡೆ ಭಾಗ್ಯ ಸಿಕ್ಕಿದೆ. ಸದ್ಯ 68 ವರ್ಷ ವಯೋಮಾನದ ಗಜಾನಂದ ಅವರನ್ನು ಪಾಕಿಸ್ತಾನದ ಸ್ವಾತಂತ್ರ್ಯ ದಿನಾಚರಣೆ ಅಂಗವಾಗಿ ಬಿಡುಗಡೆ ಮಾಡಲಾಗುತ್ತದೆ ಎಂದು ವಿದೇಶಾಂಗ ಖಾತೆ ರಾಜ್ಯ ಸಚಿವ ವಿ.ಕೆ.ಸಿಂಗ್‌ ತಿಳಿಸಿದ್ದಾರೆ.

ಲಾಹೋರ್‌ ಜೈಲಿನಲ್ಲಿರುವ ಗಜಾನಂದ ಅವರನ್ನು ಆ. 13ರಂದು ಬಿಡುಗಡೆ ಮಾಡುವ ಸಾಧ್ಯತೆ ಇದೆ.

‘ಗಜಾನಂದ ಹೇಗೆ ಪಾಕಿಸ್ತಾನ ಪ್ರವೇಶಿಸಿದ ಎಂಬ ಬಗ್ಗೆ ಮಾಹಿತಿ ಇಲ್ಲ. ಗಡಿ ದಾಟಿ ಹೋಗಿದ್ದ ಗಜಾನಂದಗೆ ಪಾಕಿಸ್ತಾನ ಸರ್ಕಾರ ಎರಡು ತಿಂಗಳು ಜೈಲು ಶಿಕ್ಷೆ ವಿಧಿಸಿತ್ತು. ಆ ನಂತರ ಭಾರತ ರಾಯಭಾರಿ ಕಚೇರಿ ಸಂಪರ್ಕ ಸಿಗದ ಕಾರಣ ಗಜಾನಂದ ಇಷ್ಟು ವರ್ಷಗಳ ಕಾಲ ಜೈಲಿನಲ್ಲಿ ಇರಬೇಕಾಯಿತು’ ಎಂದು ಜೈಪುರ ಸಂಸದ ರಾಮಚರಣ್‌ ಬೊಹ್ರಾ ತಿಳಿಸಿದ್ದಾರೆ.