ಅಂಬಿಕಾತನಯದತ್ತ ಪ್ರಶಸ್ತಿಗೆ ಕಾಪಸೆ, ಕೃಷ್ಣಪ್ಪ ಆಯ್ಕೆ

ಧಾರವಾಡ: ಇಲ್ಲಿಯ ಹಿರಿಯ ಸಾಹಿತಿ ಡಾ.ಗುರುಲಿಂಗ ಕಾಪಸೆ ಹಾಗೂ ನಿವೃತ್ತ ಸಾರಿಗೆ ಅಧಿಕಾರಿ ಬೆಂಗಳೂರಿನ ಡಾ.ಜಿ.­ಕೃಷ್ಣಪ್ಪ (ಬೇಂದ್ರೆ ಕೃಷ್ಣಪ್ಪ) ಈ ಸಾಲಿನ ‘ಅಂಬಿಕಾತನಯದತ್ತ ರಾಷ್ಟ್ರೀಯ ಪ್ರಶಸ್ತಿ’ಗೆ ಆಯ್ಕೆಯಾಗಿದ್ದಾರೆ.

‘ಪ್ರಶಸ್ತಿಯು ರೂ. 1 ಲಕ್ಷ ನಗದು ಬಹುಮಾನ ಹೊಂದಿದ್ದು, ತಲಾ ರೂ. 50 ಸಾವಿರ­ದಂತೆ ಬಹುಮಾನದ ಮೊತ್ತ­ವನ್ನು ಇಬ್ಬರಿಗೂ ವಿತರಿಸಲಾಗುವುದು’ ಎಂದು  ದ.ರಾ.ಬೇಂದ್ರೆ ರಾಷ್ಟ್ರೀಯ ಸ್ಮಾರಕ ಟ್ರಸ್ಟ್‌ ಅಧ್ಯಕ್ಷ ಡಾ.­ಶ್ಯಾಮ­ಸುಂದರ ಬಿದರಕುಂದಿ ಶುಕ್ರವಾರ ಪ್ರಕಟಿಸಿದರು. ‘ಬೇಂದ್ರೆ ಅವರ 119ನೇ ಜನ್ಮದಿನದ ಅಂಗವಾಗಿ ಇದೇ 31ರಂದು ನಡೆಯುವ ಸಮಾರಂಭದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಗುವುದು’ ಎಂದು ಹೇಳಿದರು.