ಸ್ಟಾಕ್ಹೋಮ್ (ಎಪಿ): 1950ರಿಂದ ಗಮನಿಸಿರುವ ಜಾಗತಿಕ ತಾಪಮಾನ ಏರಿಕೆಗೆ ಮಾನವನ ಚಟುವಟಿಕೆಗಳೇ ಪ್ರಧಾನ ಕಾರಣ ಎಂಬುದನ್ನು ವಿಜ್ಞಾನಿಗಳು ಈಗ ಹೆಚ್ಚು ವಿಶ್ವಾಸದಿಂದ ಹೇಳಬಹುದಾಗಿದೆ ಎಂದು ಅಂತರರಾಷ್ಟ್ರೀಯ ವೈಜ್ಞಾನಿಕ ತಂಡವೊಂದು ಸಿದ್ಧಪಡಿಸಿರುವ ಹೊಸ ವರದಿ ಶುಕ್ರವಾರ ತಿಳಿಸಿದೆ.
ಹವಾಮಾನ ವ್ಯವಸ್ಥೆಯ ಸ್ಥಿತಿಗತಿಗಳ ಕುರಿತಾದ ತನ್ನ ಅಂದಾಜು ವರದಿಯನ್ನು ಅಂಗೀಕರಿಸಿರುವ ಹವಾಮಾನ ವೈಪರೀತ್ಯದ ಮೇಲಿನ ಅಂತರರಾಷ್ಟ್ರೀಯ ಸಮಿತಿಯು (ಐಪಿಸಿಸಿ), ‘ಮಾನವ ಸೃಷ್ಟಿಯ ತಾಪಮಾನ ಹೆಚ್ಚಳವು ಭಾರಿ ಅಪಾಯದ ಮಟ್ಟಕ್ಕೇರಲಿದೆ’ ಎಂದು ಕಠಿಣ ಪದಗಳಲ್ಲಿ ಎಚ್ಚರಿಸಿದೆ.
ವಿಶ್ವಸಂಸ್ಥೆ ಪ್ರಾಯೋಜಿತ ಈ ಸಮಿತಿಯು 2007ರಲ್ಲಿ ಮಂಡಿಸಿದ ತನ್ನ ಹಿಂದಿನ ಅಂದಾಜು ವರದಿಯಲ್ಲಿ ಜಾಗತಿಕ ತಾಪಮಾನ ಹೆಚ್ಚುವ ನಿರೀಕ್ಷೆ ಇದೆ’ ಎಂದು ತಿಳಿಸಿತು.
‘ಹವಾಮಾನ ವ್ಯವಸ್ಥೆಯ ಸ್ಪಷ್ಟ ತಿಳಿವಳಿಕೆ ಹಾಗೂ ಏರುತ್ತಿರುವ ಉಷ್ಣಾಂಶದ ಪರಿಣಾಮಗಳ ವಿಶ್ಲೇಷಣೆಗೆ ಸುಧಾರಿತ ಮಾದರಿಗಳನ್ನು ಅಳವಡಿಸಿಕೊಳ್ಳುವ ಮೂಲಕ ಹೆಚ್ಚಿನ ಸಾಕ್ಷ್ಯ ಸಂಗ್ರಹ ಸಾಧ್ಯ’ ಎಂದು ಸಮಿತಿ ತೃಪ್ತಿ ವ್ಯಕ್ತಪಡಿಸಿದೆ.
