‘ಗಿಫ್ಟ್‌’ ಆಸೆ ತೋರಿಸಿ ಹಣ ಕಿತ್ತ ವಿದೇಶಿಗ
ಫೇಸ್‌ಬುಕ್‌ನಲ್ಲಿ ಪರಿಚಯ ಮಾಡಿಕೊಂಡು ವಂಚನೆ
ಬೆಂಗಳೂರು: ಲಂಡನ್‌ ಪ್ರಜೆಯ ಸೋಗಿನಲ್ಲಿ ನಗರದ ಯುವತಿಯೊಬ್ಬರನ್ನು ಪರಿಚಯ ಮಾಡಿಕೊಂಡಿದ್ದ ವ್ಯಕ್ತಿಯೊಬ್ಬ, ದುಬಾರಿ ಬೆಲೆಯ ಗಿಫ್ಟ್‌ ಆಸೆ ತೋರಿಸಿ ₹ 95 ಸಾವಿರ ಪಡೆದು ವಂಚಿಸಿದ್ದಾನೆ.
ಆ ಸಂಬಂಧ ನಗರದ ಸೈಬರ್‌ ಕ್ರೈಂ ಠಾಣೆಗೆ ಯುವತಿ ದೂರು ನೀಡಿದ್ದಾರೆ.
‘ಜಾನ್ಸನ್ ಬ್ರೋನ್ ಹೆಸರಿನ ಫೇಸ್ಬುಕ್ ಖಾತೆಯಿಂದ ಯುವತಿಗೆ ಫ್ರೆಂಡ್ ರಿಕ್ವೆಸ್ಟ್‌ ಬಂದಿತ್ತು. ಅದಕ್ಕೆ ಯುವತಿ ಒಪ್ಪಿಗೆ ಸೂಚಿಸುತ್ತಿದ್ದಂತೆ, ಆರೋಪಿ ಚಾಟಿಂಗ್ ಮಾಡಲಾರಂಭಿಸಿದ್ದ. ‘ಲಂಡನ್‌ನಲ್ಲಿರುವ ಎಲ್‌.ಜಿ ಎಲೆಕ್ಟ್ರಾನಿಕ್ ಕಂಪನಿಯಲ್ಲಿ ಸಹಾಯಕ ವ್ಯವಸ್ಥಾಪಕನಾಗಿ ಕೆಲಸ ಮಾಡುತ್ತಿದ್ದೇನೆ’ ಎಂದು ಹೇಳಿದ್ದ. ಅದನ್ನು ನಂಬಿದ್ದ ಯುವತಿ, ಚಾಟಿಂಗ್ ಮುಂದುವರಿಸಿದ್ದರು’ ಎಂದು ಪೊಲೀಸರು ಹೇಳಿದರು.
‘ದುಬಾರಿ ಬೆಲೆಯ ವಾಚ್, ಬ್ಯಾಗ್, ಚಪ್ಪಲಿ ಸೇರಿದಂತೆ ಹಲವು ವಸ್ತುಗಳ ಫೋಟೊವನ್ನು ಯುವತಿಗೆ ಕಳುಹಿಸಿದ್ದ ಆರೋಪಿ, ಅವುಗಳನ್ನೆಲ್ಲ ಉಡುಗೂರೆಯಾಗಿ ನೀಡುವುದಾಗಿ ಹೇಳಿದ್ದ. ವಿದೇಶಿ ಕರೆನ್ಸಿಯನ್ನೂ ಕೊಡುವುದಾಗಿ ಆಮಿಷವೊಡ್ಡಿದ್ದ. ಉಡುಗೊರೆಯನ್ನು ಭಾರತಕ್ಕೆ ಕಳುಹಿಸಲು ₹ 25 ಸಾವಿರ ಶುಲ್ಕವಾಗುತ್ತದೆ’ ಎಂದು ತಿಳಿಸಿದ್ದ. ಅದನ್ನು ನಂಬಿದ್ದ ಯುವತಿ, ಆತ ಸೂಚಿಸಿದ್ದ ಬ್ಯಾಂಕ್‌ನ ಖಾತೆಗೆ ಗೂಗಲ್ ಪೇ ಆ್ಯಪ್ ಮೂಲಕ ಮೇ 12ರಂದು ಹಣ ಹಾಕಿದ್ದರು.’
‘ಹ್ಯಾರಿ ಮಿಕ್ ಎಂಬ ಹೆಸರು ಹೇಳಿಕೊಂಡು ಕಸ್ಟಮ್‌ ಅಧಿಕಾರಿಗಳ ಸೋಗಿನಲ್ಲಿ ಮೇ 13ರಂದು ಯುವತಿಗೆ ಕರೆ ಮಾಡಿದ್ದ ವ್ಯಕ್ತಿ, ‘ಲಂಡನ್‌ ಸ್ನೇಹಿತ ನಿಮಗೆ ಕಳುಹಿಸಿರುವ ಪಾರ್ಸಲ್ ದೆಹಲಿಗೆ ಬಂದಿದೆ. ಅದರಲ್ಲಿ ವಿದೇಶಿ ಕರೆನ್ಸಿ ಇದ್ದು, ಅದನ್ನು ಬಿಡಿಸಿಕೊಳ್ಳಲು ಶುಲ್ಕ ಪಾವತಿ ಮಾಡಬೇಕು. ಇಲ್ಲದಿದ್ದರೆ ನಿಮ್ಮ ಮೇಲೆ ಕ್ರಿಮಿನಲ್ ಕೇಸ್‌ ದಾಖಲಿಸಿ ಬಂಧಿಸಲಾಗುವುದು’ ಎಂದಿದ್ದ. ಅದನ್ನೂ ನಂಬಿದ್ದ ಯುವತಿ, ಎರಡನೇ ಬಾರಿ ₹ 70 ಸಾವಿರ ಹಾಕಿದ್ದರು.’
‘ಮರುದಿನ ಪುನಃ ಕರೆ ಮಾಡಿದ್ದ ಆರೋಪಿ, ಮತ್ತೇ ₹ 2 ಲಕ್ಷ ಕೇಳಿದ್ದ. ಹಣ ಪಾವತಿ ಮಾಡಲು ತಯಾರಿ ನಡೆಸಿದ್ದ ಯುವತಿ, ಕೊನೆ ಗಳಿಗೆಯಲ್ಲಿ ಅನುಮಾನಗೊಂಡು ಸ್ನೇಹಿತರನ್ನು ವಿಚಾರಿಸಿದ್ದರು. ‘ಇದೊಂದು ವಂಚಕರ ಜಾಲ’ ಎಂದು ಗೆಳೆಯರೆಲ್ಲ ತಿಳಿಸಿದ್ದರು. ನಂತರವೇ ಅವರು ಠಾಣೆಗೆ ಬಂದು ದೂರು ನೀಡಿದ್ದಾರೆ. ಆರೋಪಿಗಳನ್ನು ಪತ್ತೆ ಮಾಡುತ್ತಿದ್ದೇವೆ’ ಎಂದು ಪೊಲೀಸರು ಹೇಳಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.