ಹುಬ್ಬಳ್ಳಿ: ಯುವಕರು ನೀರುಪಾಲಾದ ದೃಶ್ಯ ಮೊಬೈಲ್‌ನಲ್ಲಿ ಸೆರೆ

ಹುಬ್ಬಳ್ಳಿ: ಬೆಣ್ಣೆಹಳ್ಳದ ಪ್ರವಾಹದಿಂದ ಜಲಾವೃತಗೊಂಡ ಹುಬ್ಬಳ್ಳಿ ತಾಲ್ಲೂಕಿನ ಇಂಗಳಹಳ್ಳಿ–ಕುಸುಗಲ್ ರಸ್ತೆಯನ್ನು ಸೋಮವಾರ ದಾಟುತ್ತಿದ್ದ ನಾಲ್ವರು ಯುವಕರು, ನೀರಿನಲ್ಲಿ ಸೆಳೆತಕ್ಕೆ ಸಿಲುಕಿದರು.

ಅದೃಷ್ಟವಶಾತ್ ಮೂವರು ಈಜಿ ದಡ ಸೇರಿದರೆ, ಬ್ಯಾಹಟ್ಟಿಯ ಆನಂದ ಹಿರೇಗೌಡ್ರ ನೀರು ಪಾಲಾದರು. ಈ ದೃಶ್ಯ ಹಳ್ಳದಂಚಿನಲ್ಲಿ ನಿಂತಿದ್ದ ಸ್ಥಳೀಯರ ಮೊಬೈಲ್‌ ಫೋನ್‌ನಲ್ಲಿ ಸೆರೆಯಾಗಿದೆ. ಅಗ್ನಿಶಾಮಕ ದಳದ ಸಿಬ್ಬಂದಿ ಸಂಜೆವರೆಗೂ ಆನಂದ ಅವರಿಗಾಗಿ ಶೋಧ ಕಾರ್ಯಾಚರಣೆ ನಡೆಸಿದರೂ ಪತ್ತೆಯಾಗಲಿಲ್ಲ. ಮಂಗಳವಾರ ಬೆಳಿಗ್ಗೆ ಮತ್ತೆ ಕಾರ್ಯಾಚರಣೆ ನಡೆಯಲಿದೆ ಎಂದು ಪೊಲೀಸರು ತಿಳಿಸಿದರು.