‘ಒಡೇಮಾ’ ರೋಗದಿಂದ ಬಳಲುತ್ತಿದ್ದ ಆನೆ ಸಾವು

ಹುಣಸೂರು: ನಾಗರಹೊಳೆ ರಾಷ್ಟ್ರೀಯ ಉದ್ಯಾನದ ಕಂಠಾಪುರ ಆನೆ ಶಿಬಿರದಲ್ಲಿ ಒಡೇಮಾ ರೋಗದಿಂದ ಬಳಲುತ್ತಿದ್ದ 47 ವರ್ಷದ ಸಲಗ ಶನಿವಾರ ಮೃತಪಟ್ಟಿತು.

ಚಾಮರಾಜನಗರ ಜಿಲ್ಲೆ ಕೊಳ್ಳೆಗಾಲ ವ್ಯಾಪ್ತಿಯ ಅರಣ್ಯದಲ್ಲಿ ಈ ಆನೆಯ ಉಪಟಳ ಹೆಚ್ಚಾಗಿದ್ದರಿಂದ ಒಂದು ವರ್ಷದ ಹಿಂದೆ ಸೆರೆ ಹಿಡಿದು ಕುಂಠಾಪುರ ಶಿಬಿರಕ್ಕೆ ತರಲಾಗಿತ್ತು.

‘20 ದಿನಗಳಿಂದ ಬಳಲುತ್ತಿದ್ದ ಸಲಗ ಆಹಾರ, ನೀರು ತ್ಯಜಿಸಿತ್ತು. ಸೊಂಡಿಲಿನ ಭಾಗದಲ್ಲಿ ನೀರು ಶೇಖರಣೆಯಾಗಿ ಆಹಾರ ಸೇವಿಸಲು ಆಗುತ್ತಿರಲಿಲ್ಲ. ತೀವ್ರ ನೋವಿನಿಂದ ಬಳಲುತ್ತಿತ್ತು’ ಎಂದು ಪಶುವೈದ್ಯ ಡಾ.ಮುಜೀಬ್‌ ರೆಹಮಾನ್‌ ತಿಳಿಸಿದ್ದಾರೆ.

ನಾಗರಹೊಳೆ ಎಸಿಎಫ್‌ ಪ್ರಸನ್ನಕುಮಾರ್‌, ವಲಯ ಅರಣ್ಯಾಧಿಕಾರಿ ಕಿರಣ್‌ ಕುಮಾರ್‌ ಸಮ್ಮುಖದಲ್ಲಿ ಡಾ.ಮುಜೀಬ್‌ ರೆಹಮಾನ್‌ ಮರಣೋತ್ತರ ಪರೀಕ್ಷೆ ನಡೆಸಿದರು.