ಶಬರಿಮಲೆಯಲ್ಲಿ ಚಿನ್ನ ಕಳವು:ತಿರುವಾಭರಣಂ ಮಾಜಿ ಆಯುಕ್ತರನ್ನು ಪ್ರಶ್ನಿಸಿದ ಎಸ್‌ಐಟಿ
ಶಬರಿಮಲೆ ದೇಗುಲದಲ್ಲಿ ಚಿನ್ನ ಕಳವು ಪ್ರಕರಣ
ಕೊಲ್ಲಂ: ಶಬರಿಮಲೆ ದೇವಸ್ಥಾನದ ಚಿನ್ನ ಕಳವಿನ ಬಗ್ಗೆ ತನಿಖೆ ನಡೆಸುತ್ತಿರುವ ಎಸ್‌ಐಟಿಯು ತಿರುವಾಭರಣಂನ (ಪವಿತ್ರ ಆಭರಣ) ಮಾಜಿ ಆಯುಕ್ತ ಕೆ.ಎಸ್‌. ಬೈಜು ಅವರನ್ನು ಪ್ರಶ್ನಿಸಿದೆ.
ವಿಶೇಷ ತನಿಖಾ ತಂಡವು (ಎಸ್‌ಐಟಿ) ಸಲ್ಲಿಸಿದ್ದ ಅರ್ಜಿಯನ್ನು ಪರಿಗಣಿಸಿದ ಕೊಲ್ಲಂ ವಿಜಿಲೆನ್ಸ್‌ ಕೋರ್ಟ್‌ ಶನಿವಾರ ಸಂಜೆಯವರೆಗೂ ಬೈಜು ಅವರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲು ಅನುಮತಿ ನೀಡಿತ್ತು.
ದೇಗುಲದ ದ್ವಾರಪಾಲಕ ವಿಗ್ರಹಗಳ ಚಿನ್ನ ಲೇಪಿತ ಕವಚಗಳನ್ನು ಎಲೆಕ್ಟ್ರೋಪ್ಲೇಟಿಂಗ್‌ಗಾಗಿ 2019ರಲ್ಲಿ ತೆಗೆದಾಗ ಬೈಜು ಅವರು ತಿರುವಾಭರಣಂನ ಆಯುಕ್ತರಾಗಿದ್ದರು. ಇದೀಗ ಸೇವೆಯಿಂದ ನಿವೃತ್ತರಾಗಿದ್ದಾರೆ.
ಜುಲೈ 19, 20ರಂದು ದ್ವಾರಪಾಲಕ ವಿಗ್ರಹಗಳಿಗೆ ಹೊದಿಸಲಾಗಿದ್ದ ಚಿನ್ನದ ಕವಚ ತೆಗೆದು, ಆರೋಪಿ ಉನ್ನಿಕೃಷ್ಣನ್‌ ಪೊಟ್ಟಿಗೆ ಹಸ್ತಾಂತರಿಸುವ ಸಂದರ್ಭ ಬೈಜು ರಜೆಯಲ್ಲಿದ್ದರು ಎಂದು ಮೂಲಗಳು ತಿಳಿಸಿವೆ.
ಕಳವು ಪ್ರಕರಣಕ್ಕೆ ಸಂಬಂಧಿಸಿದಂತೆ ನವೆಂಬರ್ ಆರಂಭದಲ್ಲಿ ಎಸ್‌ಐಟಿ ಬೈಜು ಅವರನ್ನು ಬಂಧಿಸಿತ್ತು.
ಚಿನ್ನ ಲೇಪಿತ ಕವಚಗಳನ್ನು ತೆಗೆದುಕೊಳ್ಳಲು ಪೊಟ್ಟಿಗೆ ಅನುಮತಿ ನೀಡಲು ಅಳವಡಿಸಿಕೊಂಡಿದ್ದ ಕಾರ್ಯವಿಧಾನದ ಬಗ್ಗೆ ಬೈಜು ಅವರನ್ನು ಪ್ರಶ್ನಿಸಲಾಗಿದೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
ಶ್ರೀಕೋವಿಲ್‌ನ (ಗರ್ಭಗುಡಿ) ಬಾಗಿಲಿನ ಚೌಕಟ್ಟುಗಳಲ್ಲಿನ ಚಿನ್ನ ಕಳವು ಪ್ರಕರಣಕ್ಕೆ ಸಂಬಂಧಿಸಿದ ಎರಡನೇ ಪ್ರಕರಣದಲ್ಲಿ ಬೈಜು ಸಲ್ಲಿಸಿದ್ದ ಜಾಮೀನು ಅರ್ಜಿಯನ್ನು ವಿಜಿಲೆನ್ಸ್‌ ನ್ಯಾಯಾಲಯವು ವಜಾಗೊಳಿಸಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.