‘ವಾತಾವರಣ ಮತ್ತು ಸಾಗರ ಬಿಸಿಯಾಗಿರುವುದು, ಹಿಮ ಮತ್ತು ಮಂಜುಗಡ್ಡೆ ಪ್ರಮಾಣ ಕಡಿಮೆಯಾಗಿರುವುದು, ಜಾಗತಿಕ ಮಟ್ಟದಲ್ಲಿ ಸಮುದ್ರ ಮಟ್ಟ ಏರಿಕೆಯಾಗಿರುವುದು ಹಾಗೂ ಹಸಿರುಮನೆ ಅನಿಲಗಳ ಕೇಂದ್ರೀಕರಣ ಹೆಚ್ಚಾಗಿರುವುದನ್ನು ವಿಜ್ಞಾನದ ಮೇಲಿನ ನಮ್ಮ ಅಂದಾಜು ವರದಿ ಗುರುತಿಸಿದೆ’ ಎಂದು ಇದನ್ನು ತಯಾರಿಸಿದ ಕಾರ್ಯತಂಡದ ಸಹ ಅಧ್ಯಕ್ಷ ಖ್ವಿನ್ ದಾಹೆ ತಿಳಿಸಿದ್ದಾರೆ.
2,000 ಪುಟಗಳ ಪೂರ್ಣ ವರದಿಯನ್ನು ಸೋಮವಾರದ ನಂತರ ಬಿಡುಗಡೆ ಮಾಡಲಿದೆ. ನೀತಿ ನಿರೂಪಕರಿಗಾಗಿ ವರದಿಯ ಸಂಕ್ಷಿಪ್ತ ಮುಖ್ಯಾಂಶಗಳನ್ನು ಮಾತ್ರ ಶುಕ್ರವಾರ ಬಿಡುಗಡೆ ಮಾಡಲಾಗಿದೆ. ಈಗಾಗಲೇ ವರದಿಯ ಅನೇಕ ಅಂಶಗಳು ಸೋರಿಕೆಯಾಗಿದ್ದು, ಸಂಕ್ಷಿಪ್ತ ವರದಿಯಲ್ಲಿ ಕೆಲವು ಅಚ್ಚರಿ ಅಂಶಗಳು ಮಾತ್ರ ಇವೆ.
ನಿರೀಕ್ಷೆಯಂತೆ, ಈ ಶತಮಾನದ ಅಂತ್ಯದ ಹೊತ್ತಿಗೆ ಸಮುದ್ರದ ಮಟ್ಟ 1032 ಇಂಚುಗಳಿಗೆ ಏರಿಕೆಯಾಗುತ್ತದೆ ಎಂದು ಐಪಿಸಿಸಿ ಹೇಳಿದೆ. ಈ ಹಿಂದಿನ ವರದಿಯಲ್ಲಿ ಸಮುದ್ರ ಮಟ್ಟ 723 ಇಂಚುಗಳಷ್ಟು ಏರಿಕೆಯಾಗುವುದೆಂದು ಅಂದಾಜಿಸಿತ್ತು.
ಈ ವರದಿಯು ಹೊಸ ಹವಾಮಾನ ಒಪ್ಪಂದದ ಮೇಲಿನ ವಿಶ್ವಸಂಸ್ಥೆಯ ಸಮಾಲೋಚನೆಗೆ ವೈಜ್ಞಾನಿಕ ಆಧಾರವಾಗುವುದರಿಂದ ಬಹಳ ಮಹತ್ವದ್ದು. ಸರ್ಕಾರಗಳು 2015ರಲ್ಲಿ ಈ ಒಪ್ಪಂದವನ್ನು ಅಂತ್ಯಗೊಳಿಸಬೇಕಿದೆ.
ಆದರೆ ಹವಾಮಾನ ವೈಪರೀತ್ಯದ ಕೆಟ್ಟ ಪರಿಣಾಮಗಳನ್ನು ತಡೆಯಲು ಉಷ್ಣಾಂಶವನ್ನು ನಿಗದಿತ ಮಿತಿಗಿಂತಲೂ ಕಡಿಮೆ ಮಟ್ಟದಲ್ಲಿ ಕಾಯ್ದುಕೊಳ್ಳುವುದು ಅಗತ್ಯ ಎಂಬ ವಿಜ್ಞಾನಿಗಳ ಸಲಹೆಯಂತೆ, ಸರ್ಕಾರಗಳು ಇಂಗಾಲ ಹೊರಸೂಸುವಿಕೆ ಕಡಿತಕ್ಕೆ ಬದ್ಧವಾಗುತ್ತವೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.